ل ترکیا پرسگرێکا کوردا تونەیە!

ل ترکیا پرسگرێکا کوردا تونەیە!

ل ترکیا د ھندەک قۆناغان دا دەما کو سیاسی بخوازن ل گۆرا خوە بەحسا “پرسگرێکا کوردان” دکەن و ڤێ یەکێ تێخن رۆژەڤێ. ئەڤجا ھەر ئالیەک ل گۆرا بەرژەوەندیێن خوەیێن رۆژانە تەڤلی گۆتوبێژا دبن و ب گۆتارێن خوە، ئاوایێ چارەسیا کو بەحس دکەن سڤکاتیێ ل ملەتێ کورد دکەن. بەشەک ژ کوردان ژی دکەڤنە د ناڤا ڤان گۆتوبێژێن بێ واتە دا، خوە وەک موخاتەبێ چارەسەریا ڤێ “پرسگرێکێ” ددەنە نیشاندان.

دەما “پرسگرێک” دهێتە گۆتوبێژ کرن ھەرکەس خوە ژ راستیا ھەیی دوور تێخیت و ل گۆرا موخاتەب کیە ڤێ پرسا کو دکەڤیتە رۆژەڤێ دا دبن خوەدی ھەلوەست.

ژ بەری ھەر تشتەکێ د رەوشا نھا دا هیچ ئالیەکێ سیاسی یێن کورد یان ژی خوە وەک کورد دحەسێبینن ل باکورێ کوردستانێ نە موخاتەبێ چارەسەریا “”پرسگرێکا کوردا”نە. ھەتا کو ئەو تشتێ کو وەک پرسگرێک دهێتە دیتن ناڤێ وێ یێ راستەقینە لێ نەکەن ھەر گۆتوبێژا د  ڤێ دەربارێ دا دهێتە کرن نە راستە و چ چارەسەری ژی چێنابن.

پیدڤیە هەموو ترک، سیاسیێن ترک، رەوشەنبیر، نڤیسکار و د سەری دا ژی چەپێن ترک باش تێبگەھن کو، هیچ پرسگرێکەکا ب ناڤێ پرسگرێکا کورد ل ترکیا نینە. پرسا کوردان، پرسا نەتەوەیەک بندەستە. وەلاتێ وان ھاتیە داگیرکرن و ھەموو مافێن وان یێن نەتەوی ھاتنە وەندا کرن و ژیانا وان، چاندا وان عوورف و عادەتێن وان، زمانێ وان ھەموو ھاتیە قەدەغە کرن. ئەگەر ھندەک قۆناغان دا سستاھیەک ژ ئالیێ دەستھلاتان ڤە چێببیت ژی، لێ چ جارا مافێن وان یێن رەوا نەھاتنە رۆژەڤێ. ل باکورێ کوردستانێ چارەسەریا ھەری کێم کو مرۆڤ بکاریت بەحس بکەت دڤێت ژ بەری ھەر تشتەکێ کورد وەک نەتەوە بێنە قەبوول کرن. کورتاھی تشتا کو ئیرۆ ل باشوورێ کوردستانێ ھەیی کێماسی دڤێت ل باکور ژی بهێتە ئاڤاکرن. دێ وی دەمی مرۆڤ ب ئاوایەک دی بەحسا کوردا و رەوشا وان کەت.

ل باکورێ کوردستانێ جڤاکا کورد ب سیاسەت و شەرێ پەکەکێ یێ دیزاینکری ب ئاوایەکێ تێکچوویە، تەخریباتێن مەزن پەیدا بوونە. باکورێ کوردستانێ د راستیا خوە دا گەلەکی بچووک بوویە. ل گۆرا رەوشا جۆگرافیا سیاسی 23 ویلایەت د ناڤا خاکا باکورێ کوردستانێ دا نە. لێ گەلۆ ئیرۆ چەند ویلایەت کوردن؟ یان ژی نیشتەجیێن چەند باژارێن کوردستانێ، خوە وەک کورد دبینن؟ گەلۆ کەسەکێ حەسابا ڤێ یەکێ کریە؟ دەما سینۆرێ باکورێ کوردستانێ دهێتە دیارکرن د ناڤ دا ژ سەدا چەند د جوگرافیا کوردستانێ دا خوە وەک کورد و وەلاتێ خوە وەک کوردستان دبینن؟ گەلۆ قەت حەسابێ ڤێ ھاتیە کرن؟ گەلۆ حەتا چ رادەیێ کار و بارێ رێخستنێن کورد ل گۆرا ڤێ راستیێ رێڤە دچیت؟

باش بەرێ خە بدەنێ دا کو راستیا ھەیی بەربچاڤ بیت. گەلۆ د جوگرافیا باکورێ کوردستانێ دا، رەوشا ئەرزەنجان، ئەرزەرۆم، سیواس، مەلەتیا، ئەلعەزیز، عەنتاب، کلس، مەرەش چیە؟ د ڤان باژاران دا سبەھی رەفەراندومەک چێببیت خەلک، دێ خوە وەک کورد دەن نیشاندان یان نە؟ ئەڤ باژار گەلەک مخابن ئێدی خوە وەک باژارێن کوردا نابینن و ئێدی رەنگە کورد د ڤان باژاران دا یان  نەمانە یان ژی گەلەک کێم بوونە.

ژ ئالیەک دی ڤە؛ گەرەک رەوشا سیاسی و جڤاکی یا کوردان ل ئەردەخان، قەرس ،ئگدر، ئاگری مووش، ئادیامان، بنگۆ، دەرسم و رحایێ باش بهێتە نرخاندن. پێوستە مرۆڤ بزانیت کا گەلۆ چارەنووسا ڤان باژاران ژی وەک باژارێن دی دبیت یان نە؟

شونڤە دمینیت، دیاربەکر، وان، ھەکاری، شرنەخ، بدلیس، سێرت و مێردن.

گەرەک ل بەر چاڤا بیت کو گەلەک ژ ڤان باژاران نیشتەجی پشتا خوە دانە زمانێ کوردی و ترکی دئاخێڤن، یانی ژ ئالیێ دەولەتێ ڤە سیاسەتا ئاسمیلاسیۆنێ ب ئاوایەکێ سەرکەفتی بەردەوام دکەت و دەولەت د ڤێ دەربارێ دا گھایە ئارمانجا خوە.

دەما مرۆڤ دبێژیت کو کوردستان بچووک بوویە بەحسا ڤێ راستیا ھەیی دکەت. ئەگەر ئەڤ راستیە بەربچاڤ نەیێن گرتن، هیچ ئالیەکێ سیاسی نکاریت بەرنامەیەکێ راستەقینە بدەتە پێشییا خوە. ئەم راستیا خوە ببینین و ل گۆرا وێ تەڤبگەرین.

ژ ئالیەک دی ڤە دەما بەحسا “چارەسەریا” پرسا کوردان ل ترکیا و باکورێ کوردستانێ دهێتە کرن، پێوستە ئالیێن کورد د ڤێ دەربارێ دا پرۆژەیێن خوە پێشکەش بکەن.

نێرن/شرۆڤە/رۆژەڤا کورد