ھەڤسەرۆکێ کۆنسەیا رێڤەبەرا کەجەکێ جەمیل بایک کو ب «ئەلخماهۆیێ قەندیلێ» تێ ناسکرن بەشداری بەرنامەیا تایبەتا ستێرک تیڤی بوو و وەکە جارێن بەرێ تەوشۆمەوشۆ ئاخڤی و هن نرخاندنێن وەکە خوە بێ واتە کرن.
د نرخاندنێن خوە یێن بێ واتە دە، جەمیل بایک قالا “بەرخوەدانا عەڤدلا ئۆجالان یا ل ئیمرالیێ!” کر و راگهاند، «رێبەر ئاپۆ 23 سالن ل ئیمرالیێ ل دژی کۆمپلۆیا ناڤنەتەوەیی ب رەنگەکێ دیرۆکی ل بەر خوە ددەت. دبیت کو د دیرۆکا مرۆڤاھیێ دە گەلەک کۆمپلۆ ھاتبن کرن، لێ بەلێ چ ژ وان نە وەکە یا ل دژی رێبەر ئاپۆ بوو. ژ بەر کو د دیرۆکا مرۆڤاھیێ دە کەس مینا رێبەر ئاپۆ ل بەر کۆمپلۆیێ نەسەکنی». گەلۆ بایک قالا کیژان بەرخوەدانێ دکە؟! قەی کوردا ژ بیر کریە هەر ژ خولەکا یەکەم و ل کینیایێ رێبەرێ بایک خوە تەسلیمی دەولەتێ کر و رازی نەبوو وەکە گەریلایەکێ، وەکە سەرۆک و رێبەرەکێ بەرخوەدانی بکە و دەما پاسەوانا وی یا ژن ژێرە گۆتی «سەرۆکێ من دەمانچە ب من رە یە، بگرە و ل بەر خوە بدە»، ئۆجالان چ بەرسڤ دا؟!! قەی نە رێبەرێ وی بوو دەما گۆتی «ئەز بەرخوەدانا کلاسیک ناکم.»! ئەڤ ئاخافتنا ئۆجالان د دەمەکی دە بوو کو د دەورەیێن پەروەردەهیێ دە دگۆت گەریلایان، «کەسێ کو خوە ب ساخی رادەستی دەولەتا ترک بکە، خائین، خوەفرۆش و بێ نامووسە!».
“عەڤدلا ئۆجالان و بەرسڤا مەزن”!
بایک گۆت، «رێبەر ئاپۆ ژ بۆ تێکبرنا کۆمپلۆیێ بەرسڤەکا مەزن دا کۆمپلۆگەران»، لێ هەر کەس باش دزانە ئاپۆ چ بەرسەڤ ب دەولەتا ترک نەدان، بەرەڤاژی د یەکەم ئاخافتنا خوە دە، دەما میتا ترکیێ ئۆجالان سوواری بالەفرێ کری، ئۆجالان گۆت تیما میتێ، «گەر دەرفەت ب من وەرە دایین ئەزێ خزمەتا دەولەتێ بکم»، قەی ئەڤەیە بەرسڤا کو دڤێت کەسەک کو خوە ب رێبەرێ نە ب تەنێ نەتەوەکێ بەلکو ب رێبەرێ مرۆڤاتیێ ددەت ناسکرن بدەتە دەولەتا دوژمن؟! گەلۆ ب راستی بایک باسی کیژان بەرسڤا مەزن دکەت کو ئۆجالان دایە کۆمپلۆگەران؟! باسی وێ بەرسڤێ دکە دەما د دادگەها ترکیێ دە ئۆجالان دبێژیتە دادوەری، «دیکا من ترکە. ئەز لێبۆرینێ ژ دایکێن جەندرمەیێن شەهید بوویی دخوازم. بەندە کورد ئاشک یۆکتور. ئهم ل باکورێ ئیراقێ جهێ باوهرییا ترکیێ نه، پەکەکە ب رهنگهکی زانستی ژ ههموویان زێدهتر نێزیكی تایبهتمهندیێن بنیاتێ کۆمارا ترکیێ بوویه، یا ژ ههموویان ژی زێدهتر نێزیكی پرهنسیپێن ئاتاتورک ل سهر بنیاتێ زانستی بووی، پەکەکە یه. بەرێ من دگۆت ترکییەتی، لێ ئەز پووشمان بووم، نها ئەز دبێژم گەلێ ترک، ئەم د ناڤا گەلێ ترک دە نە، ئەو دەولەتا کو ئەتاتورک ل سەر هەرفاندنا دەولەتا خانەدانی و دینی راگهاندی شۆرەشگەریەک پراتیکی و سیاسیا پر جددی بوو، لۆما ئەم دکارین ئەتاتورک ب شۆرەشگەر ب ناڤ بکن. گەر دەولەتەک کوردی ل سەر سێنیەک ژ زێر دروستکری پێشکێشی من بکربا، ئەز دا ببێژم نا». گەلەک ئاخافتنێن دی یێن ب ڤی رەنگی هەنە کو ئۆجالان ژ دەولەتا ترک و نوونەرێ میتێ و دادگەها ترکیێ رە گۆتنە، لێ مرۆڤ نکارە د نڤیسەک ب ڤی ئاوا دە هەموویان بنڤیسە، دبە کو جەندین پەرتووک ژی نەکارن ڤان ئاخافتنان هەموویان ل خوە بگرن، لێ جەمیل بایک ڤان ئاخافتنان کو ئۆجالان ب تەنێ ژ بۆی پاراستنا خوە و بجی ئانینا ئەرکا خوە یا میتێ ب وی دایی گۆتنە، ب بەرسڤەک مەزن ژ بۆ کۆمپلۆگەران دزانە!
باییک و «چارەسەریا پرسگرێکا کورد ل ترکیێ»!
ل سەر نیقاشا «ل ترکیێ موخاتەب ژ بۆی چارەسەریا پرسگرێکا کورد کییە» ژی ئەلخماهۆیێ قەندیلێ هندەک نرخاندن کرن و گۆت، «ل ترکیەیێ رۆژێن داوی نیقاشەکا ‘موخاتاب رێبەر ئاپۆیە یان نا’ ھاتە دەستپێکرن. نیقاشەکە ب ڤی رەنگی بێواتەیە، بەرەڤاژیکرنە. رێبەر ئاپۆ ب ھەدەپێ رە ھەڤدیتن کر، شاند گەل ئاکەپێ و گۆت، ‘ب پارتیان ھەموویان رە باخڤن کو پرسگرێک بکەڤە رۆژەڤا مەجلیسێ. کو مەجلیس کۆمیسیۆنێ ئاڤا بکە. ھەر وھا ل کۆمیسیۆنێ ئەز ژی کاربم باخڤم’.یێ کو دبێژە ‘جھێ چارەسەریێ مەجلیسە، موخاتاب ژی ھەدەپە یە’ رێبەر ئاپۆیە». ل ڤڕ گەرەک ژ ئەلخماهۆیێ قەندیلێ وەرە پرسین، گەر مەجلیسا ترکیێ جهێ چارەسەریێ بە، گەر هەدەپە و رێبەرێ پەکەکێ موخاتەبێ چارەسەرکرنا پرسا کورد بن، گەلۆ ژ کەرەما خوە رە هوون نابێژن ل باشوورێ کوردستانێ هوون چ دکن؟!! چما هوون رۆژ ب رۆژ زێدەتر ئاخا باشوور تەسلیمی ترکیێ دکن، د دەمەکی دە کو هوون ب خوە دبێژن جهێ چارەسەریا پرسگرێکا کورد مەجلیسا ترکیێ یە؟! گەر ولۆ بە چما هوون بوون سەدەم کو هەدەپە ژ سەدێ 25 کۆرسیێن خوە د پارلامانتۆیا ترکیێ دە کێم بکە؟!
ئەلخماهۆ و بەرخوەدانا سەختە یا ل هەرێمێن پاراستنێ یێن مەدیایێ!
د بەشەک دن یێن ئاخافتنێن خوە یێن تەوشۆمەوشۆ دە ئەلخماهۆ دبێژە، «ل ھەرێمێن پاراستنێ یێن مەدیایێ نێزی 6 مەھن بێناڤبەر شەر دقەومە». گەلۆ هوون قالا کیژان شەری و کیژان هەرێمێن پاراستنێ یێن مەدیایێ دکن؟! د ڤی شەری دە هوون کارینە چ قاس ئەرد ژ دەولەتا داگیرکەرا ترکیێ بستینن، هوون کارینە چ قاس ئەرد بستینن و چ قاس زرارێ بدن دەولەتێ؟ چما رۆژ ب رۆژ هوون پاشدە دچن و پێتر دچن ناڤا کووراتیا ئاخا باشوور دە؟ گەر شەرەک ل هۆلێ هەبە و مژار رادەستکرنا باشوور ب دەولەتا ترکیێ نەبە چما هوون یەک بست ژ وێ ئاخا کو وە رادەستی ترکیێ کری ب شەر ناستینن، چما هینا نها یەک ستارگەها خوە یا بەرێ یا ل سەر سینۆر وە ژ ترکیێ نەستەندیە؟؟! نا ئالخماهۆ نا، ت شەرەک د نێڤبەرا وە و دەولەتێ دە تونە، ئەڤ ب تەنێ تەسلیمکرنا ئاخا کوردستانێ و رشتنا خوینا کوردان ب دەستێ دەولەتا داگیرکەرا ترکە. گەلۆ ب راستی هوون قالا کیژان دەربێ دکن کو گەریلا ل دەولەتا ترکیێ خستیە؟! وە ئامەد و مێردین و ئاگری و …. رزگار کرنە کو ووسا دبێژن؟
ئەلخماهۆ ئاخافتنێن خوە یێن تەوشۆمەوشۆ ددۆمینە و دبێژە، «گەریلا ب بەرخوەدانا خوە ئسپات کر کو دەرب دکارە ل دەولەتا ترک بێ خستن. ئەڤ گەلەکی گرینگە. دەولەتا ترک پشتی کو دەرب خوار دیت کو نکارە ئەنجامێ وەربگرە، لەوما پەدەکە خستە ناڤبەرێ ژ بۆ ئالیکاریێ بدە وان.»! ئەلخماهۆ گەلێ کورد ب نەزان و های ژ خوە نە دزانە لۆما ب ڤی ئاوا ب پەیڤان دلیزە و دخوازە دەرەوان بکە راستی و راستیێ ژی بکە دەرەو. یا راست ئەڤ حکوومەتا هەرێما کوردستانێ بوو کو دەما دیتی ترکیێ و پەکەکێ لهەڤ کریە کو باشوور داگیر بکن و ترکیە پەکەکێ وەکە پرەکی بۆ دەرباسبوونا خوە ژ بۆ ناڤا باشوور و ب داوی کرنا ستاتۆیا باشوور بکار تینە ژ نوو کەت تەڤگەرێ و ژ بۆی بێ ئەنجام کرنا ڤێ کۆمپلۆیا هەڤپارا ترکیێ و پەکەکێ پێشمەرگە شاندن هەرێمێن سینۆری داکو رێگریێ ل بەرەڤ پێش هاتنا زێدەترا ترکیێ بکن. گەر نا ژ خوە هەر کوردەکی ب چاڤێ خوە دیت بەرا ڤان تەڤگەرێن حکوومەتا هەرێما کوردستانێ کو پەکەکە ب “تەڤگەرێن پەدەکی” ددە ناسکرن دەولەتا ترک پێتر 50 کیلۆمەتران هات ناڤا خاکا باشوورێ کوردستانێ، لێ بجیکرنا پێشمەرگەیێن کوردستانێ ل وان ناڤچەیان ئەڤ کۆمپلۆیا هەڤپارا ترکیێ و پەکەکێ ب داوی کر و ئەو سەکناندن.
