سیراج ئۆگوز
دەما کۆمارا کەمالیست ھاتیە دامەزراندن، ل گۆر تەڤگەرا ملەتێ ترک و ژ بۆ سەروەرییا ترکییێ چار یاسایێن نوو وەک بنیاتێ رەژیمێ دانان.
ئەو ژی ئەڤەنە: یەک دەولەت، یەک ملەت، یەک ئالا و یەک زمان. ل سەر ڤان چار بنگەھان بنیاتێ دەولەتا کەمالیست ھاتە دانان. ژ دامەزراندنا کۆمارێ ھەتا رۆژا ئیرۆ، ھەموو پارتی و سازییێن فەرمی ژی ڤان قانوونێن کو نایێن گوھەرتن، دپارێزن و بێ بەدەل ئیرۆ ژی دپارێزن.
وەکی دن ئەو دامەزرێنەرێن کۆمارا کەمالیست، د ناڤبەرا ھەڤالێن خوە دا، ب دەک و دۆلاب تەڤدگەرییان. کەسێن ل دژی ئەرک و هێزا وان رادبوون، ب تۆلڤەکرن و ب کینداری ل دژی وان کەسان دەردکەتن و ب خیانەت و ب خرابییێ تاوانبار دکرن. ئان ژی کریارێن نەدییار ددانە پال وان کەسان.
ژ وێ رۆژێ ھەتا رۆژا ئیرۆ، سەدسالە ملەت و پارتییێن ترکییێ ئەو تشتێن نە قانوونی ھەردەم بکار تینن و ب وان خوە سەربلند دبینن.
ل ترکییێ رەژیما کەمالیست، وەک موخالەفەت و دژبەریتییێ، ھەرتشتی ب دەستێ سازییێن دەولەتا کوور ددەتە ئەنجامدان. لەوما، سەد سالە ژ بۆ دەستهلاتدارییا رەژیما کەمالیزمێ، وی کاری پر باش ژی بجیھ تینن.
ب ناڤێن چەپگر و راستگر، بەلکی ھەتا رۆژا ئیرۆ، دەھ کۆدەتایێن لەشکەری و فاشیست چێبوون. کۆدەتایێن لەشکەری ھەموو ژ بۆ تم و تم بەردەوامییا دەستھلاتدارییا رەژیما کەمالیست بوون. ژ سەرۆک وەزیر بگرە و ھەتا خۆرتێ ھەڤدە سالی و ب سەدان کەس ھاتن سێدارەدان. ژ بۆ بەردەوامییا رەژیما کەمالیست، چ ژ دەستێ دەستھلاتدارێن دەولەتا کەمالیست ھات، ب چاڤگرتی بجیھ ئانین.
یەک ژی ژ وان سازییا، وەک سازییا ئۆلی یا ب ناڤێ دیانەتێ یە. ئیرۆ ب سەدان ھەزار مەلا و خەباتکارێن وێ سازییێ ھەنە. ئەو ژی چقەند رەنگ و گۆتنێن وان ژ ھەڤ جوودابن ژی، ھەموو د خزمەتا رەژیما کەمالیست دا کار دکەن.
ئەو لەشکەرێ ئۆلی ھەموو ھەفتیان د رۆژێن ئینێ دا، ب ناڤێ رەژیما کەمالیست و لەشکەرێ وێ دوعا دکەن و ژ بۆ بەردەوامییا رەژیما کەمالیست ئالیکارییێ ژ ملەتی دخوازن. د ھەموو مزگەفتێن ترکییێ و دەرڤەیی ترکییێ دا ھەر رۆژ بێ جوداهی د رۆژێ دا پێنج جارا ئەو دوعا تێن کرن.
لەوما سەد سالە رەژیما کەمالیست ب قووەتە و بەردەوامە.
ژ بەر کو، ب ناڤێ ئۆلدارییێ ئارتێشەکا ب سەدان ھەزار، مەلا و بانگخواز ل پشتا رەژیما کەمالیستن.
چەندین سالان بەرێ مەزن و مەلایێن کوردان دگۆتن، نڤێژا کوردان ل مزگەفتێن ترکا و ل پشت مەلایێن ترکا نابیت. خوەدێ وێ نڤێژ و عیبادەتا ل پشت ترکان قەبوول ناکەت. مەلایێن کورد ژی بەرێ ب سالان نەسیحەت دکرن و دگۆتن ل پشت ترکان نڤێژێ نەکەن.
لێ کۆمارا کەمالیست ژ ئالییێ ئۆلی دا تشتێن ھەری گران، بوویەرێن نەینسانی، ئێریشێن ھۆڤانە ئانی سەرێ ملەتێ کورد. ژ بەر کو ملەتێ کورد قەت وەختەکێ ل بەر وان یاسایێن کۆمارا کەمالیست سەرێ خوە نەتەواندن و ئەرێ نەکر.
ژ بۆ وێ ژی، ژ سەرھلدانا شێخ سەعید، ژ سالا 1925ێ ھەتا رۆژا ئیرۆ، کوردان بێ ترس دژی رەژیما کەمالیست دژایەتی کر.
سەدسالە کەمالیستان ب دەک و دۆلاب و ب تەجرووبێن خوەیێن سییاسی، ب زەخت و زۆرێ پێشی ل ماف و ئازادییا کوردان گرتیە. ب وارێ ئۆلی و سییاسی، د ناڤ کوردان دا ژی دوبەندی چێکرن و ئیرۆ دەستھلاتدارییا رەژیما کەمالست ب کەیف بەردەوام دکەن.
دەستھلاتدارێن ترکییێ، ژ بۆ سەروەرییا وەلاتێ خوە، ھەردەم ب کینداری و ئینتیقام تەڤدگەرن. دەما کو دەستھلادارێن ترکییێ، دکەڤنە تەنگاسییێ، ئارتێشا ئۆلی و کەمالیست ئامادەیە و ب کۆدەتایا لەشکەری یان ژی ب زەخت و زۆرێ، رەژیما کەمالیست ب باندۆر ل سەر ملەتێ کورد دسەپینن…
ئیرۆ نە پارتی، نە ژی پرانییا سییاسەتمەدارێن کورد، ڤێ راستییێ نابینن و نە ژی تینن زمان. ھەتا پرانییا پارتییێن کوردان، خوە نێزیکی پارتییێن کەمالست دبینن. ب سالانە ل سەر ناڤێ کوردان ب پارتییێن رەژیما کەمالیست، دکەڤنە ناڤ رێکەفتنان و ھەڤکارییا وان دکەن.
مخابن ب سالانە رەژیما کەمالیست، ب دەستێ پارتی و سازییێن کوردان وەک یاریا مشک و پشیکێ، یاریا ب ملەتێ کورد دکەن. کەمالیست هندەک جاران دهێت و ب ناڤێ دەمۆکراسییێ، هندەک جاران ژی ب ناڤێ دین و ئیمانێ کوردان دخاپینن.
دەولەتا کەمالیست سۆسیۆلۆژییا ملەتێ کورد باش ناسکرییە. لەوما ل گۆر رەوشا دنیایێ، ب تاکتیک و فێلبازی یاریا ب کوردان دکەت.
ئیرۆ ژی رەژیما کەمالیست، د ناڤ کوردان، نیفاق و دوبەندیتی چێکرییە و ب کەیفا خوە کوردان ئیدارە دکەت.
