به‌نگینێ چه‌ند روو

به‌نگینێ چه‌ند روى

سمکۆ عەبدولعەزیز

به‌نگین عه‌فرینى سترانبێژه‌كی رۆژئاڤایێ كوردستانێ یه‌، ئه‌ڤ كه‌س‌ە ب راستى ژی مینا جامبازێن سیركێ یه، جامبازێن سیركێ روژانه‌ لسه‌ر وه‌ریسه‌كێ د‌له‌یزن، لێ كارێ وان له‌یزینه‌ و جهێن وان به‌رده‌وام د گوهەرینێ دا یه‌ و نه‌چارن وو‌سا خوە به‌رچاڤ بکن، لێ كوردا مفا ژ ڤێ ره‌فتارێ وه‌رگرتیه‌ و گۆتنه‌ك حه‌كیمانه‌ لسه‌ر چێكریه‌ و دبێژن ( هەر رۆژ لسه‌ر وه‌ریسه‌كێ دلەیزە) ، ئه‌ڤ گۆتنە دەربارێ وان کەسان تێ گۆتن یێن‌ کو لسه‌ر شۆپه‌كێ یان هزره‌كێ یان ره‌فتاره‌كێ ناسەکنن، ئەڤ کەسانە ل سپیدێ گۆتنه‌كێ‌ و نیڤرۆ گۆتنه‌كا بەرەڤاژی گۆتنا سپیدێ و ئێڤاران گۆتنەکا دی یا بەرەڤاژی گۆتنا سپێدێ و نیڤرۆ دبێژن، دبێژنە ڤان جوره‌ مروڤان، هه‌ر رۆژ لسه‌ر وه‌ریسه‌كێ دله‌یزن. به‌نگین عەفرینی ژى مینا وان كه‌سانه‌.

به‌نگین عه‌فرینى، به‌رى بچیته‌ ئەورۆپا و ببە په‌نابه‌ر، ل رۆژئاڤایێ كوردستانێ به‌رده‌وام ستران ب حافز ئه‌سه‌د و حزبا به‌عس دگۆتن و د ئاهه‌نگێن به‌عسیان دا خوە وەکە لێبۆکان لێ دکر، داكو بکارە هنده‌ك پارە بده‌ست بێخیت، ئەو ب پارەیێ به‌عسیان و ب ئالیکاریا به‌عسیان شییا خوە بگهینتە ئەورۆپایێ، ده‌ما گهشتی ئەورۆپا، داخوازا مافێ په‌نابه‌ریێ كر و ب بەهانەیا ڤێ یەکێ كو ژ هۆڤیتیا به‌عسیان رەڤییایە، مافێ په‌نابه‌ریێ ب ده‌ست خست، ل ئەورۆپایێ ببوو گا‌رسونێ خارنگه‌هان و د دیلانێن كوردان دا ستران دسترین، جاره‌كێ کەنالێ مه‌د تیڤى ئەو مێڤانی به‌رنامه‌یەکێ خوە کر و د ڤى به‌رنامه‌ دا سترانه‌ك ب ئاپۆ گۆت، ناڤێ سترانا وی ( تو سه‌روكی تو رێبه‌رى) بوو، ئه‌ڤە ئه‌و ستران بوو یا کو ب تەنێ ناڤێ حافز ئه‌سد گوهەرتى و ناڤێ ئاپۆ ل شوونا وی دەینای، پشتى ڤێ سترانێ وەکە ستێرکەک گەش د مه‌د تیڤى دا خوەیا بوو و روژێ چار جاران ل سەر ئەکرانێن مەد تیڤی دا ده‌ردكه‌ت.

پشتى سالا 2005 و دەما ره‌وشا باشوورێ كوردستانێ خوەشتر بووى ئەو هاته‌ باشوورێ كوردستانێ و بەشداری ئاهه‌نگه‌كا پەدەکێ بوو، دیسان سترانا (تو سه‌روكی تو رێبه‌رى) گۆت، لێ ئه‌ڤ جاره‌ ناڤێ ئاپۆ ژى گوهارت و ناڤێ رێبه‌رێ گەلێ كورد «مەسعوود بارزانی» ل سه‌ر دانا و راستەراست ستران گۆت، لێ پشتى ئاهەنگ ب داوی بووی، ب رێیا هندەک كادرێن پەدەکێ هاتە هایداركرن كو نابه‌ چ جاره‌كە دی ئه‌ڤ ستران‌ بهێتە گۆتن و ناڤێ رێبه‌رێ گەلێ کورد «مەسعوود بارزانی» تێ دا بیت، لێ وى د بەرسڤێ دا گۆت، “چما هوون ب ڤێ سترانێ عاجزن، من ب رێیا ڤێ سترانێ د ناڤا پەکەکێ دا پر جهێ خوە کریە، پاشان بوو دەهولقوتێ باشوورێ كوردستانێ و خه‌لكێ باشوور و پارتیێن باشوور گەلەک پاره‌ ب وی دان، ئەو کەتە د رەوشەکا ئابۆری یا پر باش دا، ب ئاوایەکێ کو دخوەست ل باشوور ژیان بکەت و ل «كوردستان تیڤى» دا به‌رنامه‌یەکێ پێشکێش بکە، لێ رێڤه‌به‌ریا كوردستان تیڤى نه‌رازیبونا خوە دیار كر، ئەو ب نەچاری ڤەدگەرە ئەورۆپایێ.

 ل ئەورۆپایێ، پەکەکێ دەرکەتنا وی د مەدیایا خوە دا قەدەغە کر، ژبەرکو ئەو چووبوو باشوور و پەسنا حكوومه‌تا كوردى کربوو، ئه‌ڤ كه‌سە‌ وەکە په‌پووكه‌كێ لێ هات و كه‌ته‌ کۆلانا.

 لێ كورد دبێژن ریڤى ناكه‌ڤنە چ خەفکا، ل ده‌ما رۆژئاڤایێ كوردستانێ نیڤ ئازادیەک ب دەست خستی، ب بەهانەیا سه‌ره‌دانا كه‌سوكارێن خوە ل عه‌فرینێ، خوە دگهینە رۆژئاڤا و ل ور دچە بارەگەهێن پەکەکێ و خوە رەخنە دکە و داخازا لیبۆرینێ دکە، لێ پەکەکە رازی نابە و ژ وی رە دبێژە كو پیدڤییە ل بەر جاڤێن خەلکێ خوە ره‌خنه‌ بكى و داخوازا لێبورینێ بكى و بێژى من شاشتى كریه‌. ئه‌و رازی دبە و د چه‌ندین ئاهه‌نگێن رۆژئاڤا دا خوە ره‌خنه‌كر و ب ده‌نگه‌كی بلند گۆت، من شاشتى كریه‌ و داخوازا لێبورینێ دکم.

لێ دیسان پارتیا كاركه‌ران مینا بەرێ رۆل نه‌دایێ و جارەکە دی ڤەدگەرە ئەورۆپایێ و وه‌ك په‌پووكا به‌رده‌وامیێ ب ژیانا خوە ددە، ل سالا 2020 جارەکە دی دزڤریتە باشوور، دچە کانالا وار تیڤى ل دهۆكێ و به‌رنامەیەکی هونەری پێشکێش دکە، پاش کو د وى به‌رنامه‌ دە چه‌ندین كارین نه‌دروست د تەڤ بواران دا ئه‌نجام دایی، ل ور تێ ده‌رکرن.

نها پشتی گرتنا دەریێ سینۆری یێ سێمالکا، ب سەدەما ئێریشا جوانێن شۆرەشگەر یێن سەر ب پەکەکێ ڤە، کو بوون سەدەما زرارگەهاندن ب هێزێن ئەولەکاریێ و داخوستنا ڤی دەریێ سینۆری. ئه‌ڤ مه‌خلوق هاتیه‌ و د سۆسیال مەدیایێ دا ئێریشی سەر حكوومه‌تا هەرێما کوردستانێ دکە، لێ هەر کەس دزانە نه‌ ‌دلێ «بەنگینێ چەند روو» ب ولاتیێن رۆژئاڤا دشەوتە و نه‌ پر هه‌ز ل پەکەکێ دكه‌ و نه‌ ژی ئەوقاس ل دژى حكوومه‌تا هەرێما کوردستانێ یە، به‌لكو ئەو خوە ل جەم پەکەکێ شرین دکە. ب کورتاسی به‌نگین عه‌فرینى، دشبهە وى كه‌سی ده‌ما مالا كه‌سه‌كی دشەوتە و هه‌وار دکە، بسەکنن، نها ئاگرى نه‌ڤه‌مرینن هەیا ئەز كه‌وێ خوە ل سەر ببرژینم .