جەهەپەیا کو د دەربارێ مژارا کوردا دا ھەتا ئیرۆ کەڕ و لال و کۆرە بوو، ڤێ داوییێ ژ تەمارا مرنێ ھشیار بوو و بەحسا مژارا کوردان کر. جەهەپە، ب ڤێ ھەلوەستا خوە و ل گۆر ناسنامەیا خوەیا سۆسیال دەمۆکرات وێرەکییەک دا پارتییێن ئۆپۆزسیۆن و دیوارێ ترسێ ھەلوەشاند. بەلکی ژی د دیرۆکا خوە دا، د دەربارێ دەمۆکراسییێ دا ئەوقاسی ب وێرەکی ھەلوەستەک نیشان نەدابوو.
جەهەپێ، د ناڤبەرا 4-6ێ ئیلۆنێ دا ب شاندەکی بلند سەردانا سەرۆکاتییا هەرێما کوردستانێ کر. د ڤان ھەڤدیتنان دا مژارا کورد ھاتیە رۆژەڤێ و ژ بۆ بەردەوامییا ھەڤدیتنان ھاتیە لھەڤکرن. پێڤاژۆ ب ئاوایەکی ئەرێنی بەردەوامن. ژ بۆ ھەڤدیتنێن گشتی ژی مەجلیسا ترکیێ ھاتیە دەستنیشانکرن. ئەڤ پێشکەتنەکا گەلەک و گەلەک گرینگە.
نھا دۆر ھاتیە (جەهەپێ، ھەدەپێ، سەرۆکاتییا هەرێما کوردستانێ) هەموو پارتییێن کو نوونەرێن وان د مەجلیسێ دا ھەنە تەڤلی پێڤاژۆیێ بکەن. پشترا ژی ترک و کوردێن کو ب ئەرێنی ل پێڤاژۆیێ دنێرن تەڤلی پێڤاژۆ و ھەڤدیتنان بکەن.
د ناڤ ڤێ ھەڤکۆمێ دا پەکەکە دڤێت ھەبیت. لێ، ب فکر و ئارمانجا “ھەڤدیتنێن ئیمرالییێ، ھەلکەفتا عۆسمان ئۆجالان، کانالێن کوردی و دەزگەھێن کو تەنێ خزمەتێ ژ دەڤەرەکێ را دکەن” بەشدار نەبن.
ھوون دخوازن ئەم مژارێ پچەکێ ڤەکین.
رێڤەبرێ گوندی و چەپگرێ ھەری سۆسیال دەمۆکرات “کاراۆگلان” ب خوە ژی د ھەموو ژیانا خوە دا گۆتنا کورد ب کار نەئانیە. ژ بەر ڤێ، وی دەمی من گۆتبوو کو پارتییا نیژادپەرەستا نۆروێجێ (فرەمسکرتتسپارتەر) ژی ژ بولەنج ئەجەوید چەپترە. ھەگەر چەپ ژ وێ خالێ ھاتبیتە ئاستا ئیرۆ ژ بۆ من پێشکەتنەکا ئەرێنی و گرینگە. شکاندنا زنجیرێن کو ل بەر دەمۆکراسییێ ئاستەنگن، ھلوەشاندنا دیوارێ ترسێ، د مژارا کورد و کوردان دا خوەدی ئینسییاتیفبوون و نامزەتییا جەهەپێ ژ بۆ دەمۆکراسییا ھەرێمێ گەلەک گرینگە. باشدیتنا ڤێ پێڤاژۆیێ و دوورکەتنا ژ ئاخاڤتنێن توند ژ بۆ ھەموو پارتییێن ئۆپۆزسیۆن گرینگە، دەستپێکرنا ھەڤخەبات و پێڤاژۆیەک نوو ژ بۆ دەمۆکراسییا ھەرێمێ ھێژایە.
بێگومان دەمۆکراسی ئاڤاھییەکێ زوا پێک ناینیت. بەرەڤاژی وێ، دێ لگەل خوە دا گەشکرنەک ئابۆری، چاندی، ھونەری و سیاسی ژی ئینیت. ئەز ھێڤیدارم تەڤگەرا سۆسیۆ-ئەکۆنۆمیک کو د ناڤ ھەڤ دایە، پێڤاژۆیەک ژ شەر و پەڤچوونان دوور، بێیی پچووکخستن و جوداکرنا کو ھەرکەس کاربیت ب ناسنامەیا خوە تەڤ ل پێڤاژۆیا یەکیتییێ ببیت، بدە دەستپێکرن.
ھوون دخوازن ئەم ب ڤی ئاوا دەست پێ بکەین. برێز ئەردۆگان و باخچەلی راست دبێژن. “پرسگرێکا کورد تونەیە”. و پێ ڤەدکەن: “لگەل برایێن مەیێن کورد دا پرسگرێکێن پچووک ھەنە. ب دەستوورا خوەدێ (ھەردەم خوەدێ تەڤ لێ دکەن و دکەنە شریکێ کرێتییێن خوە) ئەم دێ وان پرسگرێکان د دەمەک کورت دا چارەسەر کەین”.
ئەو ب خوە ژی باوەر ژ گۆتنێن خوە ناکەن.
بەلێ، پرسگرێکا کورد و کوردان تونەیە. ئانگۆ، یێن کو پرسگرێکان دئافرینن نە کوردن. لێ تشتەکی دن ھەیە! د پێڤاژۆیا دیرۆکا ھەری نێزیکا کوردان دا ژ ئالیێ ترک، عەرەب و عەجەمان ڤە پرسگرێکا داگیرکرنا مافێ نەتەوی ھەیە. ئەڤ دەولەتێن کو ئەز بەحسا وان دکەم، ژ بەر کو نکارن دەست ژ داگیرکرنا مافێ نەتەوا کورد هەلگرن، پرسگرێکا داگیرکرنێ ھەیە و ناڤێ “پرسگرێکا کورد” ل ڤێ یەکێ دکەن. ب ڤی ئاوایی ئالۆزییا ھەری مەزن دکەن. ئەڤە ژی نە بەسە، وەکە کو کورد پرسگرێکان دەردخن دکەڤن رەوشا “ھەم زۆردار و ھەم سووچدار” و ناکۆکی، وێرانی و شەر بەردەوام دکەن.
تشتێ کو خوە پێ شاد دکەن و قەناعەتا خوە پێ ئانینە ئەڤەیە: وان چ تاوانێن دیرۆکی نەکرنە؛ خاک و وەلات داگیر نەکرینە، زەخت و زولم نەکرنە، لێ کوردێن بێعاقل شۆرەش کرنە، بوونە تەرۆریست! گاڤا کورد ژ نەدیتی شۆرەشێ دکەن و دبنە تەرۆریست، مافێ ترکان یێ زخت و زولمێ، بۆمبەبارانکرن و شەر ئافراندنێ هەیە! ژ دەرڤەیی وان، ھەتا ئیرۆ ل دنیایێ کەسی باوەری و یەقینی ب ڤێ ھشمەندییێ نەئانییە، کەسی ئەو جددی نەگرتیە. پرسگرێکا کو ناڤێ کورد لێ دکەن لێ ئەساسەن پرسگرێکا داگیرکرنێیە ھەتا ئیرۆ بەردەوام کریە. ئینسان شەرم ژ خوە دکەت لۆ! ژ بولەند ئەجەویدێ ھەری چەپ و سۆسیال دەمۆکرات بگرن ھەتا ئیرۆ، ھوونێ بێژنە زمانەکێ کو ل ترکیێ 25 ملیۆن و ل ھەر چار پارچەیێن کوردستانێ 50 ملیۆن کورد پێ دئاخڤن “زمانەکێ نەناس” و د بەلگەیێن دادگەھ و مەجلیسێ دا ئینکارا زمانێ کوردی کەن. پشترا ژی ھوون دێ بێژن کورد تەڤلیھەڤییان و بێ ئارامییێ چێدکەن و دبنە تەرۆریست.
ھەکە کورد بێژنە ترکان “پرسا ترک تونەیە” و بێژنە ترکی ژی “زمانەکێ نەناس”، دێ ترکێن وەلاتپارێز چ بێژن گەلۆ! یان دێ وەک بەرخکان ل مالێ روونێن و ب دارێ زۆرێ کوردی ھین ببن؟ یان ژی!؟
ئەز بەحسا سیاسییێن کو ئەڤ رەوشە ژ بۆ خوە کریە بنگەھ ناکم، بەحسا سیاسەت و رانتێن وان یێن ئابۆری ناکەم. زارۆک ژی ڤێ رەوشێ دزانن. تێ زانین کو ئەڤ کەس ژ رانتا نارکۆتیک، چەک، دەرمان و قاچاخچیتییا مرۆڤان خوە نادەن ئالیەکێ.
