مه‌زلووم عه‌بدی راستگۆیه‌، یان ژی تەنێ رۆلا پۆلیسێ باش دگێڕیت؟

Mazloum Abdi-pkk-ypg-hsd-qsd-tak-pyd-semalka-enks

ئالیگرێن پارتییێن د بن سەیوانا ئه‌نه‌كه‌سێ ڤە، یێن کو دخواستن رۆژا ئالایێ کوردستانێ پیرۆز بکه‌ن، راستی هێرشا رێخستنا «جوانێ شۆرەشگەر» یا سەر ب په‌كه‌كێ ڤە هاتن، ب دار، به‌ر و مۆلۆتۆفان هێرش کرن و ئۆفیسا ئه‌نه‌كه‌سێ یا ل دربێسیێ ژی سۆتن.

ژ ده‌مژمێرێن ده‌ستپێكێ، گه‌لێ كورد كارڤه‌دانێن جددی ل سه‌ر بوویەرا قرێژ نیشان دان، دهاته‌ هیڤی کرن کو ئه‌ڤ كارڤه‌دانه‌ زێده‌تر بن، لێ مه‌زلووم عه‌بدی ب داخویانییەکێ كو ل سەر ئه‌كاونتێ خوه‌ یێ تویته‌ری بەلاڤکر، بوویەر شەرمەزار کر.

د داخویانیێ دا مه‌زلووم گۆت: «بەری هەر تشتی ئەم هزر دكه‌ین، هێرشێ رێڤەبەرییا خوەسەر و کۆنترۆلا هێزێن ئێمناهیێ یا هەرێمێ هەدەف كرییه‌، شەرمەزار دکه‌ین».

كه‌نالێ «رووداو» کو ل هەولێرێ وەشانا خوە دکەت، سەرێ هەر ده‌مژمێرێ داخویانییا مه‌زلووم عەبدی به‌لاڤ دكر و وەک پێشکەتنەکا مەزن و ئەرێنی نیشان ددا.

د سه‌ر ڤان هەولدانێن رووداوێ ژی دا، پرسا «ئه‌رێ مه‌زلووم عه‌بدی د شەرمەزار کرنا ڤێ بوویەرێ دا ژدلە، یان ژی ژ بەر هنده‌ك ئه‌گه‌ران نەچار ما کو ڤێ یەکێ ببێژیت؟» د مەژیێ کوردان دا ب دوماهی نه‌هات.

ما جوانێن شۆرەشگەر دشێت سەربخوە ته‌ڤ بگه‌ریت؟

«جوانێن شۆرەشگەر»، نەرێخستنەکا سەربخوەیە، وێ جهێ خوه‌ د ناڤا سیستەما په‌كه‌كێ دا هه‌یه‌، ژ بەر کو ئەو کارەکی گرنگ دكه‌ن، وەک گرتنا شەرڤانان و کۆمکرنا ئاگاهیێن ئیستخباراتی، له‌وما ژی کارێ ڤێ رێخستنێ نە کارەکێ نۆرمالە، ژ بۆ په‌كه‌كێ كاره‌كێ گه‌له‌ك گرنگە و د ڤی كاری دا چ ڤالاهییان ناهێلیت، بەرێ ژ ئالیێ موراد قارایلان ڤە هاتییە برێڤه‌برن، لێ نها ژ ئالیێ جەمیل باییک ڤە دهێته‌ برێڤەبرن، هەروه‌ها ئەڤ رێخستنه‌ راستەراست د ناڤا كۆمیته‌یا په‌كه‌كێ یا رۆژئاڤا دا یه‌ و د هەمان دەمی دا، د ناڤا مه‌یدانا سیاسی یا رۆژئاڤا دا خودان جهەکێ گرنگە.

ب کورتی رێخستنا «جوانێن شۆرەشگەر»، نه‌شێت ل دووڤ سه‌رێ خوە گاڤان بهاڤێژیت، یا راست د ناڤا په‌كه‌كێ دا چ کەس ل دووڤ سەرێ خوە نه‌شێت ڤان کریاران بکەت، میناک TAK، دەما کو په‌كه‌كە ناخوازیت بەرپرسیاریا هنده‌ك بوویەران هه‌لگریت، وێ ب کار دئینیت، «جوانێن شۆرەشگەر، YPS، زارۆکێن ئاگری و … هتد، د بن ڤان ناڤان دا رێخستنێن نیڤ له‌شكه‌ری هەنە.

سۆتنا ئۆفیسا دربێسیێ، هێرشا ل سەر کەسێن كو پیرۆزباهییا ئالایێ کوردستانێ دکرن و هێرشا دەریێ سێمالکا، بریارا کۆمیتەیا په‌كه‌كێ یا رۆژئاڤایە.

شەرمەزارکرنا مه‌زلووم عه‌بدی، یا سۆتنا ئۆفیسا ئه‌نه‌كه‌سێ رێبازەکا کەڤن یا په‌كه‌كێ یە، رێڤەبەرییا «جوانێن شۆرەشگەر» د ناڤا کۆمیتەیا په‌كه‌كێ یا رۆژئاڤا دایه‌، هه‌مان رێڤه‌به‌رییا كو مه‌زلووم عه‌بدی ژی د ناڤ دا یە.

مه‌زلووم عه‌بدی هەر حه‌فتی دگه‌ل رێڤەبەرییا «جوانێن شۆرەشگەر» كۆم دبیت

هێرشا «جوانێن شۆرەشگەر»، یا ل سەر دەرییێ سێمالکا، هێرشا ل دژی پیرۆزباهییێن رۆژا ئالایێ کوردستانێ و سۆتنا ئۆفیسا ئه‌نه‌كه‌سێ، ئەڤ چالاکییه‌ هەموو ژ ئالیێ كۆمیته‌یا په‌كه‌كێ یا رۆژئاڤا بریار ل سه‌ر هاتینه‌ دان، ژ بەر ڤێ یەکێ هەولدانێن مه‌زلووم عه‌بدی، یێن وەکه‌ کو ئاگاهییا وی ژ بوویەرێ نینه‌، تەنێ دو روویاتی یه‌.

ئەڤ هێرشه‌ ب بریارا مه‌زلووم عه‌بدی هاتینە کرن، هەولدانێن كه‌نالێ رووداوێ ژی کو مه‌زلووم عه‌بدی بێگونەهـ دەربێخیت، تێرا گوهارتنا ڤێ راستییێ ناکەت.

ئەڤ بوویەره‌ هەلوەستا په‌كه‌كێ یە، په‌كه‌كە و کادرێن وێ یێن ل رۆژئاڤا، ژ بۆ بوویەرەکا کو چ په‌یوه‌ندییا خوە ب حکوومەتا هەرێما کوردستانێ ڤه‌ نینە، ئه‌ڤه‌ 70 رۆژن ژن و عەرەب ل بەر دەرییێ سنۆرێ پێشابوور – سێمالکا بجهـ كرینه‌ و هەر رۆژ زماندرێژیێ ل سەر په‌ده‌كێ و مالباتا بارزانی دکه‌ن، پشترە رێخستنا جەحش یا ب ناڤێ «جوانێن شۆرەشگەر»، دو رۆژان د مه‌شن و هێرشی دەرییێ سێمالکا یێ هەرێما کوردستانێ دکەن.

هەر ئەندامه‌کێ رێڤەبەریێ خودام رۆلەکێ جودایە

مه‌زلووم عه‌بدی، سۆتنا ئۆفیسا ئه‌نه‌كه‌سێ شەرمەزار دکەت، لێ هێرشا ل سەر ئالایێ کوردستانێ نابینیت، د راستیێ دا تشتێ کو پێدڤی بوو هاتبا شەرمەزارکرن، نە تەنێ سۆتنا ئۆفیسا ئه‌نه‌كه‌سێ بوو، پێدڤی بوو بێرێزییا ل ئالایێ کوردستانێ هاتییه‌ کرن هاتبا شەرمەزار کرن، یا کو بریارا وێ هێرشێ ژی ژ ئالیێ مه‌زلووم عه‌بدی ڤە هاتییە دان.

رۆژا کو «جوانێن شۆرەشگەر»، هێرشی دەریێ سنۆرییێ هەرێما کوردستانێ کری و دخواستی تێكدانێ بکەت، هەر وێ رۆژێ ئیلهام ئەحمەد دگه‌ل نوونەرێ هەرێما کوردستانێ یێ سوێدێ شۆرەش کادر ب گرنژینی د ناڤا كۆمبوونێ دا بوو.

د هەمان دەمی دا، ئەندامێ «کۆنگرەیا ئاشتییا دەمۆکراتیک» کو ژ ئالیێ په‌كه‌كێ ڤە ل رۆژئاڤا هاتییە دامه‌زراندن، عه‌بدولكه‌ریم سارۆخان، ل سەر ئەکرانێن رووداوێ ده‌ركه‌ت و هەول دا چالاکییا «جوانێن شۆرەشگەر» رەوا نیشان بدەت.

ژ سێ رێڤەبەرێن په‌كه‌كێ یێن ل رۆژئاڤا، ئێك بوویەرێ شەرمەزار دکەت، ئێك ژی وەک کو تشتەک چێنەبوویە دكه‌ت، یێ دی ژی ڤێ بوویەرێ دپارێزیت، ئانكو مه‌زلووم عه‌بدی د ڤێ بوویەرێ دا تنێ رۆلێ پۆلیسێ باش د گێریت.

رێبازا په‌كه‌كێ: بلڤینه‌ و قه‌ره‌بوویێ وه‌ربگره‌

یێن کو نه‌شێن ڤان شێوازێن په‌كه‌كێ تێبگه‌هن، نه‌شێن سه‌ره‌ده‌ریێ دگه‌ل حیله‌یێن په‌كه‌كێ بكه‌ن، پێدڤییه‌ کو ئەڤ حیله‌یێن په‌كه‌كێ، یێن کو دبێژن جوان گوهـ ناده‌نه‌ مە، خەبەرێ مە ژ بوویەرێ نینە و …هتد، هەروه‌ها هەولدانێن ڤه‌شارتنا ڤان بوویەرێن قرێژ نەهێنه‌ قەبوولکرن، ئەڤه‌ تەکتیکەکا کلاسیک یا په‌كه‌كێ یە، ئەو نەرێبازەک لۆکالە، به‌لكو باشترين رێبازا په‌كه‌كێ یه‌، ناڤێ ڤێ رێبازێ «بلڤینه‌ و قه‌ره‌بوویێ وه‌ربگره‌» یە.

په‌كه‌كێ کۆمەکا خوێرییان، فەلیته‌یان ئۆرگانیزە دکەت کو بشێن ژ بۆ هەر کەسه‌كی فیشەک ب تەقینن، ته‌نزیم دکەت و وان بەرددەته‌ کۆلانان، ئەڤ کۆم و گرووپ ترسێ ل سەر جەماوەری بەلاڤ دکەن، رۆژەڤا خه‌لكی دیار دکەن و دگه‌ل رێڤەبەریێن بلند ژی دانووستاندنێن دیپلۆماتیک دکەن و قه‌ره‌بوویان دخوازن، دەم دەما سانسۆر كرنا ڤێ رێبازا په‌كه‌كێ یه‌ یا كو 40 ساله‌ ل سەر ئەساسێ ترساندن، شانتاژ، ئیستفزاز و تێكدانێ هاتییه‌ ئاڤاکرن.

هەتا کو مرۆڤ دڤێ چارچۆڤه‌یی دا ل گۆتارا شەرمەزار کرنا بوویەرێ سا مه‌زلووم عه‌بدی نه‌نێریت، هەموو گۆتن بێ واتەنە، هەولدانێن مەدیایی یێن وەک رووداوێ یێن هیڤی چێکرنێ ژی، د وارێ سیاسی دا بێ واتەنە، تنێ یێن کو په‌كه‌كێ ناس ناکه‌ن، دکەڤنه‌ د ناڤا ڤێ یاریێ دا، کەسێ کو هێرشا دربێسیێ كری مه‌زلووم عه‌بدی ب خوە یە.

بۆچی مه‌زلووم عه‌بدی نه‌چار ما ڤێ داخویانیێ بدەت؟

ئه‌گه‌را کو مه‌زلووم عه‌بدی ئەو داخویانی دا، سه‌ره‌دانا مه‌كگۆرك بوو بۆ هەرێما کوردستانێ و ژ نوو ڤە دەستپێکرنا دانوستاندنێن کوردی – کوردی یه‌ ل رۆژئاڤا ژ ئالیێ ئامەریکا ڤە یە، عه‌بدی ژ بۆ کو د ڤان كۆمبوونان دا خوە وەک مرۆڤێ ماقوول و بێ لایه‌ن نیشان بدەت، ئەڤ داخویانی دایه‌.

دڤێت ئه‌نه‌كه‌سه‌ ڤێ راستیێ ببینیت و وه‌ها تەڤبگەریت، بانگه‌وازییا ئه‌نه‌كه‌سێ بۆ هه‌سه‌دێ و ئەمەریکایێ کری کو هێرش بهێته‌ شەرمزار کرن هەلوەستەکێ بێواتەیە و ژ ئالیێ سیاسی ڤە تشتەکی ب دەست نائێخیت.

دڤێت ئێدی ئه‌نه‌كه‌سە و پارتیێن د ناڤا وێ دا هەلوەستا خوە یا نه‌گه‌تیڤ دەرباس بکه‌ن، بێ ترس گاڤان بهاڤێژن و ڤێ هەلوەستا دو روو یا هه‌سه‌دێ و مه‌زلووم عه‌بدی سانسۆر بکه‌ن، گەر هەوجە بکەت، دڤێت بشێن دەستێ خوە ژی ل مێزێ بده‌ن، رێخستنێن په‌كه‌كێ یێن رۆژئاڤا په‌یه‌ده‌، تەڤ-دەم، یه‌په‌گه‌ و …هتد کو نه‌ ژ بەر كو بهێزن ل رۆژئاڤانە، د ناڤا خه‌لكی دا ئالیگرێن وان گه‌له‌ك کێمن، لێ مەسەلە ئەوە کو ئۆپۆزسیۆنا ل همبه‌ری ڤان رێخستنان، گه‌له‌ك ترسۆنەکە و هەر دەم هه‌لوه‌ستێن وێ یێن پێكهاتنێ نه‌، دڤێت ئه‌نه‌كه‌سە خوە رەخنە بکەت و ببینیت کو ئەڤ هەلوەست تنێ وێ دده‌ته‌ به‌رزه‌ كرن.

ژ كۆمبوونێن رۆژئاڤا نها و پێڤە گه‌له‌ك تشت بهێنه‌ هیڤی کرن، شاشییەکا دی ژی ئەوە کو ئه‌نه‌كه‌سە هەموو سیاسەتا خوە ب ڤان كۆمبوونان ڤە گرێددەت، دڤێت ئه‌نه‌كه‌سێ پلانێن A و B هه‌بن و خوە د وارێ سیاسی دا بهێز بکەت.