ب هلکەفتا 8ێ ئادارێ، رۆژا جیهانی یا ژنێ، کەنەکێ داخویانیەک وەشاند و د داخویانیا خوە دا وەکە هەر جار ب خەرابی باسی باشوورێ کوردستانێ کر و خوەست وسا بدەت خوەیاکرن ل باشوورێ کوردستانێ چ ئازادیەک ژ بۆی ژنان تونەیە، ئەڤ ژی راستیا کەنەکێ یا دژاتیکرنا باشوورێ کوردستانێ ب ئاوایەک راستەراست ئاشکەرا دکە.
د داخویانیا خوە دا کەنەکێ ب چ ئاوا باس ل وان ژنان نەکر یێن کو د ناڤا پەکەکێ دا هاتنە ئیشکەنجەکرن، زندانکرن و کوشتن، ب تەنێ ل گۆر حەز و بەرژەوەندیێن پەکەکێ هندەک پەیڤ رێز کرنە و ل گۆر مەژیکێ خوە یێ ڤالا نرخاندنێن بێ واتە ژ بۆی ژنێ کرینە.
د ڤێ داخویانیێ دا تشتا هەری بالکێش چەوانیا باسکرن ژ مافێن ژنێ بوویە ل رۆژهلاتا ناڤین ب گشتی و ب تایبەتی ل باشوورێ کوردستانێ، د دەربارا ژنان ل باشوورێ کوردستانێ کەنەکە دبێژە، “ل باشوور، پێوستیا ب شۆرەشا ژنێ رۆژ ب رۆژ زێدەتر دبە. ژ بەر کو ل باشووریا کو تەڤی قەیرانا سیاسی و ئابۆری، پەرگالا دەستھلاتدارا مێرە. ژ بۆ ئازادکرن و پاراستنا وەلات، ل باشوور ئێدی دەما ئازادیا ژنێ ھاتیە و دەرباس دبیت.”
ل ڤر ئەم ب تەنێ یەک تشت ژ کەنەکێ-پەکەکێ دپرسن؛ گەلۆ هوون دخوازن باشوور کو تاکە پارچەیا ئازادا کوردستانێ یە و خوەدی پارلامانتۆ و حکوومەتا خوە یە و ب دەستێ کوردان تێ ئیدارەکرن ژ کێ ئازاد بکن؟! هوون چەوا شەرم ناکن و دبێژن پەرگالا دەستهلاتدار ل باشوور مێرە؟! قەی چاڤێن وە ئەوقاس تارینە و هوون نابینن ژنێن باشوور د تەڤ واران دێ جی گرتیە، د ناڤا تەڤ وەزارەتێن کوردستانێ دە خوەدی بەرپرسیاری نە، وەکە ژنێن جیهانێ مل ب ملێ زلامان د تەڤ وارێن کار کرنێ دا کار دکن.
ب راستی ژی ئەڤ کەرب و کینا ل همبەر باشوورێ کوردستانێ ل کۆڤە تێ؟ ل جیهێ کو کەنەکەیا پەکەکێ بهێت و باس ل ژنێن باشوور بکە و هندەک دەرەوان رێز بکە، بلا بچە و باس ل وان ژنان بکە یێن کو ل پارچەیێن دن یێن کوردستانێ دژی کو پەکەکە خوە ب دەستهلاتدارا وان پەرچەیان ددە ناسکرن، بلا باس ل وان زارۆکێن کەچ بکە یێن کو ب دەستێ چەتەیێن «جوانێن شۆرەشگەر» ل رۆژئاڤا تێن رەڤاندن و ب زۆرێ تێن چەکدارکرن، بلا باس ل وان ژنێن رۆژئاڤا بکە یێن کو ژ بەر سیاسەتا شاش یا پەکەکێ و رێخستنێن دن یێن سەر ب وێ ڤە نها دەربەدەر بوونە و د کامپێن باشوور و ترکیێ دا د رەوشەکە پر خەراب دا ژیان دکن، بلا باسی وان ژنان بکە یێن کو د ناڤا پەکەکێ دا هاتنە تەسفیە کرن، گەر کەنەکێ ناڤێ وان ژنان ژ بیر کربیت پر هێسانە، ئەم دکارین هەژمارەک ژ وان ب بیرا کەنەکێ بینن.
کەنەکەیا پەکەکێ بلا بچە و قالا «رۆزا لوکسەمبوورگا کوردستانێ» ئانکو «سایمە ئاشکن» بکە کا ب چ ئاوا و ژ بەر چ سەدەم ژ ئالیێ پەکەکێ ڤە ھاتیە گوللـەباران کرن، گەر کەنەکە سەدەمان نزانە ئەمێ ژ وێ را بێژن، سایمەیێ رەخنە ل سەر «عەڤدلا ئۆجەلان» هەبوون. «سایمەیێ» دگۆ «عەڤدلا ئۆجەلان» ئەو کەسێن کو وی رەخنە دکن هەموویان ژ ھۆلێ رادکە و ئەو دخوازە پەکەکێ مینا مالباتا خوە ب رێڤە ببە. د ھەمان دەمێ دا سایمە؛ ژ نێزیکاتیا عەڤدلا ئۆجەلان ل کامپا لبنانێ یا ژ بۆ ژنێن دی دکە ژی، نەرحەت دبە!
گەلۆ ل کیژان جیێ دنێ ل سەر تشتەک ب ڤی ئاوا مرۆڤ تێن کوشتن؟ قەی ئەڤە ئازادیا ژنێ یا کو کەنەکە قالا وێ دکە؟ گەلۆ ل باشوورێ کوردستانێ کیژان ژن ژ بەر رەخنە کرنا دەستهلاتدارێن باشوور هاتیە کوشتن کو کەنەکە دخوازە ژنێن دن ئازاد بکە؟ فەرە کەنەکە باس ل بەرخوەدانا «سایمە ئاشکن» بکە دەما ژ ئالیێ چەکدارێن پەکەکێ ڤە تێ گوللـەبارانکرن دەما دبێژە، ” بژی پەکەکەیا خەیری، مەزلووم و کەمال پیر. بمرە فاشیزما 12ێ ئیلوونێ، بمرە پەکەکەیا عەڤدلا ئۆجەلان “. ژ کەرەما خوە بلا کەنەکە بێژیتە مە کا ل کیژان پەرچەیا کوردستانێ ژن ئەڤ قاس بندەستە؟! ژ خوە د وان هەرێمێن د بن دەستهلاتداریا پەکەکێ دا ب تەنێ رەخنەکرنا پەکەکێ و ئۆجالان بەسە کو نە ب تەنێ ژن بەلکو مێر ژی بێن کوشتن، بلا کەنەکە قالا وان هەرێمان بکە یێن کو ب هەرێمێن پاراستنا مەدیا تێن ناسکرن کا ب چ ئاوا ژن هاتیە زندانکرن و ناهێلن دەنگ بکە، پەکەکە ئازادیا ژنێ ب تەنێ د چەکدارکرنا وێ و بکارئانینا وێ ژ بۆی بەرژەوەندیێن خوە دبینە، ژ دەرڤەی ڤێ یەکێ ژنێ ل جەم پەکەکێ ت ئازادیەک تونەیە.
بلا کەنەکە قالا ژنا ب ناڤێ «گۆلان گارزان بکە»، کا چەوا ل گەلیەکێ قەندیلێ، یێ تژی تێدا ئەندامێن پەکەکێ، ل گەلیەکێ کو 300 ژن تێدا بوون ب دەستێ پەکەکێ ھات کوشتن. بلا کەنەکە قالا «دەورانا چاڤدەریایی» ئانکو «نازمە ئاکترک» بکە کا ب چ ئاوا ژ بەر ھەلوەستا ئۆجەلان یا ل دادگەھێ دا و گۆتنێن عەڤدلا ئۆجەلان یێن وەکی، “ئەز دخوازم خزمەتا دەولەتا ترک بکەم، دایکا من ژی ترکە” وەکی خیانەت و تەسلیمبوون دبینە، تێ کوشتن. گەلۆ قەی کەنەکە باسی ئازادیا ژنێ ناکە؟ قەی ئەڤ نە ئازادیە کو ژنەک بکارە ب کێفا دلێ خوە نەرینا خوە ل سەر کەسەکی یان تشتەکی ببێژە؟
بلا کەنەکە قالا ژنا ب ناڤێ «سوومبوول پەریشان» یا ب کۆدێ «ستێرک ئامەد» بکە کا چەوا ب تاوانا رەخنەکرنا هەلوەستا ئۆجالان یا ل دادگەها ترکیێ و ئەڤیدار بوونا وێ ژ ئالیێ پەکەکێ ڤە تێ کوشتن، گەلۆ ل کیژان جیێ دنێ رەخنەکرن و حەزکرن بوویە تەوان کو ل جەم پەکەکێ تەوانن؟ بلا قالا «چیچەک بۆتان» ئانکو «ھاجەر کایا» بکە و ببێژیتە گەلێ کورد تاوانا وێ چ بوویە کو پەکەکێ ئەو نەچار ب خوەکوشتنێ کر؟
بلا کەنەکەیا پەکەکێ قالا «زەرییا جزیری» ئانکو «دیجلە فراتێ» بکە کا چەوا ژ بەر کو کەچەکە گوندی و نە بەدەو بوو ژ ئالیێ ئۆجالان ڤە ب مرنێ رە تێ رووبروو کرن، بلا کەنەکەیا پەکەکێ قالا «بەتوول جیجیم» ئانکو «سۆرگوولێ» بکە و سەدەمێن کوشتنا وێ ژ کوردان رە ئەشکەرە بکە، ئەم دزانن کەنەکێ ڤێ یەکێ ناکە لۆما ئەمێ سەدەما دارڤەکرنا وێ بێژن، ئەو ژ بەر سەدەمەک سیاسی نەھاتە دارڤە کرن، وێ هیچ رەخنەک سیاسی-رێخستنی ژی نەبوو، «بەتوول جیجیم» تەنێ ژ بەر کو پرسگرێکێن دەروونی ھەبوون ھاتە دارڤە کرن. ئەی هاوار گەلۆ ل کیژان قونجکێ ڤێ دنێ کەسێن کو پرسگرێکێن دەروونی هەیی تێن دارڤەکرن، گەلۆ ئەو تێن شاندن ژ بۆی جەم دختۆر یانژی وەکە پەکەکە دکە، تێن شاندن ژ بۆی جەم جەلادان و تێن دارڤەکرن؟
ل داویێ ئەم ب تەنێ ڤێ یەکێ ژ کەنەکەیا پەکەکێ رە دبێژین، گەر مالا مرۆڤ ژ شووشە بیت مرۆڤ کەڤرا ناگریتە مالا خەلکێ، گەر هوون دلسۆزێن ژنێ و کوردستانێ نە ژ کەرەما خوە گەر قالا ڤان ژنێن ل ژوور مە باسکری ژی ناکن، باس ل وان ژنێن د ناڤا پەکەکێ دە وەک زلامان لێهاتی بکن و چارەسەریەکێ ژێرە ببینن، وان ژنان ت پیڤەرەکی ژنێن کورد ل جەم نەمایە، شووندە وەرن و ئاخافتنێن ژ خوە و رێخستن و رێبەرێ خوە مەزنتر ببێژن، گەل ئێدی هشیارە و وە باش ناسدکە و دزانە مەعدەنێ وە چییە!
