هەر کو دەم پتر دەرباس دبیت، گەفێن ترکیێ ل سەر رۆژئاڤا کوردستانێ پتر دبن، ترکیا ب بەردەوامی هێزێن خوە یێن لەشکری ل سەر سینۆرێ رۆژئاڤا کوردستانێ ب گشتی و کۆبانێ و سەرێکانیێ ب تایبەتی زێدەتر دکەت و تەڤ ئامادەکاری ژ بۆی ئۆپەراسیۆنەکا لەشکری ژ بۆ پێکڤە گرێدانا هەرێمێن داگیرکری یێن رۆژئاڤایێ کوردستانی کرنە، ژ ئالیێ دی ژی پەکەکە هەر رۆژ ب دروشم و ئیستیفزازێن بەردەوام ئاگری گور دکەت و رێ ل بەر ترکیێ خوەش دکەت و بەهانەیان ددەتە دەست ئاردۆگان داکو گەفێن خوە بکەتە راستی و ئێریشی رۆژئاڤا کوردستانێ بکەت و تەڤ رۆژئاڤا وەکە عەفرینێ داگیر بکەت.

ترکیا هەبوونا پەکەکێ ل رۆژئاڤا ژ بۆی خوە فەرسەند دبینیت و دخوازیت ب ڤێ بەهانەیێ تەڤ رۆژئاڤا داگیر بکەت. یا راست یا کو پەکەکە ژی دخوازیت و رێیێ ژ بۆی خوەش دکەت هەر ئەڤە، ئەڤ یەک چ ب زانابوون بهێت کرن یان ژی ب نەزانین لێ راستیەکە و هەر کەس باش دزانیت و دبینیت. پەکەکە نە ب تەنێ ل رۆژئاڤایێ کوردستانێ بەلکو ل هەر چار پارچەیێن کوردستانێ بوویە پرا دەرباسبوونا ترکیێ ژ بۆی داگیرکرنا کوردستانێ، تەڤی ڤێ یەکێ کو د راگهاندنێ دا ل دژی هەڤ داخویانیان ددەن، جارنا شەری دکەن ژی، لێ بەلێ، ئەڤ یەک یەکئالی بوویە کو د ناڤبەرا پەکەکێ و ترکیا دا ژ بۆی جێبەجێکرنا “میساقا مللی” لهەڤهاتنەکا نهێنی هەیە.

پەکەکە ل رۆژئاڤا چ دکەت؟

پشتی شکەستنێن بەردەوام یێن پەکەکێ ل باکورێ کوردستانێ، ب تایبەت پشتی شەرێ خەندەکان و شکەستنا وێ یا لەشکری ل تەڤ هەرێمێن سینۆری یێن د ناڤبەرا باکور و باشوورێ کوردستانێ، پەکەکێ تەڤ گرانیا خوە یا چەکداری خستیە رۆژئاڤا و باشوورێ کوردستانێ و دخوازیت ڤان پارچەیان ژی رادەستی ترکیێ بکەت. پەکەکە ل رۆژئاڤا ل هەموو ناڤچەیێن سینۆری یێن لگەل ترکیا دا ئالایێ خوە و وێنەیێن عەبدوللا ئۆجالان دالقانیدنە و رۆژانە لایەنگرێن خوە ب وێنەیێن ئۆجالان و ئالایێ خوە دردخیت کۆلانان و ژ بۆی ئازادیا ئۆجالان و ل دژی ترکیا سلۆگانان ب وان ددەتە قیراندن، کەس نەزانیت پەکەکە ب خوە باش دزانیت، ئەڤ کارە نە د بەرژەوەندیا گەلێ کورد دانە، ئەڤ کارە ب تەنێ د بەرژەوەندیا ترکیێ دایە، ژ بەرکو ترکیا دێ ڤێ یەکێ کەت بەهانە و وەکە چەوا عەفرین و سەرێ کانیێ داگیر کری، کۆبانێ و دەڤەرێن دی ژی داگیر کەت. لێ بەلێ ژ بەر کو پەکەکە ژی ڤێ یەکێ دخوازیت و بوویە بەشەک ژ جێبەجێکارا ئەجیندایێن ترکیێ ل کوردستانێ، چاڤ و گوهێن خوە گرتنە و نە دخوازیت ڤێ یەکێ ببینیت و نەژی دخوازیت گوهداریا کەس یان ئالیەکێ کوردستانی بکەت.

تەڤ ئاماژە ژ بۆی ڤێ یەکێ دچن کو ترکیا دێ د دەمەک نێزیک دا ئێریشێ ئەنجام دەت، ژ بۆی ڤێ یەکێ ژی تەڤ ئامادەکاریێن خوە کرنە، لێ پەکەکێ ژ بلی پرۆپاگاندایێن دوبارە و دروشمەیێن هەر جار هیچ ئامادەکاریەک نەکریە، ب تەنێ داخویانیێن رێڤەبەرێن وێ یێن وەکە ئالدار خەلیل و دوران کالکان نەبن کو ئەڤ ژی ژ ئالیێ خوە ڤە وەکە ڤەخواندنا ترکیا بۆ رۆژئاڤا کوردستانێ تێن شرۆڤە کرن.

ل گۆر نەرینا چاڤدێرێن سیاسی ب تەنێ پەکەکێ دو رێ هەنە کو ل همبەر ترکیێ راوەستەیت، ئەو ژی ئەڤن:

• سیاسەتا خوە یا شاش ل رۆژئاڤا بگوهریت و کادرێن خوە ل رۆژئاڤا ڤەکشینەیت و رێڤەبەریا رۆژئاڤا رادەستی کوردێن رۆژئاڤا ب خوە بکەت و کارێن خوە یێن ئیستیفزازی وەکو دالقاندنا ئالایێ پەکەکێ، بلندکرنا وێنەیێن ئۆجالان و هاندانا لایەنگرێن خوە ب قیراندنا دروشمەیێن ل دژی ترکیا بدەت سەکناندن، ژ بەر کو ب درۆشمەیان و وێنەیێن ئۆجالان نە ئۆجالان دهێت رزگارکرن و نە ژی ئێریشا ل سەر رۆژئاڤا دهێتە پووچکرن، ب ڤی ئاوا دێ گەلێ کورد ل رۆژئاڤا کاریت خوە ژ ئێریشا ترکیێ بپاریزیت و ترکیا ژی چ بەهانەیەک نامینیت کو ئێریشی رۆژئاڤا بکەت.

• گەر پەکەکە کادرۆیێن خوە ل رۆژئاڤا نە ڤەکێشیت، پێدڤییە گەریلایێن خوە ل باشوور ڤەکێشیت و وان ژ بۆی شەرێ ل دژی ترکیا ل رۆژئاڤایێ کوردستانێ سەفەربەر بکەت، پەکەکە دکاریت وەکە چەوا ترکیێ لەشکرێ خوە ل سەر سینۆرێ رۆژئاڤا کوردستانێ زێدەکریە ئەوژی ب وی ئاوا چەکدارێن خوە یێن ل باشوورێ کوردستانێ بشینیت رۆژئاڤا و ل دژی ترکیێ شەری بکەت.

هەر کەس باش دزانیت هێزا پەکەکێ ل رۆژئاڤا کو ب پرانی ژ زارۆکێن رەڤاندی پێک دهێت نکاریت شەری ل دژی هێزەکا وەکە ترکیا کو ئەنداما ناتۆیێ یە و تەکنەلۆژیەکا هەری پێشکەفتی د دەستێ وێ دا هەیە، بکەت. پەکەکە ب سلۆگان، وێنەیێن ئاپۆ و ئالایێن رێخستنێ نکاریت شەرێ تانک، تۆپ، درۆن و بالەفرێن جەنگی یێن ترکیێ بکەت، ئەڤ یەک د ئێریشا ترکیا بۆ سەر عەفرینێ دا ب زەلالی هات دیتن.

ئەم باش فێم دکەین پەکەکە هیچ یەک ژ ڤان رێیان ژ بۆی پاراستنا رۆژئاڤا جێبەجێ ناکەت، پەکەکە دێ وەکە هەرجار، شەرەکی چەند رۆژی ب هندەک زارۆکێن کورد دەتە کرن، وەکە هەرجار دێ هندەک فیشەکان تەقینیت، ڤیدیۆیێن ئێریشێن پارتیزانی د گەریلا تیڤی دا پارڤە کەت، مەشان دەتە لدارخستن، داخویانیێن یەک ل پەی یەک بەلاڤکەت و د مەدیایا خوە دا باس ل قەهرەمانی و سەرکەفتنێ کەت، لێ بەلێ، ل داویێ دێ کۆبانێ و هەرێمێن دی ژی ژ بۆی ترکیێ ڤالا کەت و دیسا ب خوین کەد و قوربانیدانا کوردان بازارێ خوە یێ سیاسی کەت، تشتێ ژ بۆی پەکەکێ هەری گرینگ، لەیستن ب هەست و سۆزێن گەلێ کوردە، خوەیایە کو ژ بۆی پێکانینا ڤێ یەکێ ژی ئەو دیسا پیدڤی رژاندنا خوینا گەنجێن کوردە و دێ دیسا خوینا کوردان ب دەستێ ترکیا دەتە رژاندن و ئەردێ وان ژی ب دەست ترکیا ڤە بەردەت و ئەرکێ خوە یێ ئاژانتیێ ب دروستی جێبەجێ کەت.

گەلۆ چما پەکەکە چ یەک ژ ڤان دو رێیان ناپەژرینیت؟!

ل گۆر ئاگاهیێن د دەستێ مە دا، سێ مەهان پێش نها د نێڤبەرا سازیا ئیستیخباراتا پەکەکێ کو د بن فەرمانا جەمیل بایک دا کار دکەت و میتا ترکیا دا هەڤدیتنێن راستە راست هاتنە ئەنجامدان، د ڤان هەڤدیتنان دا پەکەکێ و ترکیێ رێکەفتن کریە کو وەک چەوا پەکەکێ ل باشوورێ کوردستانێ ب کووراتیا 30 کیلۆمەتران رێ ل همبەر لەشکرێ ترکیێ ڤەکریە، ب وی ئاوا ژی ل رۆژئاڤا رێ ل بەر ئارتێشا ترکیێ ڤەکەت دا کو ترکیا بکاریت هەرێمێن زێدەتر داگیر بکەت. ل همبەر ئەنجامدایینا ڤێ یەکێ ژ ئالیێ پەکەکێ ڤە، ترکیا ژی دێ گڤاشتنێن خوە یێن ل سەر هەدەپێ ژ بۆی هلبژارتنێن پارلامانتۆیا ترکیێ کێم کەت. ب ڤێ یەکێ پەکەکە دێ ب دو شێوازان مفادار بیت، ژ ئالیەکێ ب قوربانیکرنا گەنجێن کورد دێ وەکە هەرجار خوینا وان جوانان ژ بۆی پرۆپاگاندایێن خوە یێن سیاسی و پاراستنا بەرژەوەندیێن ریخستنێ بکار ئینیت، ژ ئالیەکێ دی ڤە دێ کاریت ئالیکاریا باسکێ خوە یێ سیاسی ل باکورێ کوردستانێ کو هەدەپەیە بکەت کو د هلبژارتنێن ترکیێ دا دەنگێن زێدەتر ب دەست بینیت.