ئەندامێ کۆمیتەیا رێڤەبەرا په‌كه‌كێ دووران کالکان، ب بوونه‌یا نێزیکبوونا سالڤه‌گه‌را دامەزراندنا رێخستنێ، نڤیسەک ب زمانێ ترکی د مالپەرا په‌كه‌كێ – ئۆنلاین دا وەشاندییه، د ڤێ نڤیسێ دا کالکانێ وەکە هەر جار ل شوونا ڤەگۆتنا راستییان هن درەوێن دی کرن و هەر تشت بەرەڤاژی باس کر، یێن شۆرەشگەر ب خایین و یێن خایین ب شۆرەشگەر ب ناڤ کرن، یێ د زیندانێ تەسلیمی دەولەتێ بوویی وەکە بەرخوەدێر و یێ ب سەرکێشییا وی پارچەیەک ژ کوردستانێ ئازاد بووی و مافێ کوردان دپارێزیت و بەرخوەدانێ دکەت، ب کرێ گرتیێ دژمنان ب ناڤ کر، د ڤێ نڤیسا خوە دا کالکان چ شک و گومان نەهشتن کو ئه‌و کەسەک پڕ بێ ئەخلاقە و دوورە ژ ئەخلاقێ سیاسی.
کالکان گۆت: «ل سالا دەرباسبوویی سیستەما مۆدەرنیتەیا کاپیتالیستا گلۆبال کو پرسگرێکا کورد ئافراند، ستاتوکۆپەرەستییا نەتەوە – دەولەتا فاشیستا رۆژھلاتا ناڤین، نووکەری و خیانەتا کورد ب رەنگەکی ھەڤپار و پلانکری ئێرشی مە کرن».
ئەڤ ئاخافتنا كالكان ب تەنێ بەسە کو زارۆیەک کو هێژان ل خواندنگه‌هێ دخوینت بزانیت کالکان نە کەسەک سیاسی یە و نە ژی کوردە، ژ بەر کو هەر کەس دزانیت دیرۆکا پارچەکرن و ژ هەڤ ڤەقەتاندنا کوردان ژ بۆ دەمەکی دزڤریت کو هێژان چ باسی مۆدەرنیتەیا کاپیتالیستا گلۆبال نەبوو، دەما کوردستان هاتییە پارچەکرن هێژان بابکالکێن کالکان ل دەشتێن ئاناتۆلیایێ مژوولی چه‌راندنا بزن و چێلێن خوە بوون و هایا وان ژ کورد و کوردستانێ نەبوو، لێ کالکان وەک هەرجار دخوازیت دیرۆکێ بەرەڤاژی كه‌ت و دیرۆکێ ژ دامەزراندنا پەکەکێ یا ب دەستێ میتێ بده‌ته ناساندن.
تشتێ ژ هەموویان مەزنتر کو پەکەکە ب سالانە ئالیگرێن خوە و کادرێن خوە پێ رازی دکەت، گۆتنا «دخوازن مە ته‌سفییە بکه‌ن»، چاوا کو د ھەموو ر‌ژێمێن تۆتالیتار دا، پەیڤا «دژمنێن دەرڤە» تێ ب کار ئینان، پەکەکە ژی وەک وان رژێمان ھەول ددەت کو خەباتکار و ئالیگرێن خوە ل سەر ڤێ تێگەھێ ب مۆرال بكه‌ت.
دووران کالکان ژی د ئاخفتنا خوە دا، ھەمان تەئۆریا کۆمپلۆیێ «مۆئامەرێ» ھەمبێز کر و وەھا گۆت: «ئەشکەرەیە کو دخوازن رێبەر ئاپۆ و راستییا په‌كه‌كێ بێباندۆر بکه‌ن، بارزانی و ھەڤکارییا کورد هێشتا پتر لاواز بکه‌ن و ب تەمامی بێخن بن کۆنترۆلا خوە»، گەلۆ کالکان باسی کیژان راستییا پەکەکێ و رێبەرێ خوە دکه‌ت؟! باسی وێ راستیێ دکەت یێ کو ئەڤ رێبەر و پارتی چێکریێن دەولەتا ترکیێ نە، یانژی باسی ڤێ یەکێ دکەت کو ژ دەما ئەڤ رێبەر و پارتی هاتینه چێکرن بوونە شێرپەنجەیا ب گیانێ کوردستانێ ڤە؟!
ده‌وله‌تێ چ جاران نه‌خوا‌ستییه رێبه‌رێ كالكان بێباندۆر بكه‌ت
یا راست چ جاران دەولەتێ نەخواستییە نە رێبەرێ کالکان و نەژی پارتییا وی بێباندۆر بکه‌ت، رێبەر و پارتییا کو دەولەتێ ب خوە دروستکری چما دێ هێته بێ باندۆر کرن؟! گەلۆ قەی کارێ دەولەتێ ب ڤێ پارتیێ و ڤی رێبەری ب داوی بوویە کو بخوازیت وان بێباندۆر بکەت؟ نا چ جاران دەولەت ڤێ یەکێ ناکەت، ژ بەر کو یا نها پەکەکە بۆ دەولەتێ دکەت، دەولەت ب خوە نه‌شێت بۆ خوە بکەت، پەکەکە ل هەر چار پارچەیێن کوردستانێ بوویە پرەک بۆ دەرباسبوونا دەولەتێ بۆ ناڤا خاکا کوردستانێ، بوویە بەشەک ژ ئەجێندایێن دەولەتا کوورا ترکیێ و بوویە بەشەک ژ جێبەجێکەرێن «میساقا مللی»، دەولەتێ چ جاران نەخواستییە پەکەکێ و ئۆجالان بێباندۆر بکەت، ئەگەر پەکەکە ب خوە ژی بخوازیت خوە بێباندۆر بکەت ترکیه دێ یەکەم دەولەت بیت ل دژی ڤێ یەکێ بسەکنیت.
هەرکەس دزانیت دەولەت دخوازیت ب رێیا وان هن کەس و ئالیێن دی یێن شۆرەشگەر و ولاتپارێز بێباندۆر بکەت، ئەڤ یەک ژی نها ژ هەر دەمەکی دن پتر خوەیا دبیت.
کیژان رێڤەبەری کێر نەهاتییە؟
کالکان و رێڤەبەرێن پەکەکێ ب تەنێ ئێریشی کەسێن مینا «بارزانی» ولاتپارێز دکه‌ن، ئەو چ جاران ئێریشی کەسێن وەک ئاتاتورک، خومەینی و خامەنەئی، سەدام و ئەسەد ناکن کو ب هەزاران کورد ب دەستێن وان هاتنە قه‌تل كرن.
کالکان ب تەمامی روویێ خوە یێ قاییم و راست د ڤێ نڤیسا خوە دە ئەشکەرە کر، وی مەعدەنێ خوە خوەیا کر و پتر روویێ خوە یێ ترکچێتیێ و خیانەتێ کو د بن ماسکەیا کوردایەتیێ ڤە ڤەشارتبوو ئەشکەرە کر، وی ب ئاوایەکی پر بێ ئەخلاق باسی بارزانی کر، ب قاسی کو ئێریشی بارزانی و په‌ده‌كێ کری هن ئێریشی دەولەتا ترکیێ نەکر، هەلبەت ئەڤ نە تشتەک عەجێبە، کالکان و رێڤەبەرێن دن یێن وەکە وی د ناڤا پەکەکێ دا ب تەنێ ئێریشی کەسێن مینا بارزانی ولاتپارێز و کوردپەروەر دکن، ئەو چ جاران ئێریشی کەسێن وەکە ئاتاتورک، خومەینی و خامەنەئی، سەدام و ئەسەد و… هود ناکن کو ب هەزاران کورد ب دەستێن وان هاتنە کوشتن، ولاتێ کوردان داگیرکری و تەجاویزی ولاتێ کوردان دکه‌ن، کالکان و هەڤالبەندێن خوە گەر بخوازن ژی نکارن باسی ڤان کەسان بکه‌ن، ژ بەر کو ئەو وەکه وان حەیوانانه یێن کو د یەک کانیێ دا ئاڤێ ڤەدخوەن و ژ بۆی یەک ئارمانجێ تێدکۆشن.
کالکان د ئاخافتنا خوە دە گۆت: «رێڤەبەرییا بارزانی ب راستی ژی رێڤەبەریەکا کێر نەھاتییە، ھەلوەستا خوە ژ ھەڤکاریێ و خیانەتێ وەردگریت، هه‌ر چه‌نده کو کەرکووک و دەردۆرا وان ژ دەست ھاتییە ستاندن، سەرۆکاتییا وی ژی ژ ئالیێ ده‌وله‌تێن یه‌كبوویی و تركیێ ڤە ژ دەست ھاتییە ستاندن، ھەلوەستا مەسعوود بارزانی ھەلوەستا تەسلیمبوونێ و سەرتەونادنێ یە، ژ بۆ کو یا مایی د دەست خوە دا بھێلیت تشتا کو ژێ دهێته خواستن دکەت، تام وەک ئیخبارچییەکی خزمەتێ ژ فاشیزما ئاكه‌پێ – مه‌هه‌پێ را دکەت».
ب راستی ژی دڤێت مرۆڤی روویەک پڕ قاییم هەبیت کو بکاریت ب ڤی ئاوایی دوور ژ ئەخلاق بپەیڤیت، ئەم ناخوازن وەکە وی بپەیڤین، لێ جاران ناچار دبین وەکە وان بەرسڤێ بده‌ین، ژ بەر کو ئەو ب تەنێ د ڤی زمانێ ئاخىفتنێ دگه‌هن، وان تەڤ سنۆرێن بێ ئەخلاقییێ دەرباس کرنە و چ بێئەخلاقییەک نەمایه کو نەکری.
ئەم دێ ژ کالکان را ببێژین کیژان رێڤەبەری کێرنەهاتییە و کێ خیانەت ل پارتی، ولات و گەلێ خوە کر، ئەم دێ ژ وی را ئەشکەرە بکه‌ین کا کی یە تەسلیمی دەولەتێ بووی، ئەو و رێبەرێ خوە نە، یان ژی بارزانی؟.
ئەنجامێن هەر کارەکی خوەیا دکه‌ن کا کەسێ ئەو کار کری کەسەک کێرنەهاتییە یان ژی بەرەڤاژی، ب کورتی، بارزانی ب خەباتا خوە شییا سەرپەرشتییا شۆرەش و بەرخوەدانێن باشوور بکەت، ئەو شییا سەرکێشییا سەرهلدانێ بکەت و پا‌رچەیەکا کوردستانێ ب ئاوایه‌كێ پڕ سه‌ربلند و پڕ ب روومه‌ت ژ زۆرا داگیركه‌ران رزگار بکەت، پشترە په‌رله‌مانێ کوردستانێ ئاڤاکر، هلبژارتن دان کرن و حکوومەتا هەرێمێ پێكئینا، باشوورێ کوردستانێ کره رووگه‌هه‌ك ژ بۆ هەر کوردەکی، نها د بن دەستهلاتدارییا وی دا رێڤەبەرییا کو کالکانێ گێژ ب «رێڤەبەرییا کێرنەهاتی» ددەته ناساندن، ب هەزاران کوردێن پارچەیێن دن یێن کوردستانێ هەنە کو ژ بەر تەهدیدێن کالکان و ئەربابێن وی هەر تشتێ خوە ب جی هشتییە و ژ بۆی پاراستنا جانێ خوە، ژ بۆی ب دەست خستنا ئازادیێ و ژ بۆی ژیانەک ب روومەت بەرێ خوە دانە باشوور.
لێ گەلۆ، رێڤبەرییا کالکان و رێبەرێ وی چ ژ کوردان را کرییە؟ ئەو شیایینه ب تەنێ یەک بوهست ژ خاکا کوردستانێ رزگار بکه‌ن؟ ل هەر جهێ کو ئەو لێ بوونە نها ئارتێشا ترکیێ هەیە، ل هەر جهێ کو ئەو لێ بوونە وێرانکاری ل پەی خوە هشتییە، خەلک قەتل کرییە، شەرێ عەشیران چێکرییە، کارساز کوشتنە و رۆژنامەڤان وەندا کرنە، باژار وێران کرنە و گوند چوول کرنە، شەرێ خەندەکان و ڤالا کرنا گوندێن باکورێ کوردستانێ کو دکەڤن سەر سنۆرێ باشوور باشترین میناکن ژ بۆی رێڤەبەرییا کالکان و رێبەرێ وی.
ل رۆژئاڤایا کو نها ژی د بن دەستێ کالکان و رێبەرێ وی دا یە، هەر تشتێ کوردستانی هاتییە قەدەغەکرن، تەڤ سەمبۆلێن کوردستانێ وەک، ناڤ و ئالا کوردستانێ هاتنە قەدەغەکرن، ناڤێ کوردستانێ ل وێرێ ناهێته ب کار ئینان، رێ ب پارتیێن کوردی ناهێته دان خەباتێن خوە ل رۆژئاڤا بەردەوام بکه‌ن، سیاسی و رۆژنامەڤانێن رۆژئاڤا نکارن ل رۆژئاڤا کار بکه‌ن، لێ بەلێ دیسان کالکان وێ رێڤەبەریێ ب رێڤەبەرییەک ب کیرهاتی دزانیت!
گه‌ر كالكان مه‌ژیك هه‌به، وێ بزانه قالا كێ تێ كرن!
هەر کەس باش دزانیت یێ تەسلیمی دەولەتێ بووی و سەرێ خوە ژ دەولەتێ را تەواندی و خوه ل پشت دییا خوه یا ترك ڤه‌شارتی کی بوویە، هەر کەس دزانیت ئەو کەس ئەوە یێ کو رازی نەبووی ل دژی دەولەتێ ل بەر خوە بدەت و دەما ژ بۆی ڤەگەراندنا وی بۆ ترکیێ چووی ژ پاسەوانا خوە را گۆتی، ئەز «بەرخوەدانەک کلاسیک ناکم»، هه‌روه‌ها دەما سوواری بالەفرێ کری گۆتی: «ل من نەخن، دییا من ترکە، گەر دەرفەت ب من وەرە دایین ئەزێ خزمەتا ترکیێ بکم» كی بوو؟!.
یێ کو تەسلیمی دەولەتێ بووی و سەرێ خوە تەواندی ئەوە یێ کو ل دادگەها ترکیێ داخوازا لێبۆرینێ ژ دایکێن عەسکەرێن ترك کری، ئەو بوو یێ کو ژ بۆی پاراستنا خوە بەرێ چەکدارێن خوە دا مرنێ، ژ بۆی کو فێم بکی کەسێ تەسلیمی دەولەتێ بووی و سەرێ خوە تەواندی کی یە، پر میناکێن دن هەنە، لێ گەر دەرسە حەرفەک ب تەنێ بەسە، گەر هنەکێ مەژیکێ تە هەبیت دێ تو فێم بکی ئەم قالا کێ دکه‌ن.
بارزانی نە ب تەنێ تەسلیمی چ دەولەتێن داگیرکه‌ر نەبوویە، بەلکو سەرێ خوە نە ل بەر دژمنێن دەرەکی یێن وەکە ترکیێ و ئیران و سووریێ و ئیراقێ نەتەواندییە و نە ژی ل همبەر دژمنێن ناڤخوەیی یێن وەکە تە و رێبەر و پارتییا تە، د ره‌فه‌راندووما سەرخوەبوونا کوردستانێ دا هەر کەسێ ب چاڤێ سەرێ خوە دیت کو بارزانی تەسلیمی تو کەسی و ئالییان نه‌بوو و نابیت ژی.
کیژان تەجرید و کیژان ئه‌شکەنەجە؟!
ڤی رێڤەبەرێ پەکەکێ د بەشەکێ دی یێ ئاخفتنا خوە دا باسی تەجرید و ئه‌شکەنجەیا ل سەر رێبەرێ خوە کر، وی راگه‌هاند، «ئێریشان د سەری دا رێبەر ئاپۆ و په‌كه‌كه کرە ھەدەف، ل ئیمرالیێ رەوشا تەجرید و ئه‌شکەنجەیێ ھەری گران کرن«، ئەم ناخوان ل سەر ڤێ یەکێ پڕ درێژ بنڤیسن، ئەم دێ ب تەنێ ڤێ یەکێ ببێژن، گەلۆ کالکان باسی کیژان تەجرید و ئه‌شکەنجەیێ دکەت؟! گەر ئه‌شکەنجە ل رێبەرێ وی تێ کرن چما هەر کو دەم دەرباس دبیت پێتر زکێ وی مەزن دبیت؟! گەر تەجرید هەبیت چەوا دشێت ب تەلەفۆنێ ب برایێ خوە را بپەیڤیت، چەوا دشێت ل تەلەفزیۆنێ بنێریت و هایداری بوویەران ببیت؟! چەوا دشێت فەرمانان بۆ قه‌ندیلێ بهنێریت؟!! نە ب تەنێ رێبەرێ کالکان د بن تەجرید و ئه‌شکەنجەیێ دا نینە، بەلکو ئەو ل ئیمرالیێ ب رحەتی رازایە و ئەرکا خوە جێبەجێ دکەت، ڤیدیۆ و وێنەیێن ل ئیمرالیێ تێن پارڤەکرن، باشترین بەلگە نە ل سەر ڤێ ئاخفتنا مە.
کالکان پر ب روو قاییمی دبێژیت: «بەرخوەدانا ھەری دۆمدرێژ، ھەری واتەدار و خورتا دیرۆکا مە د ڤێ پێڤاژۆیێ دا ل ئیمرالیێ ھاتە ژیان كرن»، ئەڤ بێ ئەخلاقییەک دنە کو کالکان دکەت، یا راست بەرخوەدانا دیرۆکی و بەرخوەدانا واتەدار ئەو بەرخوەدان بوو کو گرتیێن کورد ل زیندانا ئامەدێ کری، لێ پشتی هندەک ژ وان سەربەست هاتنە بەردان و رازی نەبووین ببن کۆلەیێن ئۆجالان، هەر یەک ب ئاوایەکێ هات ته‌سفییەکرن، هن ژ وان هاتن ئینفاز کرن، هن ژ وان هاتن بێ روومەت کرن، هن ژ وان ژی هاتن بێباندۆر کرن و یێن مایی ژی وەکە کۆلەیێن سەردەما رۆما بۆ خوه دانه شۆغلاندن.
ئاخفتنا دووران کالکان بەرەڤاژی کرنا دیرۆکێ و رەد کرنا وێ یە، پێویستە کو ئەو دیرۆکەک گەلەک درێژ بینیته بیرا خوە، سەردەما باوەر کرن ژ کالکان و یێن وەکە وی ب سەرڤه چوویە، ئێدی گەلێ کورد شیارە و وان باش ناس دکەت و باوەر ژ درەوێن وە ناکەت.
