ژ بەر دۆرپێچا هێزێن رژێما سووریێ ل سەر هەر دو تاخێن کوردان ل حه‌له‌بێ «ئەشرەفیە و شێخ مەقسوود»، خەلکێ وان هەردو تاخان د خوەپێشاندنەکێ دا نەرازیبوونا خوە نیشان دا.
فرقەیا چاره‌م یا رژێما سووریێ ژ رۆژا 13ێ ئادارا بۆری ڤە خالێن پشکنینێ داناینه و رێ ناده‌ن مادەیێن خوارنێ و ب تایبەتی «ئار» دەرباسی تاخێن شێخ مەقسوود و ئەشرەفیێ ببن.
ل گۆر ژێدەرێن خوەجهی، خەلکێ تاخێن ئەشرەفیە و شێخ مەقسوود، ئیرۆ ل نێزیكی نەخوەشخانەیا یاسین یا ل شێخ مەقسوود دەرکەتن خوەپێشاندانێ و نەرازیبوونا خوە نیشان دان و داخوازا راکرنا دۆرپێچا ل سەر تاخێن شێخ مەقسوود و ئەشرەفیێ کرن.
تاخێن شێخ مەقسوود و ئەشرەفیێ کو زێدەتر ژ 65 هەزار کەس لێ دژین، راستی شەرت و مەرجێن مرۆڤی یێن دژوار تێن، ژ بەر قوتبوونا گەلەک جورێن خوارنێ کو نرخێ کیسەکێ نانی ژ 1500 لیره‌یان بوویە 4000 لیرە.
تاخێن شێخ مەقسوود و ئەشرەفیێ ل حه‌له‌بێ وەک تاخا کوردان تێ ناسکرن و د دەستێ یەکینەیێن پاراستنا گەل یه‌په‌گێ دا نە.
