ئەڤە 30 سالن کو ھەر جارێ پارتییەکا سییاسی یا ترکیایێ ب دۆر، باسی ھەبوونا پرسگرێکەکا، ل وەلاتێ خوە دکەت و دبێژیت: “ئەم دێ چارەسەر کەین.” ناڤێ ڤێ پرسگرێکێ ژی دانایە “کورد سۆرونو”.
ب راپۆرتا SHP “پارتیا پۆپۆلیست یا سۆسیال دەمۆکراتیکا ترکیێ” یا ب ناڤێ “دۆغو راپۆرو”دەست پێ کرئۆزال گۆت: “ئەم دکارین فەدەراسیۆنێ نیقاش بکەین.” دەمیرەل گۆت: “ئەم رەئالیتەیا کوردان دناسین.” چیلەرێ گۆت: “مۆدەلا باسکێ”. یلماز گۆت: “رێیا یێکەتیا ئەورۆپایێ د دییاربەکرێ را دەرباس دبیت.” ئەردۆگان گۆت: “کورد سۆرونو” ھەیە. نھا کلچدارۆغلو ژی دبێژیت، ھەیە.
بەرپرسێن پارتی و دەولەتا ترکیایێ دبێژن؛ پرسگرێک ھەیە و ب ناڤ ژی دکەن لێ نابێژن ئەڤە پرسگرێکەکا چاوایە. دبێژن: “ئەم دێ چارەسەر کەین.” لێ قەت باسی پرۆژەیەکا چارەسەریێ ژی ناکەن. ھەتا ڤێرە ئاسایی یە. ئەڤە دەولەتەکا داگیرکەر و جینۆسایدکارە. ژ ھندور یان ژ دەرڤە فشارەک ل سەر وان ھەبیت، ژ بۆ کو وێ فشاری پووچ بکەن مانەورا دکەن و بۆیاغەکا دەمۆکراتیک ل دەولەتا خوە یا جینۆسایدکار ددەن. ب ڤان گۆتنان دخوازن تێکۆشینا رزگارییێ راوەستینن، ڤالا دەرخینن.
یا بالکێش ئەوە کو ھەر جارا کو رێڤەبرێن سییاسەتا ترکیایێ بەیانەکا ووسا ددەن کەلەجانەک ل کوردستانێ پەیدا دبیت، رۆژەڤا سییاسی یا کوردستانێ دادگریت و پارتییێن مە دکەڤنە رێزێ، دبێژن: “ئەم ئامادەینە لگەل هەوە دا رێکەفتنێ بکەین.” و ڤان درەوێن داگیرکەران جوان دکەن.
ئەڤە 150 سالن ل کوردستانێ تێکۆشینا رزگاریا نەتەوەیی بەردەوامە. بەدەلێن گەلەک مەزن ھاتنە دایین. ل پەرلەمانێن گەلەک دەولەتان ل سەر کێشەیا کوردستانێ جڤین ھاتنە ئەنجام دایین. ل باشوورێ وەلاتێ مە حکوومەتەکا فەدەرال ھەیە و ژ ئالیێ دەولەتێن جیھانێ و دەولەتا ئیراقێ ڤە دهێتە ناسین. ل رۆژئاڤایێ وەلاتێ مە رێڤەبەرییەکا خوەسەر ھەیە، بەرپرسێن وان لگەل دەولەتێن زلھێز دا ھەڤدیتنان دکەن. چار سالان بەرێ رەفەراندووما سەرخوەبوونێ ھاتیە ئەنجامدان و ژ 100ی 93یێ گەلێ مە گۆت بەلێ، ئەم دەولەتەکا سەربخوە دخوازین.
پشتی قوسا شەری، تێکۆشین و پێشکەتنان، کلچدارۆغلو گۆتیە: “کورد سۆرونو” ھەیە. پارتییێن مە ڤێ وەک منەتەکێ دبینن و ژ بۆ کو ببنە موخاتەبێ ڤێ بانگێ، لگەل هەڤدوو کەتنە کێبرکیێ. مێرکی نەگۆتیە ئەڤ پرسگرێکە چیە و ئەم دێ چاوا چارەسەر کەین. تەنێ گۆتیە پرسگرێک ھەیە. دنیا ژی، دەولەتا ترکیایێ ژی دزانیت کو ل رۆژھلاتا نێزیک کێشەیا کوردستانێ ھەیە و ئەڤ کێشەیا وەلاتەکێ داگیرکری، پارچەکری و پارڤەکرییە.
تەنێ کو ناڤدارەکێ ترک بێژیت پرسگرێکا کوردا ھەیە ئەڤە کەلەجانەکێ ددەتە سنفا مە یا سیاسی. و ھەر کەس خوە موخاتابێ ڤێ پەیڤێ دبینیت.
ئەڤە روورەشییە. سەدەمێن ڤێ روورەشییێ ل ئالیکێ، لێ ئەڤ ھەلوەستە، پێناسەیا ئەنیشتەین ژ بۆ ئەحمەقییێ ئەپدێت دکەت. ئەنیشتەین دبێژەیت: “ئەحمەقی ئەوە کو مرۆڤ ھەمان تشتی بکەت و ل بەندێ بیت کو ئەنجامەکێ جودا دەرکەڤیت”. ئەڤە 30 سالن کو سنفا مە یا سییاسەتێ ھەمان تشتی دکەت و ل بەندا ئەنجامەکێ جودایە. ئەڤە “سۆسرمەتی”یە.
ل ھەر دەرێ جیھانێ و ل کوردستانێ ژی سییاسەتا رزگارییا مللی یا زەلالە. ئەم ملەتەکین، وەلاتەکێ مە ھەیە و دەولەتبوویین، ئانکو خوە ب خوە برێڤەبرن مافێ مەیە. سییاسەتا مللی ل سەر راستەقینییا وەلات و ملەتی دهێتە مەشاندن.
ژ بۆ کو سییاسەتا کوردستانی، سییاسەت و دەولەتا ترکیایێ موخاتاب بگریت و باسی “پێڤاژۆیا چارەسەریێ” بکەر، 3 خالێن ئەساسی، زەلال و ھێسان ھەنە:
1- ب ئاوایەکی فەرمی پەژراندنا راستەقینە یا ملەتێ کورد.
2- پەژراندنا راستەقینە یا وەلاتێ کوردان، ئانکو کوردستانێ.
3- پەژراندنا دەزگەھێ خوە ب خوە برێڤەبرنێ، ئانکو مەرلەمانێ مللی یێ کوردستانێ. (ئەڤ ھەر سێ خالە د ھەمان دەمی دا ب تەسبیتکرن و حەزکرنا ب سنۆرێن مللی ڤە گرێدایی یە).
کی کو ل سەر ناڤێ سییاسەتا کوردستانی ڤان خالان پشتچاڤ بکەت و لگەل سییاسەت دەولەتا ترکیایێ دا ببیتە موخاتەب، داگیرکەریا ڤێ دەولەتێ پەسەند دکەت.
ناڤ و نیشانێن چارەسەریێ نە پەرلەمانێ ترکیایێ یە. گەر چارەسەری دهێتە خواستن ئەڤ مژارە دکاریت د ناڤ دو پەرلەمانان دا بهێتە موزاکەرە و چارەسەر کرن. چ حیزب نکارن تەمسیلا مللەتەکێ بکەن. تەمسیلا مللەتان، د سەردەما مە دا، د سەر پەرلەمانی را دبیت.
ئەوێن کو ئیرلاندا، کەتەلۆنییا، باسک، سکۆچیا وەک مۆدەلێن چارەسەرییێ ئیشارەت دکەن، دڤێت ھایا وان ژ پەرلەمانێن ڤان وەلاتان ژی ھەبیت.
