رۆژنامەیا پەکەکێ یا ئەورۆپایێ ئۆزگوور پۆلتیکا دۆھی نووچەیەکێ بالکێش بەلاڤ کر. د نووچەیێ دا ب ئاوایەکێ ڤەکری ھەڤکاریا حەشدا شەعبی و پەکەکێ هاتبوو بەرچاڤ کرن.
د ھەڤپەیڤینا ب ئیمزایا «نازم داشتان» یا د رۆژنامەیا ئۆزگور پۆلیتیکا دا ھاتیە پارڤەکرن دا، لگەل یەک ژ بەرپرسێن حەشدا شەعبی یێن شەنگالێ سەیید مەحموود ھەڤپەیڤینەک ھاتە کرن. گۆتنا شەعید مەحموود یا کو تێدا دبێژیت “باوەریا کەسی ب پەدەکێ نەمایە” بوو مانشێتا رۆژنامێ.
د ھەڤپەیڤینا «نازم داشتان» کادرۆیێ پەکەکێ و نووچەگھانێ ھەرێما رۆژئاڤا-باشوورێ کوردستانێ دا دو ئارمانجێن سەرەکی ھەبوون. یا یەکەم ئێریشکرنا سەر پەدەکێ یە، یا دویەم ژی ئەوە کو شیعەیان شرین نیشان بدەن.
فەرماندارێ حەشدا شەعبی سەیید مەحموود د ھەڤپەیڤینێ دا گۆت؛ “وەکە کو دهێتە گۆتن، پرسگرێکا ئەولەھیێ ل شنگالێ نینە. رەوشا شنگالێ ژ یا بەغدایێ ئەولەترە.” ھەر وەھا د ئاخافتنا خوە دا دبێژیت ئەم دێ شنگالێ پارێزین.
پێشگۆتنا کورتا ھەڤپەیڤینا «نازم داشتان» ژ ئاخڤتنا فەرماندارێ حەشدا شەعبی سەیید مەحموود درێژترە. خویایە کو سەیید مەحموود ب پرسیاران ھاتییە ئاراستەکرن.
چما پەکەکە ھەول ددەت کو حەشدا شەعبی شرین نیشان بدەت؟
حەشدا شەعبی ھێزەکا چەکدارە و ب پشتگرییا ئیرانێ ئاڤا بوویە. ھێزێن دی یێن ل شەنگالێ ژی بەشەکێ فەرمی یێ ھەمان ھێزێ نە و ژ ھەمان بوودجەیێ مووچە و لۆجستیکا لەشکەری وەردگرن. لەوما بەشەک ژ ھێزەکا ئالیگرێن ئیرانێ یە. حەشدا شەعبی رێخستنەکا ل دژی کوردانە. د بنگەھدا حەشدا شەعبی دارێ ئیرانێ یێ ل ئیراقێ یە. ئیرانێ دو ئارمانجێن سەرەکی ژ ئاڤاکرنا حەشدا شەعبی هەبوون. یا یەکەم ئەوە کو د شەرت و مەرجێن سالا 2014ێ دا کورد نەبنە دەولەتەکا سەربخوە و یا دویەم ژی ئەوە کو ئیراق ب تەمامی بهێتە داگیرکرن. حەشدا شەعبی د ئاستا داعشێ دا خوەدی پرۆژەکێ دژ-کوردە. حەشدا شەعبی داعشا شیعەیا نە.
ب تایبەتی ژی گەل و سیاسەتمەدارێن باشوورێ کوردستانێ ڤێ یەکێ گەلەک باش دزانن. ژ بۆ ڤێ ژی پەکەکە ل باشوور ب چ ئاوایی ھەڤکاریا خوەیا لگەل حەشدا شەعبی دا دیار ناکەت. ھەڤکارییا حەشدا شەعبی و پەکەکێ ل سەر بنگەھێ ژناڤ برنا دەستکەفتێن باشوورێ کوردستانێ و داگیرکرنا وێ یە. لێ پارچێن دی یێن کوردستانێ ژ ھەبوونا راستی یا حەشدا شەعبی بێخەبەرن. ژ بەر ڤێ یەکێ پەکەکە ب تایبەتی د وەشانێن خوەیێن ترکی دا ھەول ددەت ھەبوونا حەشدا شەعبی رەوا بکەت و حەشدا شەعبی وەکە دۆستێ کوردان پێشکێش دکەت.
پەکەکە دخوازیت ناسنامەیا شیعە یا ئیرانێ وەکە “عەلەویەتێ” نیشان بدەت و ب ئاوایەکێ نەراستەراست بسەپینیت کو ئیران ئەنتی-ئەمپەریالیست، ئەنتی-ئەمەریکی یە و ب ڤی ئاوایی دێ وەکە تەڤگەرەکا رەوا و پێشڤەروو دیارکەت کو ل گۆری ستراتەژیا ئیرانێ تەڤبگەریت.
براتیا گەلان یان ژی بەرژەوەندیێن ھێزێن میلیشیات ؟
ھەڤدیتنا پەکەکێ یا لگەل سەیید مەحموود دا وەکە بنیاتێ “براتییا گەلان و ژیانا هەڤبەش” دهێتە دەستنیشان کرن . لێ ھەبوونا حەشدا شەعبی ل شنگالێ نە براتیا گەلانە. بەریا ھەر تشتی شنگالێ پێدڤی ب ناسنامەیا شیعەی ا ل وێ دەرێ نینە. رایەدارێن حەشدا شەعبی یێن وەکە سەیید مەحموود ب سالان ل ھەمان ھەرێمێ ل دژی ئێزدیاتیێ تەکۆشین کرینە. دەما کو داعشێ ئێریش کری، شیعەیێن کو ل گوندێن د ناڤبەرا تەلەعفەر و شنگالێ دا دژین، یان رەڤیان، یان ژی لگەل داعشێ ا ھەڤکاری کر. چ جوداھیا ئۆلی د ناڤبەرا نێرینا شیعەیان یا ل سەر ئێزدیان و یا داعشێ دا نینە.
ژ بەر ڤێ یەکێ مەبەستا پەکەکێ ل شنگالێ نە ئەوە براتیا گەلان پێک بینیت، بەلکو مەبەستا وێ ئەوە حەشدا شەعبی و شیعەیان دەرخیتە پێش. پەکەکە-یەبەشە راستەراست بەشەکێ سەر ب حەشدا شەعبی یە.
لگەل گەلان دا برا لێ لگەل ھەرێما کوردستانێ دا دژمن
پەکەکە ب هەژمارەکا جوانێن رۆژئاڤا ڤە ل دەرییێ سنۆری یێ سێمالکا ئێرشی ھەرێما کوردستانێ دکەت. ژ ئالیێ دی ڤە ل سەر خەتا کەرکووک، شنگالێ ب ھاریکارییا شیعە و حەشدا شەعبی ئێریشی ھەرێما کوردستانێ دکەت. ل باکورێ کوردستانێ و ترکیایێ لگەل چەپێن ترک دا هەڤپەیمانیێ چێدکەت و ل مەرەشێ ئێرشی بۆریا پەترۆلێ یا ھەرێما کوردستانێ دکەت و دتەقینیت.
دهێتە چاڤەرێکرن کو پەکەکە د دەما پێش دا ژ بۆ کو رێکەفتنا خوەیا ل سەر شنگالێ لگەل ئیرانێ دا ئەنجامدای رەوا بکەت، دێ گرانیێ دەتە نووچەیێن وەھا.
