ژ کۆبانێ کوشتی و ژ درەوکەرێن قەندیلێ بێدەنگی!

ژ کۆبانێ کوشتی و ژ درەوکەرێن قەندیلێ بێدەنگی!

مەمەت مێردینی

بەرپرسێن پەکەکێ فێر بوونە، هەر دەما کو گەریلایەکێ وان یان بەرپرسەکی وان یێ دیار د ناڤا هەرێما کوردستانێ دا ژ ئالیێ بالەفرێن ترکیێ ڤە دهێتە ئارمانجکرن، راستەراست پەدەکێ و حکوومەتا هەرێما کوردستانێ تاوانبار دکەت، پەکەکە هەردەم دبێژیت دەستێ پەدەکێ د پێدانا کۆردیناتا ب سازیا ئیستخباراتا ترکیێ هەیە و ئەو هەڤکارێ دەولەتێ یە، لێ دەما د ناڤا هەرێمێن د بن دەستهلاتا پەکەکێ و هەڤالبەندێن وێ دا کەسەکێ وان دهێت کوشتن، پەکەکە کۆرە و لال دبیت و چ داخویانیان نادەت، هەر وەک چ تشتەک روونەدای خوە ژ دەرکرنا داخویانیا دوور دگریت.

ئەڤ کارێ بێ ئەخلاق یێ کو پەکەکە گەلەک جاران دوبارە دکەت، هندە هاتیە دوبارەکرن کو ئێدی ئەو ب خوە باوەر ژ دەرەوێن خوە دکەن، تەڤی کو دزانن پەدەکێ هیچ پەیوەندیەک پێڤە نینە ژی لێ ژ بەرکو هەردەم دوبارە دکەن داکو گەلێ کورد پێ بخاپینن، نها ئەو ب خوە درەوا خوە باوەر دکن!

پەکەکە د ڤێ مژارێ دا ب ئاوایەکی بێ ئەخلاق بوویە کو گەر کادرۆیەکی وان یێ د ئاستا ژۆر دا ب نەخوەشیێ یان ژی ب دەستێ وان ب خوە جانێ خوە ژ دەست بدەت، راستە راست پەدەکێ تاوانبار دکەت، ئەڤ یەک د ڤێ دەما داویێ دا گەلەک جاران ژ لایێ رێڤەبەرێن پەکەکێ یێن وەکە بەسێ هۆزاتا گەنی و مستەفا کاراسوو یێ گێژ کو راست و چەپێن خوە ژێک جودا ناکەت هات دوبارە کرن، بەسێ هۆزاتا گەنی د داوی داخویانیا خوە دا راگهاند، 90% ژ وەنداهیێن پەکەکێ ب سەدەما وان کۆردیناتانە یێن پەدەکە ددەت میتا ترکیێ، کاراسوو یێ گێژ ژی گەلەک جاران پەدەکە ب پیدانا کۆردیناتان ب دەولەتا ترکیێ سووچدار کریە و دبێژیت، ژ بەرکو ئەڤ هەرێم د بن دەستهلاتداریا پەدەکێ دا نە، ئەو بەرپرسیارە ژ وان ئێریشێن ل سەر گەریلا و کادرۆیێن مە تێن کرن، لێ بەلێ یا راست هەرێمێن رایەدارێن پەکەکێ قالا وان دکن نە ب تەنێ د بن دەستهلاتداریا پەدەکێ دا نینە، بەلکو د د بن دەستهلاتداریا پەکەکێ ب خوە دا نە و ب “هەرێمێن پاراستنا مەدیا” تێن بناڤ کرن، پەکەکە خوە رێ نادەت چووچک ل وان هەرێمان ب ئازادی بفرن، رێ نادەت و نەدایە هەیا نها یەک سڤیل بچیت وان هەرێمان، ئەڤجا پەدەکە چما بەرپرسیار تێ نیشاندان؟! ڤێ پرسێ ب تەنێ یەک بەرسڤ هەیە ئەو ژی ئەڤە کو پەکەکە ب ڤێ یەکێ دخوازیت پەدەکێ د ناڤا گەلێ کورد دا بشکێنیت و تێکچوون و بێ ئەخلاقیا خوە پێ ڤەشێریت.

ئەم باسی وان کەسان ناکن یێن کو پێش نها د ناڤا پەکەکێ دا ب دەستێ پەکەکێ ب خوە هاتنە کوشتن و تەسفیەکرن، ئەم باسی دیرۆکا قرێژی یا پەکەکێ ناکن کو تێدا ب سەدان کادرۆیێن خوە ب ئاوایێن جودا تەسفیە کرنە، بەلکو ئەم دێ باسی ئیرۆ کن، ئەم دێ ژ پەکەکێ و رایەدارێن وان کو مینا بەبەغایان ب تەنێ دزانن ئاخافتنێن خوە دوبارە بکن دپرسین، گەلۆ گەر ل هەرێمێ پەدەکە بالادەست بە لەوما هوون پەدەکێ تاوانبار دکن، ل رۆژئاڤا کی بالادەست و دەستهلاتدارە کو ئیرۆ دو ژ رێڤەبەرێن وە ل وڕ هاتنە کوشتن و دەنگێ وە تونە؟!

تەڤی کو تەڤ سازیێن ئەولەهی و مەدەنی ل رۆژاڤا کوردستانێ د دەستێ پەکەکێ ب خوە دانە، لێ گەلەک جاران کادرۆیێن وێ یێن د ئاستا بلند دا تێن ئارمانجکرن، وەکە میناک، ئیرۆ رۆژا چارشەمێ 20ێ جۆتمەها 2021ێ، ئۆتۆمۆبیلا هەڤسەرۆکێ ئەنجوومەنا دادوەرییا جڤاکی یا رێڤەبەریا خوەسەر بەکر جەراد ل باژارێ کۆبانێ هات هەدەف کرن و ل گۆر داخویانییا ئاساییشا پەیدەێ-پەکەکێ، د ئەنجاما وێ ئێریشێ دا بەکر جەراد بریندار بوو و 2 ئەندامێن رێڤەبەرییا خوەسەر ب ناڤێ فارس مزی و حەمزە حەمزە ژی هاتن کوشتن. هەروه‌ها هەژمارەک سڤیلێن دن ژی بریندار بوون. گەرەک ل ڤڕ ژ قاراسوویێ گێژ و بەسێ هۆزاتا گەنی بپرسین، گەلۆ قەی کۆبانێ د بن دەستهلاتا پەدەکێ دا یە و پەدەکێ کۆردینات ب دەولەتا ترکیێ دانە، یان ئەڤ کارێ هەوە ب خوە یە؟! چما هوون د مەدیایا خوە یا درەین دا دەرناکەڤن و بەرپرسیاران ژ بۆ گەل ئەشکەرە ناکن؟! قەی ئینسان ئەڤ قاس بێ ئەخلاق و بێ روومەت دبیت؟! گەلۆ وەکە چەوا کادرۆیێن هەوە د ناڤا کۆبانێ و شنگالێ کو د بن دەستهلاتداریا وە دا نە هاتنە ئارمانجکرن ل ئامێدیێ و دوهۆک و هەولێرێ ژی کو د بن دەستهلاتا پەدەکێ دا نە هاتنە ئارمانج کرن؟! دڤێت هوون باش فێم بکن، ئێدی هوون نەما بکارن گەلێ کورد بخاپینن، ئێدی گەلێ کورد ژ درەوێن هەوە باوەر ناکەت و روویێ وە یێ راستەقینە ژ بۆی گەلێ کورد ئەشکەرە بوویە، ژ کەرەما خوە جارەک دی کو د ناڤا مەدیایا خوە دادەردکەڤن و درەوان دکن، پیچەکێ شەرم ژ خوە بکن، پیچەکێ حورمەتا خوە بگرن و بێ حورمەتیێ ب گەلێ کورد نەکن، ژ بەر کو نها هەر کەس مەعدەنێ وە دزانیت و دزانیت سەنگا هەوە چەندە.