ل ترکیا و باکورێ کوردستانێ کریزا پەیداکرنا دەرمانان ھەر کو دچیت کوورتر دبیت و وەلاتی نکارن پەیدا بکەن، ئەگەر ھەبن ژی گەلەکی گرانن.
سەرۆکێ بەرێ یێ دەرمانخانەیێن ترکیێ ئەردۆگان چۆلاک راگھاند کو نھا ل بازارێن ترکیێ 900 دەرمان پەیدا نابن. ل ترکیێ ھەر سال ژ بەرکو د مەھا شباتێ دا بھایێن دەرمانان تێن نووکرن، بەری مەھا شباتێ پرسگرێکا پەیداکرنا دەرمانان دەردکەڤیت.
ئیسال ژی ژبەرکو ترکیا د وارێ دەرمانان دا ب دەرڤە ڤە گرێدایی یە و بھایێ لیرە ل بەرامبەر دراڤێن بیانی زێدەتر داکەتیە، کریزا پەیداکرنا دەرمانان کوورتر بوویە.
ئەردۆگان چۆلاک گۆت: “نھا ل بازارێ 900 جورەیێن دەرمانان پەیدا نابن و ژ ڤر و پێ دا پەیداکرنا ھندەک دەرمانێن ئەرزان ژی زەحمەت دبیت.
کۆمپانیایێن دەرمانان بۆ دابینکرنا دەرمانان ل ھێڤیێ نە کو بھایێن نوو بێنە ئاشکەراکرن. ئیسال دێ 20ێ شباتێ بھا ب رێژەیا 35%-40% هێنە نووکرن و دێ وەلاتی ژ بۆ دەرمانان زێدەتر پەرەیان دەن.
چۆلاک تەکەز دکەت کو ژ نەبوونا دەرمانان کۆمپانیایێن دەرمان و وەزارەتا تەندروستییا ترکیێ بەرپرسن و دبێژیت: “دەرمانخانە نکارن دەرمانان خەزن بکەن. دەرمانخانە ب تەنێ دکارن ب قاسی مەھەکێ دەرمانان خەزن بکەن. ئەگەر دەرمانەک ل دەرڤە ب 100 یۆریان بیت دەما دهێتە ترکیێ ئەم ب 60 یۆرۆیان ددەین. ژ بەر گوھارتنا د بھایێ پارەیێن بیانی دا چێبووی کۆمپانیایێن دەرمانان ب بەهانەیا کو قازەنجێ ناکن دەرمانان نایینن و نادەنە بازاری.”
وەزارەتا تەندروستیا ترکیێ، د مەھا کانوونێ دا بھایێ ھەزار و 300 دەرمانان %16 زێدە کر و د مەھا چلە دا ژی بھایێ 110 دەرمانان %30 زێدە کر. نھا ژی دێ 20ێ شباتێ بھا هێنە نووکرن.
