ژ بۆ دەستپێکرنا لێکۆلینێن دەربارێ هێرشا مووشەکی یا ئیرانێ ل سەر هەولێرێ، ئیرۆ یەکشەمبێ کۆمیتەیەکا پلەبلند ب سەرۆکاتیا شێورمەندێ ئاساییشا نشتیمانی یا ئیراقێ گه‌هشت هەولێرێ.
کۆمیتا لێكۆلینێ ب سەرۆکاتییا شێورمەندێ ئاساییشا نشتیمانی یا ئیراقێ قاسم ئه‌عرەجی و ئەندامەتییا سەرۆکئەرکانێ ئارتێشێ عه‌بدولعامر یارالاهـ و سەرۆکێ دەزگەها ئەولەکارییا نشتیمانی گەنەرال نەعیم شاتری و هەژمارەک ژ ئەفسەر و بەرپرسێن ئەولەکاری و لەشکەری یە.
ئەڤ کۆمیتە ژ ئالیێ وەزیرێ ناڤخوە یێ هەرێما کوردستانێ رێبەر ئەحمەد و هەژمارەک بەرپرسێن حکوومەتێ ڤە هات پێشوازی کرن.
رۆژا 13/3/2022ێ ب 12 مووشەکان هێرش ل سەر هەولێرێ هاتە کرن و د ئەنجامێ دا زیانێن مادی گه‌هشتن هنده‌ك ناڤچەیێن سڤیلان، د پشت را ژی سپایێ پاسدارێن ئیرانێ بەرپرساتییا خوە د بەر وێ هێرشێ دا راگه‌هاند.
بەرپرسێن هەرێما کوردستانێ و ئیراقێ هێرشا ل سەر هەولێرێ شەرمەزار کرن و وەزارەتا دەرڤە یا ئیراقێ ژی بانگ ل بالیۆزێ ئیرانێ یێ ل به‌غدایێ ئیرج مەسجدی کر و نەرازیبوونا خوە ل هەمبەر هێرشا ل دژی هەولێرێ نیشان دا.
