چما پەکەکە دژمناتیا بارزانییان دکەت؟

ئێریشێن پەکەکێ یێن ل سەر ستاتویا ھەرێما کوردستانێ بەردەوام دکەن. خەلەکا داوی یا ڤان ئێریشان ب گۆتنا ” مالباتا بارزانی چەند پارە ھەنە؟” بەردەوام دکەت.

بنگەھا ڤێ ئێریشێ ئەوە کو دخوازیت باشوورێ کوردستانێ، واتە “ھەرێما کوردستانێ وەکە ھەرێمەکا مەترسیدار، ھەرێمەکا دژمن نیشان بدەت و ببێژیت پێدڤییە بهێتە ھەلوەشاندن” پەکەکە دخوازیت ڤێ تێگەھێ د کوردان دا بئافرینیت. دژمناتیا پەکەکێ یا ل ھەمبەری کورد و کوردستانێ، وە دکەت کو کوردان ل دژی یەکانە ستاتویا کوردان یا فەرمی یا ب تەکۆشینا سەد سالان ب دەست خستی هان بدەت. ئەڤ دژمناتی گەلەک ھوور و کوور دهێتە مەشاندن. ئەڤ پلانە ژ ئالیێ ھزرەکا ژ پەکەکێ مەزنتر ھاتییە چێکرن و دهێتە برێڤەبرن. یا راست پەکەکە ب سالان ژ بۆ ڤێ وەزیفەیێ ھاتییە پەروەردەکرن و ژ ئالیێ ڤان دەردۆران ڤە ھاتیە مەزنکرن. پلان ئەڤەیە: “پەکەکێ پەروەردە بکەن-چەک بکەن و ئێریشی کوردان بکەن”.

ستراتەژیا بنگەھین یا پەکەکێ د ھەلوەستا وێ یا ل دژی کوردستانێ دا سەردابرنا کوردان یا د ئالیێ زھنی دایە، یا دویەمین ژی پووچکرنا وان ژ ئالیێ سۆسیۆلۆژی یە. ئارگومانا ھەری بنگەھین یا کو ئەو د ڤێ رێکێ دا بکار تینیت، قادا فکرییە. ھەموو فکرێن کو ئۆجەلان نڤیسی، دەربری، ئاخڤی و ھاتیە سەرڤیس کرن، خوەدی کاراکتەرەکێ دژە-کوردن. پەکەکە ژ بۆ کو ئەڤ ساختەکرنا زھنی بگەهیتە ئەنجام چاپەمەنییێ گەلەک باش ب کار تینیت. لێ راگاھاندنا پەکەکێ راگاھاندنەکا دژی کوردانە.

پەکەکێ ژ سالێن 1990ێ ڤە تشتێن کو نە یێن کورد و کوردستانێ نە ب گرانی خولقاندنە. ئەڤە نە گوھرینە لاشەی ب خوەیە. ئەڤە د لاشەی دا کولەکا خرابە. ئانکو کولا پەنجەشێرێیە.

د پەنجەشێرێ دا، دەسپێکێ شانەیەکا خەراب بوویی چێدبیت. ئەڤ شانە ھەم خوە ژ نوو ڤە زێدە دکەت و ھەم ژی ھەموو شانەیێن ھەیی وەکە خوە لێ دکەت. ئەو شانەیێن پاش ژی دبنە پەنجەشێر. سیستەما پاراستنا لاشەی تێک دچیت، لاشە نکاریت خوە بپارێزیت و نەخوەشی ل ھەموو لاشەی دا بەلاڤ دبیت.

کار و ئەرکێ پەکەکێ یێ ل کوردستانێ ژی تەمام مینا ڤێ شانەیا پەنجەشێرێیە. ژ بەر کو پەکەکە ئێریشی ھەر دەستکەفت و نرخەکێ کو کوردان دکەتە کورد کریە و دکەت. گەلێ کورد سەرەرای ھەموو کۆمکوژیێن کو ب سەرێ وان هاتی ژی نەھێلا وەکە قەوم وندا ببن، لێ مخابن پەکەکە دخوازیت وی چقلێ ژییانێ یێ کو کوردان خوە پێڤە گرتی ژی ببریت. پەکەکە ھەول ددەت ھەموو پێکھاتەیێن کو کوردان وەکە کورد سەرلنگا دھێلیت بدەست خوە بینیت و لاشەیێ کوردان بگوھریت.. رەوشا پەنجەشێرێ ئاڤا دکەت ئەوە کو لاشەی ژ سیستەمێ دەردخیت و سیستەما لاشەی ھلدوەشینیت. پەکەکە ژی تام ڤێ یەکێ ل کوردان دکەت.

پەکەکە ب تەمامکرنا پێڤاژۆیا نەتەوەبوونێ ھەول ددەت ھەموو رێیێن دەولەتبوونا کوردان بگریت. ژ بەر ڤێ یەکێ پەکەکە ئێریشی ئابۆریا کوردان دکەت، ئێریشی چاندا کوردان دکەت، ئێریشی دیرۆکا کوردان دکەت، ئێریشی پارتیێن کوردان دکەت، ئێریشی فکرێن وەلاتپارێزیێ دکەت، ئێریشی کەسایەتێن کورد دکەت، ئێریشی ئالایێ کوردان دکەت، ئێرشی رەنگ و نەخشێن دیرۆکا کوردان دکەت. ژ بەر ڤێ سەدەمێ ئێریشا پەکەکێ یا ل سەر ھەرێما کوردستانێ نە خەلەکا یەکەما ئێریشا ل سەر کوردانە، خەلەکا داوییێ یە. گەر ھوون یەک ب یەک لێکۆلین بکەن ھوونێ ببینن کو ھەموو پەکەکەیی ئێرشی نرخێن کو کوردایەتیێ زندی دھێلن دکەن.

میناک پەکەکە ئێریشی عەشیرێن کو د سەدسالێن 19 و 20ێ ژ قرکرنێ رزگار بوونە دکەت. پەکەکە دبێژیت کو عەشیر فۆرمێن پاشڤەروونە و دڤێت بهێنە ژناڤبرن. ل دژی عەشیران شەری دکەت. لێ د مێژوویا کوردستانێ دا عەشیرەتان کورد ژ ژناڤچوونێ رزگار کرینە. کەلەھا ھەری کەڤن و ھەری خورت کو کوردان خوەسپارتییێ عەشیرەتن. ژ بۆ ڤێ یەکێ ژی دڤێت نەتەوەبوونا کورد نە وەک دژمنێ عەشیران بیت، ب ناسکرنا ھەبوونا عەشیران بیت. پەکەکە ژ بۆ کو سۆسیۆلۆژییا کوردان تێک ببەت دەست ب دژمناتییا عەشیرەتان کر.

پەکەکێ ل دژی مەزهەبێ ئیسلامێ یێ «شافعی» شەر راگاھاند. پەکەکێ مەزهەبێ «شافعی» وەکە بیر و باوەرییەک کو پاشڤەمایییە و دڤێت بهێتە ژناڤ برن نیشان دا. لێ پڕانیا بەرخوەدانێن سەدسالێن 19 و 20 د ناڤا کوردان دا ب دەستێ کوردێن شافعی ھاتن کرن.

پەکەکێ ل دژی تەریقەتا شەر راگەهاند. ب تایبەتی ژی تەریقەتا «نەقشبەندی» وەکە دژمنێ کوردان نیشان دا. لێ بەلێ جڤاکا «نەقشیبەندی» خوەدیێ بیردانکا فکرێن نەتەوەپەرەستە. نەقشیبەندیان ھەر دەم پێشەنگیا نەتەوەپەرەستیەکا کوردان کریە. ژ  «شێخ عوبەیدولاهێ نەھری ھەیا شێخ سەعید و ھەیا شێخێن بارزان» و ھتد. گەلەک سەرۆک و عەشیرێن کو پشتگری دایە سەرھلدانا وان نەقشیبەندی بوون. لێ پەکەکە ل دژی ڤێ راستییێ سەکنی. پشتی سالا 1993یێ ئۆجەلان ب ئاشکەرایی گۆتنێن وەک “شێخ سەعید سیخورێ بریتانیان بوو” گۆت. ئۆجالان د شرۆڤەیێن خوەیێن سالا 1997ێ دا گۆت دڤێت “کەڤنەشۆپیا شێخێن نۆرشینێ ژ ھۆلێ بهێتە راکرن” و بەردەوامی دا د گۆت بەدلیس جھێ بەرتەکا ڤێ یەکێیە. یێن ژ «بەدلیسێ» تەڤلی مە دبن نە دبنە شۆرەشگەر و نە ژی دبنە پەکەکەیی.”

پەکەکێ ل دژی سازیا مالباتێ تەکۆشین کر و گۆت کو مالبات پاشڤەروویە و دڤێت سیستەما مالباتی بهێتە راکرن.

پەکەکێ ل باکورێ کوردستانێ ژی ل دژی پارتی، رێخستن و کەسێن خوەدی ھەستێن نەتەوی شەر کر. ئۆجالان د ڤێ دەربارێ دا دگۆت، یان وان بگرنە ناڤا خوە و وان بحەلینن، یان ژی وان وەکە دژمن دییار بکەن و ژ ھۆلێ راکەن. دەما مرۆڤ ل قادا سیاسەتا لەگال «مشروع» یا سالێن 1990ێ دنێریت، مرۆڤ دکاریت ب زەلالی نفشا نەتەوەپەرەستا ژ ئالیێ پەکەکێ ڤە ھاتیە ژناڤبرن، ببینیت. یەک ژ وان ژی لەیلا زانایە. ھەر دەم دهێتە گۆتن “لەیلا زانا ل کویە”؟ نە تەنێ لەیلا زانا، ھەر کەسێ کو نەتەوپەرەستێ کوردە بوویە ئارمانجا پەکەکێ. ھەر کوردەکێ سەرخوەبوون خواز بوویە ئارمانجا پەکەکێ. پەکەکێ زمانێ کوردی، موزیکا کوردی و رەنگ و نەخشێن کوردی پووچ کرن.

ب راستی دەما مرۆڤ ڤان ھەموویان تینیت بەرھەڤ، مرۆڤ دبینیت کو پەکەکێ ل دژی ھەر تشتێ کو ببیتە چاڤکانیا نەتەوەپەرەستیا کوردان شەر کریە. ل دژی ھەر تشتێ کو کوردان بکەتە دەولەت، شەر کریە. ل دژی هەر تشت و کەسێ کو بێھنا کوردایەتییێ ژێ دهێت شەر کریە. دەما ئەڤە ھەموو زەلال بن، ب ئاوایەکێ زەلال دهێتە دیتن کو چما پەکەکە ل دژی بارزانی یە. ژ بەر کو ناڤێ بارزانی ژ ناڤێ مالباتەکا وێدەترە. بارزانی فکرەکا سیاسی و رێبازەکا تەڤگەرێ یە. بارزانی خەتەکا کوردستانییە کو ژ ئەحمەدێ خانی ھەتا نەھری درێژ دبیت. بارزانی، ناسنامەیا کوردێن دەولەتخازە. بارزانی دەرگەھێ ناڤنەتەوی بوونا کوردانە.

پەکەکە د ھەمان دەمێ دا دژمناتیا بارزانییان دکەت، کو ئەڤە زێدەتری 100 سالن ژ بۆ دۆزا نەتەوەیا کورد شەر و پێشەنگییێ دکەن، ب ھەزاران شەھیدێن وان ھەنە، ب ھەزاران ئەنفالکری نە، ب ھەزاران ژ وان هێژ ژی پێشمەرگە نە و ھتد. پەکەکە ب دژمناھییا بارزانی، دژمناھییا نەتەو-دەولەت بوونا کوردان دکەت. پەکەکە ب دژمناھییا بارزانی دژمناھییا سیاسەتا کوردان یا ناڤنەتەوەیی دکەت. دژمناتیا پەکەکێ یا ل ھەمبەر بارزانی، نیشانەیا دژمناتیا کوردستانێیە. دژمناتیا ئەحمەدێ خانی، شێخ عوبەیدولاهێ نەھری، شێخ سەعید و ھتد ژ ڤێ کەڤنەشۆپیێ یە.

ئەڤە دژمناتیەکا ووسا دژوارە کو رێبەرێ پەکەکێ عەڤدلا ئۆجالان ل ئیمرالیێ ل رەخێ دەستشوویێ روونشتیە و دبێژیتە لەشکەرەکێ ترک، وەرن ئەم پێکڤە ھەولێرێ بستینین، ئەم دێ وەکەین کو بارزانی نەفەسێ نەستینیت، ئەم دێ ھەولێرێ ب ترکیایێ ڤە گرێدەین. نھا ژی ھەول ددەن ب دەرەوان خەتا بارزانییان رەش بکەن. لێ خەتا بارزانی د جەھەنەما رۆژھلاتا ناڤیندەا بەهەشتەک ل باشوورێ کوردستانێ ئاڤاکرییە کو ھەموو کورد تێدا ب سەروەری، سەربلندی و شانازی دژین. باشوورێ کوردستانێ بوویە وارگەھا پێکڤەژییانێ و ئاڤەدانییێ.

ئێرشکارییا پەکەکێ نە ژ بوو مال و ملکێ بارزانییانە. کەرب و کینا پەکەکێ ئەوە کو د بن رێبازا  بارزانییان دا کورد بەر ب نەتەودەولەتێ ڤە دچن.