ئاشکەراکرنا ئەنجامێن دەستپێکێ یێن ھلبژارتنێن ئەنجوومەنا نوونەران یا ئیراقێ، بوو جھێ نەرازیبوونا پرانیا ئالی و گرووپێن چەکدارێن شیعە، ئەو نھا ژی گەفا دکەن و ئەنجامێن ژ ئالیێ کۆمسیۆنا ھلبژارتنان ڤە ھاتنە راگھادن، رەد دکەن.
پشتی ئاشکەراکرنا ئەنجامێن دەستپێکێ یێن ھلبژارتنێن ئەنجوومەنا نوونەران یا ئیراقێ، ھەڤپەیمانیا فەتح یا حەشدا شەعبی ل سەرانسەری ئیراقێ تەنێ 16 کورسی ب دەست خستن و %70 دەنگێن خوە ژ دەست دان.
ھەڤپەیمانیا فەتح پشتی ڤێ شکەستنا مەزن راگھاند، کۆمسیۆنا بلندا ھلبژارتنان پابەندی رێکارێن یاسایی نەبوو و ئەو دێ گلیێ ل سەر ئەنجامێن ھلبژارتنێ تۆمار کەن.
د وێ دەربارێ دا، بەرپرسێ ئەولەھیێ یێ کەتیبەیێن حزبولایێن ئیراقێ ئەبوو عەلی عەسکەر راگھاند، ئەڤ ھلبژارتن مەزنترین پرۆسەیا خاپاندنا گەلێ ئیراقێ د دیرۆکێ دایە و گەف خوار و گۆت: “ئەم دێ ھەر تشتی ڤەگەرینین ریا وێ یا راست.”
ئەبوو عەلی عەسکەر داخواز ژ گرووپێن دی یێن حەشدا شەعبی کر کو خوە ژ بۆ “قۆناغا ھەستیار” ئامادە بکەن و گۆت: “حەشدا شەعبی ب ئاوایەکێ سەرەکی ھاتیە ئارمانجکرن” و دڤێت ئەو بەرەڤانیێ ل خوە بکەن.
