گەلەک ڤەکری دهێتە زانین کو بەرپرسێن پەکەکێ، د داخویانیێن خوە دا، ل چاڤێ مللەتێ کورد دنێرن و درەوان دکەن، دەما ل ھمبەر ڤان درەوان ئالیێن سیاسی، سیاسەتمەدار یان ژی رەوشەنبیر بێدەنگ دمینن، بەشەک ژ جڤاكی وه‌سا تێدگه‌ھیت کو ئەو راستیێ دبێژن، ھەروەھا پشتی دەمەکی بەرپرسێن پەکەکێ ب خوە ژی درەوێن خوه وەک راستییەکی دپەژرینن، سەدەما ڤێ یەکێ بێدەنگییا ئالیێن سیاسی یە، گەلۆ ما نە ئەرکێ ئالیێن سیاسی یە کو جڤاكا کوردی ل ھمبەر درەوێن په‌كه‌كێ بپارێزن؟
بەرپرسێ پەکەکێ دوران کالکان ب هەلکەفتا نێزیكبوونا سالڤەگەرا پەکەکێ نڤیسەک نڤسییە، د بەشەکا نڤیسا خوە دا دبێژییت: «بەرییا ھەر تشتی ب پەکەکێ رە کۆلەتی ب داوی بوو، ئازادی ب سەر کەت، دره‌و و شاشتی ژ ھۆلێ رابوو، راستی و راستەقینی سەروەر بوو، کەسایەت و جڤاکا کورد ھەر جورە پاشڤەرووییه‌ك ھەلوەشاند و گەھشت ئاستا ژیانەکا ئازاد و خودان ئیرادە، ل کوردستانێ د بن زۆردارییا قرکەری – میتنگەری – فاشیزمێ دا پێشی ل ژناڤچوونا نەتەوەیی ھاتە گرتن، ل سەر خەتا ئاپۆ دیرۆکا ژیان و ژ نووڤە ھەبوونا ئازاد یا گەلێ کورد ھاتە دەست پێ کرن، ل کوردستانێ ڤەژینەکا ئازاد و ژ نوو ڤە ئاڤابوونا راستەقینە دەست پێ کر.
ھەر مرۆڤەک کو رۆژەکێ ل کوردستانێ ژییا بیت ژی دزانیت کو کالکان دره‌وا دکەت، گەلۆ کەنگێ کورد ژ کۆلەتیێ ئازاد بوونە؟ د بنگەھێ خوە دا، پەکەکێ رامانا ئازادیێ ژ ناڤا کوردان راکرییە و جڤاكا کورد تەڤلیھەڤ کرییە و ھەر ل دژێ نرخێن نەتەوه‌یی شەر کرییە.
ب پەکەکێ دره‌و، شاشتی د ناڤا جڤاكا کورد ی دا بەلاڤ بوویە و باوەرییا مرۆڤان ب ھەڤ نەمایە، چ جاران ئەندامەکێ پەکەکێ نه‌شێت بەحسا ئیرادەیەک ئازاد بکەت، ژ بەر کو وان ئیراده‌یا خوە ب بەلگە رادەستی ئۆجالان کرییە، پەکەکێ چ پارچه‌یێن کوردستانێ ئازاد نەکرینە، تشتا کو د بن ئایدۆلۆژییا پەکەکێ دا وەک دەڤەرەک ئازاد د دەنه خویا کرن رۆژئاڤایێ کوردستانێ یە، ئەو ژی پەکەکە ھەول ددەت کو چەکدارێن خوە جارەکا دی بکه‌ته میلیشیایێن رژێما ئەسەد و ل دژێ کوردان شەری بکەن.
د ڤێ دەربارێ دا داخویانییا جەمیل باییک گەلەک ڤەکرییە و دبێژیت کو«پەکەکە نه‌شێت خیانەتێ ل ئەسەد بکەت» ل رۆژئاڤایێ کوردستانێ ناڤێ کوردستانێ و ئالا کوردستانێ قەدەغەیە، ڤێجا دێ مرۆڤ چەوا بەحسا پاراستنا نرخێن نەتەوه‌یی کەت!.
پەکەکێ زمانێ کوردی ب خەلکی دایه ژبیر کرن، کوردێن ژ پارچه‌یێن دی یێن کوردستانێ کو تەڤلی پەکەکێ بووین ھەموو فێری زمانێ ترکی بووینە، لێ دوران کالکان ب خوە ئەڤە 43 سالە فێری زمانێ کوردی نەبوویە، ئەڤجا دێ چەوا نرخێن نەتەوەیی پارێزیت؟
د بەشەکێ دی یێ نڤیسا خوە دا کالکان دبێژیت: «تێکۆشینا ئازادییا کوردستانێ ل سالا بووری ب بەرخوەدانا خوە ل جیھانێ گەلەک بەربەلاڤ بوو، ژ ئاسیایێ ھەتا ئەفریقا، ئەمریکا و ئەورۆپایێ چوو، گه‌هشتە ھێزێن چەپگر-سۆسیالیست، ژن و جوانان، کارکەر و کەدکاران، راستییا مە یا رێبەرتیێ ھەم ژ ئالیێ چالاکی و بەربەلاڤبوونا پاراستنان ڤە ئانکو ژ ئالیێ ھێزا فکری ڤە و ھەم ژی ب چارچۆڤەیا پێنگاڤا ئازادیێ یا رێبەر ئاپۆ ل ھەموو جیھانێ بەلاڤ بوو، ژ ئالیێ مرۆڤاھیێ ڤە ھاتە ناسکرن، ژ بۆ کو ئازادییا فزیکی تێکۆشین بوو تێکۆشینەکا جیھانی».
کالکان د کەشتییەکا خەیالی دا بەحسا ھندەک تشتا دکەت کو ئەو ب خوە ژی باوه‌ر ژێ ناكه‌ت، راستە ھەر دەم پەکەکە ب ئایدۆلۆژیەک چەپگرا دەستێ دویەم تەڤگەریایە و ئەڤ مسیبه‌تا هاتییە سەرێ گەلێ کوردستانێ ژی ژ ئەنجاما ڤێ ئایدۆلۆژییا خرابە، مادەم ژ ئاسیایێ ھەتا ئەفریقا ژ ئەمریکا ھەتا ئەورۆپا پەکەکێ جڤاك ئازاد کرنە، گەلۆ ژ بۆ چ گوندەک ل باکورێ کوردستانێ ئازاد نەکرییە.
دوران کالکان د بەشەکا دی یا نڤیسا خوە دا دبێژیت: «وەکە تەڤگەرا پەکەکێ ئەم بوون ئارمانجا ئێرشێن رێخستنی، پلانکری، ھەرێمی و گلۆبالێن ژ بۆ ژناڤبرن و تەسفییەکرنێ، ھێزا کو ئەڤ ئێرش ب رێ ڤە بری ژی فاشیزما ئاکەپێ – مەھەپێ یە، دیکتاتۆرییەکە ب ڤی رەنگی یا فاشیست ژی ھەول دا کو پەدەکێ وەک پارچەیەک ژ ئێرشێن خوە یێن پلانکری ب کار بینیت، نەخوە ئەو ژی پێ دزانن دەما کو پەکەکە نەبیت، لاواز ببیت ئەو ژی دێ ژناڤچن، دزانن کو ئێرش نە تەنێ ل سەر پەکەکێ یە، د سەری دا ل سەر کەرکووکێ ل سەر وانە ژی، دخوازن پەدەکێ پتر بکەن نووکەر، رێڤەبەر و جەنەرالێن ترکیێ ژی ئاشکەرا دکەن کو بۆ ڤێ ئارمانجێ ئه‌و نێزیكی كوردان دبن، ل سەر ڤێ مژارێ تشتەکێ کو ناهێته زانین نینە، ل گەل ڤێ ژی پەدەکە وەکو سەرەکێ ڤێ ئێرشکارییا فاشیست – قرکەر، دووڤەلنگێ وێ و چەنگێ وێ یێ پێشی تەڤدگەرە.
کالکان جارەکا دی ئێریشێ پەدەکێ دکەت و وان ب ھەڤالبەندییا دژمنی تاوانبار دکەت، گۆتنەکا کوردی دبێژیت «ناڤێ من ل تە کومێ من ل سەرێ تە» پەکەکە تشتێ كو دکەت لێ ل سەر پەدەکێ دکەتە مال.
د راستیا خوە دا پێویستە پەدەکە ھەر جارێ دره‌وێن پەکەکێ ئاشکەرا بکەت و راستییا ھەیی ب جڤاكا کوردی بدەتە فام کرن، دەما ئەڤ یەک نەهێتە کرن، دره‌و و بێبەختیێن پەکەکێ ل پەدەکێ دکەت د ناڤا بەشەکا مەزنا جڤاكێ دا راست دهێنە قەبوول کرن، ئەڤ یەک ژی زەرەرەک مەزن ل رێیا دەولەتبوونا کوردان و خەتا نەتەوه‌یی دكه‌ت.
ئەرکێ ھەر کوردەکێ نیشتیمانپەروەرە، ل ھمبەر دره‌وێن بەرپرسێن پەکەکێ راستیێ بێژیتە جڤاكێ، دەما نیشتیمانپەروەرێن کورد ڤێ یەکێ نەکەن، ب ئاوایەکێ بێ حەمدێ خوە دبن هاریکارێن دره‌و و دەزەنفارماسیۆنێن پەکەکێ.
رۆژەڤا کورد
