ئەندامێ کۆنسەیا رێڤەبەر یا که‌جه‌کێ سه‌بری ئۆک، دیسا د مەدیایا پەکەکێ دا دەرکەت و هنده‌ك نرخاندنێن وەکە خوە سڤک و بێ بوها کرن، سه‌بری ئۆک کو ژ ANFێ را ئاخڤی یە، وەکە هەر جار ب پەسنکرنا «لەهەنگێ ساختە یێ ل ئیمرالیێ رازایی» دەستپێکر و ب رەخنەکرنا ئاکەپێ و مەهەپێ بەردەوام کر و ب ئێریشا ل سەر پەدەکێ داخویانییا خوە ب داوی ئینا.
سه‌بری ئۆک، د داخویانییا خوە دا وەکە رایەدارێن دن یێن پەکەکێ کو ب تەنێ یەک تشتی دزانن و وەکە تووتیان دوبارە دکه‌ن ئاخڤی، وی باسی «تەجریدا ل سەر ئۆجه‌لان» کر و راگه‌هاند دڤێت هەر کەس ل دژی گڤاش و تەجریدا ل سەر عه‌بدوللا ئۆجه‌لان دەرکەڤیت و هەلوەستی نیشان بدەت.
سەبری ئۆک، ژ بیر کرییە کو ئێدی نە گەلێ کورد و نە ژی گەلێن دن یێن جیهانێ ب ڤێ ئاخفتنا سەدبارە یا وی و رایەدارێن دن یێن پەکەکێ باوەر ناکه‌ن، ژ بەر کو ئه‌و هەر تشتی ب چاڤێن خوە دبینن، گەل ئێدی ژ چاپەمەنییا پەکەکێ و دره‌وێن ڤێ رێخستنێ باوەر ناکه‌ن، ئێدی گەل چاڤ ڤەکری یە و د دەمەکێ کن دا دکاریت هەر ئاگاهییەکێ ب دەست بێخیت، گەل ئێدی ل تەڤ چاپەمەنیێ دنێریت، ل چاپەمەنییا کوردی و جیهانی دنێریت و دکاریت راستیێ ژ دره‌وێ جودا بکەت، گەل ئێدی وەکە خوەندکارێن دبستانێ نینە و سه‌بری ئۆک ژی نە مامۆستەیێ وانە کو هەر تشتێ گۆت باوەر بکه‌ن.
گەل باش دزانیت هەڤدیتنێن ئۆجه‌لان دگه‌ل پارێزەرێن وی نە تشتەکی پڕ زەحمەتە، هەر دەما ئۆجه‌لان و دەولەت بخوازن دکارن ڤێ یەکێ بكه‌ن، وەکە چەوا پێش نها كرییه، لێ بەلێ هێژان پێویستییا دەولەتێ ب وێ یەکێ نینه کو پارێزەر ئۆجه‌لانی ببینن و بریارێن دەولەتێ ب رێیا ئۆجه‌لانی و پارێزەرێن وی بگه‌هیننه پەکەکێ و ل دژی کوردستانێ بکار بینن، گەل باش دزانیت چ گڤاش چ ئه‌شکەنجە ل سەر ئۆجه‌لان نینه، گەر هەبایە زکێ ئۆجه‌لان ئەو قاس مەزن نەدبوو، دا وەکە زیندانیێن دیار بەکرێ کو ژ بلی کۆمەک هەستییان تشتەک دن ژ وان نەمابوو، بەرەڤاژی ئۆجه‌لان مینا سیخۆرەکێ دەولەتێ یە کو ژ بۆ بۆراندنا دەمێن خوە پشتی خانه‌نشینیێ ل گراڤەکێ دا رازایه و هەر دەما پیویستییا دەولەتێ ب وی هه‌بیت، دکاریت خوەیا ببیت و وان کارێن پێویست ئەنجام بدەت.
ئەندامێ کۆنسەیا رێڤەبەرا كه‌جه‌كێ سه‌بری ئۆک گۆت: «تێ گۆتن، دیرۆک رۆژا مەیە، رۆژا مە ژی پاشەرۆژە»، ئەڤ یەک نرخاندنەکا راستە، چ تشتک تەنێ ب رەوشا ھەیی نابیت بهێته نرخاندن، دەولەتا ترک یا داگیرکەر رابردوویه‌ك ل دژی کوردان ھەیە، دەولەتا ترک د ھەر قۆناغه‌كا دیرۆکێ دا دژمناتی ل کوردان کرییە، ئەڤ پۆلیتیکا پۆلیتیکایا قڕکرنا جڤاکی، دارڤە کرن، سرگوون و ئاسیمیلاسیۆنێ یە».
ل ڤێرێ ئەم ژ سەبری ئۆک دپرسین، گەلۆ گەر هوون ڤێ یەکێ فێم دکه‌ن، چما هوون دبێژن ئەم ناخوازین دەولەتا ترکیێ توونە بکه‌ین؟، چما هوون دبێژن ئەم دخوازین د ناڤا ترکیێ دا دەمۆکراسیێ بەر ب پێش ببه‌ین؟ گەلۆ دەولەتەکا وەکە ترکیێ دژمن، دەولەتەک کو بۆ خوینا کوردان تێهنی بیت، ل سەر خوینا کوردان هاتبیتە ئاڤا کرن، ب سەدان جینۆساید ل دژی گەلێ کورد کربن، دەولەتەکێ کو پۆلیتیکایا قڕکرنا جڤاکی، دارڤەکرن، سرگوون و ئاسیمیلاسیۆنێ ل دژی کوردان بکار بینیت، هوون دێ چەوا دەمۆکراتیک بکه‌ن؟ قەی هوون وه‌سا دفکرن کوردان مەژیێ کەر خوارییە کو باوەر ژ ڤێ دره‌وا وە بکه‌ن؟! نا سه‌بری نا، ترکیە دەولەتەک دژمن دیکتاتۆر و فاشیزمە، ئاکەپە و مەهەپە دەستهلاتدار بن یان ژی هەدەپە – پەکەکە و جەهەپە، دێ هەر ب ڤی ئاوایی دەولەتێ برێڤە به‌ن، هوون ژی ب درووشما «براتییا گەلان» یا ساختە بووینە بەشەک ژ ڤی پرۆژەی، چ جاران کوردەکێ ب شەرەف، کوردەکێ خوه‌دی نامووس، کوردەکێ نشتیمانپەروەر نكاریت دگه‌ل ترکەکی ببیته برا، جوداهییا د نێڤبەرا کوردەکی و ترکەکی وەک جوداهییا د نێڤبەرا ئەرد و ئاسمان دا یە.
سه‌بری ئۆک هەقارەتێ ب شێخ ئەحمەد بارزانی و شێخ عەبدوسەلام بارزانی دکەت
سه‌بری ئۆک د بەشەکێ داخویانیا خوە دا دبێژیت، «کەکێ شێخ ئەحمەد بارزانی، شێخ سەلام سالا 1914ێ ژ ئالیێ دەولەتا ئۆسمانی ڤە ھاتە دارڤە کرن، دەولەتا ترک سالا 1933ێ شێخ ئه‌حمەد بارزانی ژی رادەستی دەولەتا ئیراقێ کر، دەولەتا ئیراقێ ژی ئەو ل مووسلێ زیندان کر».
ئەڤ ئاخفتنا سه‌بری ئۆک رووقاییمی و بێ ئەدەبییا وی دیار دکەت، باش خوەیایە کو دخوازیت هەقارەتێ ب ڤان دو نشتیمانپەروەرێن کورد بکەت، گەر نا کەسەکێ وەکە سەبری ئۆک چەوا دکاریت ناڤێ دو ژ سەرۆکێن کورد یێن هەری دیار ب ڤی ئاوایی ب ناڤ بکەت و ژ وان را ببێژیت «کەک»! و ب ڤێ شێوازی ب ناڤ کرنه، ئه‌و ژ ئالییەکێ دخوازە خوە بلند بکەت و ببیته ژ رێزا وان کو ب چ ئاوایی ئەو نە ب تەنێ ل رێزا ڤان دو لەهەنگ و سەرۆکێن کوردان نینە، بەلکو سەد سالێن دن ژی بژی ناگەهە توزا د بن لنگێن ڤان دو سەرۆکان دا.
چما ئەم دبێژن پەیڤا «کەک» وەکە هەقارەت کرن ب کار ئینایه؟
ژ بەر کو چ جاران ژ بۆی ئۆجه‌لان ئەڤ یەک بکار نه‌ئینایه، د دەمەکی دا کو تەڤ تەمەنێ خوە ڤان دو کەسان بەرەڤاژی ئۆجه‌لان، ژ بۆی کورد و کوردستانێ خەبات کرییە و جانێ خوە فەدا کرییە.
فاشیزما ئاكه‌پێ – مه‌هه‌پێ و فاشیزما پەکەکێ
سه‌بری ئۆک گۆت: فاشیزما ئاكه‌پێ – مه‌هه‌پێ دبێژیت: «بلا په‌كه‌كه ژ رۆژئاڤا دەرکەڤیت، ئه‌و سەدەما نەئارامیێ یە، په‌ده‌كێ ژی ب ھەمان رەنگی گۆت ھەتا کو په‌كه‌كه ل رۆژئاڤا هه‌بیت تێکلیێن مە دگه‌ل رۆژئاڤا سه‌رراست نابن»، فاشیزما ئاكه‌پێ – مه‌هه‌پێ دبێژیت: ئه‌گەر په‌كه‌كه نەبیت مه چ كار ل باشوور نینن، په‌ده‌كه ژی دبێژیت، سەدەما داگیرکەرییا دەولەتا ترک یا ل باشوور په‌كه‌كه یه، مەژی، زمان، ئووسلووب و ھەلوەست وەکە ھەڤە».
ها ئه‌مێ بزانن مەژی، زمان، ئووسلووب و هەولەستا کێ وەکە یا ئاکەپێ و مەهەپێ یە!! د سەری دا سه‌بری ئۆک دره‌وان دکەت و ب چ ئاوایه‌كی پەدەکێ نەگۆتییە، «ھەتا کو په‌كه‌كه ل رۆژئاڤا هه‌بیت تێکلیێن مه دگه‌ل رۆژئاڤا ناهێن سه‌رراست كرن»، ئەڤ ب تەنێ دره‌وەکە، وەکە دره‌وا کوشتنا 5 گەریلایان ژ ئالیێ پێشمەرگەی ڤە ل خەلیفانێ!، نە پەدەکێ ئەڤ یەک گۆتییە و نە ژی 5 گەریلا ل خەلیفانێ هاتینە کوشتن کو پەکەکە ئەڤ قاس دوبارە دکەت، سەدەما دوبارەکرنا ڤان دره‌وان ژ هێلا پەکەکێ ڤە ب تەنێ ژ بۆ یەک مەبەستە، ئەو ژی ئەڤە کو ب وان دره‌وان ب خه‌لكی بده‌ته باوه‌ر كرن.
هاریكاریێن به‌رده‌وام یێن حكوومه‌تا باشوورێ كوردستانێ، په‌ده‌كێ و ده‌زگه‌ها خێرخوازی یا بارزانی د ده‌مێن ته‌نگاسیێ دا ژ بۆ رۆژئاڤا كوردستانێ و رێڤه‌به‌رییا وێ، باشترین به‌لگه‌یه ژ بۆ ئیفشا كرنا ڤێ دره‌وا سه‌بری ئۆك یا كو دبێژیت په‌ده‌كێ گۆتییه ئه‌م تێكلیێن خوه ب رۆژئاڤا را سه‌رراست ناكه‌ین هندی په‌كه‌كه ل وێرێ به، قه‌ی هاریكاریێن د ده‌ریێ سێمالكا را دگه‌هن رۆژئاڤا ما نه ژ حكوومه‌تا باشوور و په‌ده‌كێ یه؟ قه‌ی كی بوو تاقیگه‌هێن ته‌ستێن كۆرۆنایێ ژ بۆ باشوور و رێڤه‌به‌رییا خوه‌سه‌ر شاندین، ما نه سه‌رۆكێ باشوورێ كوردستانێ بوو؟ قه‌ی كی یه ب ده‌هان جاران ده‌زگه‌ها خێرخوازی یا بارزانی شاندییه رۆژئاڤا ما نه په‌ده‌كه و حكوومه‌تا باشووره؟ ما ده‌ریێ سێمالكا نه ته‌كانه رێیا وه‌یه، ما هه‌گه‌ر ئه‌ڤ ئاخافتنا سه‌بری راست به، چما ده‌ریێ سینۆر ده‌وام ڤه‌كرییه و ده‌وام هاریكاری، تجاره‌ت و هاتنوچوونێ ل نێڤبه‌را باشوور و رۆژئاڤا تێده ده‌رباس دبیت.
پەکەکە فێر بوویە ڤێ یەکێ، ب درێژاهییا دیرۆکا خوە دره‌و کرنە و دره‌وێن خوه دوبارە کرنە هەتا گه‌هشتییه ئاستەکی کو کوردان پرانییا دره‌وێن وێ باوەر کرن، لێ بەلێ نها سەرەدەم جودایە، ئێدی چاڤێن گەل ڤەکرینە و ل شوونا بریاردان ب هەست و عاتیفێ ب مەژیک و چاڤێن خوە بریارێ دده‌ن و هەر تشی فێم دکن، گەل ب ئاوایەکی تێگهشتییە کو ئێدی پەکەکە نە ب دوبارەکرنا دره‌وان بەلکو ب سەدبارە کرنا دره‌وان ژی ناهێته خاپاندن، ب کورتی ئەم دکارن ژ پەکەکێ را ببێژین، ئەو وارە، لێ نە ئەو بوهارە، هوون ئێدی نکارن ب دره‌وان گەل بخاپینن.
یا راست پەکەکە كۆپیه‌یه‌كه ژ فاشیزما ئاکەپێ – مەهەپێ، ئه‌ڤه رێخستنه ژ هه‌ر ئالییه‌كی ڤه، تام وه‌كه ڤان دو پارتیێن تركه، ئه‌و ژ دەرڤەی خوە چ کەس و پارتییەکێ قەبوول ناکه‌ن، هەقارەتێ ب هەر کەس و ئالی دکه‌ن، خوە ب تەنێ ب پارێزەرێن ترکیێ دده‌ن ناساندن، دیرۆکا ترکیێ ژ پەیدابوونا خوە دده‌ن دیار کرن، گەر بکارن دێ هه‌موو پارتیێن دن ژ ناڤ به‌ن، تەرۆرێ دکه‌ن و رایێن جودا قەبوول ناکه‌ن.
پەکەکە ژی ب ڤی ئاوایی یە، تەڤ پارتیێن کورد ب خائین و تەڤ سەرکردەیێن کورد ب کرێگرتیێن ئیمپریالیزمێ و کەڤنەشۆپیێ ب ناڤ دکەت، دیرۆکا کوردستانێ یا هەزار سالی تونە دکەت و ژ دیرۆکا دامەزراندنا خوە یا 43 سالی حەساب دکەت، ل دژی تەڤ پارتی و سەرۆکێن کورد تەڤ دگەریت و داخویانیان ددەت، شەرێ تەڤ پارتیێن کورد کرییە، ل هەر دەرا دەستهه‌لاتا وێ هه‌بیت رێ نادەت چ هزر و پارتییەک دن، ل باشور و وان ناڤچەیێن ب «هەرێمێن پاراستنێ یێن مەدیا» ب ناڤ کری رێ نادەت خه‌لك بچیت و گوندێن خوە ئاڤەدان بکەت، ل رۆژئاڤا تەڤ پارتیێن کورد یێن ژ دەرڤەی سیاسەتا پەکەکێ ده‌رێخستنه و رێ ب وان نادەت چالاکیێن خوە یێن سیاسی ئەنجام بده‌ن، ب سەدان رۆژنامەڤانێن کورد گرتینە، ب سەدان کادرێن ئەنەکەسێ گرتنە، کوشتنە و وەندا کرنە، ئەم دپرسین گەلۆ قەی ئەڤ نە فاشیزمە؟ ئەڤ فاشیزما پەکەکێ چ جوداهی ل گەل فاشیزما ئاکەپێ – مەهەپێ هەیە؟ ب راستی ژی چ جوداهی د نێڤبه‌را وان دا نینه.
