گەلێ کورد، ژ دەما کو د دیرۆکێ دا، وەک دەولەت دەستھلاتدارییا ل سەر خاکا خوە وەندا کری، ژ ئالی ھێز و دەولەتێن بەربەر و داگیرکەر، راستی ئێریش، تالان، کوشتن، وێرانی، کۆچبەری، برچیبوون و پەریشانییێ ھاتیە. ھەتا ئیرۆ ژی ب گەلەک ئاوایان د ڤێ ھەرفاندن و فەلاکەتێ دا دژیت.
ئیرۆ پەکەکە، وەک پارتییەکا ئیلەگال و چەکدار، ھەدەپە ژی وەک پارتییەک لەگال و ب پەکەکێ ڤە گرێدایی و ھەمی پارتی، رێخستن، سازی و کۆمەلێن ب پەکەکێ ڤە گرێدایی دبێژن: ‘”ژ بۆ گەلێ کورد دەولەت خرابە، ئەم ل دژی دەولەتێ نە؛ ئەم دەولەتێن ھەیی ئالا، سینۆر و مەجلسێن وان قەبوول دکەین! لێ ئەم تێدکۆشین کو ڤان دەولەتان دەمۆکراتیزە بکەین!”
ئەم فەرز بکەین کو ب راستی ھندەک ئەندامێن ڤان پارتییان باوەر کربیت کودوێ دەولەتا ترک دەمۆکراتیزە کەن و گوھرینن(!) ئەڤ پارتی، بلا دەنگێ ھەموو کوردان و چەپگرێن دەمۆکرات بستینن، دێ کارن ژ سەدێ چەندێ ئەندامێن مەجلسێ ب دەست بینن؟ دێ کەنگی کارن، ب سەرێ خوە ببنە حکوومەت؟ دێ کارن رافەراندوومێ ل ئەنجامدەن و دەستووری بگوهرینن؟ دێ کارن ڤێ دەولەتێ ژ نەژادپەرەستان، چەتەیان و مافیا ڤەقەتینن، بکەنە دەولەتەکا دەمۆکراتیک و دادپەروەر؟
ھەتا ئەڤ دەولەتە ھەلنەوەشیت و ژ نوو دا ل سەر حەق و حقووق و پرەنسیپێن دەمۆکراتیک ئاڤا نەبیت، د ناڤا چەرخێن ڤێ دەولەتێ دا سییاسەتێ بکە و بێژە ئەز دێ ڤێ دەولەتێ ریفۆرم و دەمۆکراتیزە کەم، ئەڤە پەردەکرنا راستییێ یە! رێڤەبرێن ھەدەپێ ڤەکری دبێژن کو ‘”ئەم پارتییا تورکیا نە. ئەم ل گۆر یاسایێن تورکیا سییاسەتێ دکەین و ئەم وەک پارتی کاندیدێ رێڤەبرییا تورکیا نە!” ژ بۆ کو دەنگێ کوردان ژی دەست خوە ڤە بینن، خوە ل ناڤ کوردان ژی وەک پارتییەکا کوردی ددەن نیشاندان.
لێ ھەرکەس دزانیت کو دەولەتا ترک، ب ھەبوون و ھەموو یاسایێن خوە، دەولەتەکا نەژادپەرەست، یەکپەرەستە (یەک ئالا، یەک زمان، یەک ملەت) و ل سەر قڕکرنا گەلێ کورد ئاڤابوویە. قانوونا ئاساسی یا ئاڤاکرنا پارتییان، یا ھلبژارتنان و سۆندخوارنا پەرلەمانرتارا، ھەموو ل گۆر نیژادپەرەستییا ترک و ئینکارا گەلێ کورد و گەلێن دی سازبوویە.
د ڤێ رەوشێ دا، پارتییەک ل گۆر یاسایێن دەولەتا ترک بەشداری ھلبژارتنان ببیت و بچیتە مەجلیسا ترکیێ، ئەو پارتی یەکسەر دبیتە پارتییا دەولەتا مێتنکار و نیژادپەرەست. ژبەرکو کاندیدێن وێ پارتییێ کو ژ بۆ مەجلسا ترک تێنە ھلبژارتن، ژ بۆ کو بەلگەنامەیا ئەندامەتییا وێ مەجلیسێ بستینن، دڤێت دەستپێکێ سۆندا کو دێ دەولەتێ مەشرووع کەت، تەنێ دێ ژ بۆ نەتەوەیا ترک خزمەتێ کەت و دێ ب دەستوورێ کو نەژادپەرەستییا ترک دپارێزیت گرێدایی مینیت، ل سەر نامووس و شەرەفا خوە سۆند دخوەت. لۆما ئەو پەرلەمانتار، ئێدی نە پەرلەمانتارێ گەلی یە، لێ پەرلەمانتارێ وێ دەولەتێ یە. ژ خوە ژ لایێ گەل ڤە ھلبژارتن ژی دبیتە یاریا شانۆیا دەمۆکراسییێ.
“دەولەت ژ بۆ کوردان نە پێویستە. مەژیکێ کوردان تێرا دەولەتبوونێ ناکەت. دەولەت سیستەما زۆرداری، نەوەکھەڤی و خەرابییێ یە.” ئەڤ ئەنجامێ لێڤەدانێن پرۆپاگاندا ئیدەۆلۆژی یا مێتنکارێن نەژادپەرەست و زۆردارن کو ئارمانجا وان سەروەرییا خوە ل سەر نەتەوە و وەلاتێ کورد بدۆمینن. سەبەبا پەکەکە/ھەدەپە و ھندەک کوردێن دی کو دژی دەولەتابوونا کوردا ھەلوەستا وەردگرن ژی ل سەر ناڤێ کورد، ب ئالیکاری و خوینا زارۆکێن کوردان، کەتنە خزمەتا مێتنکاران؛ لگەل مێتنکاران دا کەتنە ھەولدانا کو چاوا ب لەز جڤاتا کورد ئاسمیلە و ئەنتەگرەیی ڤان نەتەوەیێن سەردەست بکەن و بێخنە خزمەتا دەولەتێن مێتنکار.
