پەکەکێ گەفێن کوشتنێ ل رەوشەنبیر، نڤیسکار، لێکۆلینەر، سیاسەتمەدار و وەلاتپارێزێن کو ل سەر مەدیایا جڤاکی وان رەخنە دکەن، کرن. ژ بلی مەدیایا جڤاکی، ھات بھیستن ب رێکا مالباتان گەف ھاتنە کرن و گۆتن؛ “بێژنە کورێ خوە بلا دەڤێ خوە بگریت یانا ئەم دێ وی بێدەنگ کەین”.
ژ بەر کو د ڤان سالێن داوی دا سەنگا رێخستنا پەکەکێ د ناڤا گەل دا کێم بوویە و دەردۆرێن ل دژی وێ زێدەتر بوونە، گەلەک نەرحەتە. ل دەمێ کو ئالیێن تاری یێن دیرۆکا پەکەکێ د مەدیایا جڤاکی دا دهێنە کەشف کرن، دیسا د سیاسەتا رۆژانە دا ھەلوەستێن وێ یێن دژ-کورد تێنە رەخنەکرن و ھێزا پەکەکێ یا ل سەر مەدیا جڤاکێ دهێتە پاشڤەبرن، پەکەکە ل ھەمبەر ھەموو جوورێن دژایەتیێ ل کوردستانێ عاجز و ئێریشکار دبیت.
فەردا چەتین ئیشارەت پێدا، ترۆڵان «سوپایێ ئەلکترۆنی» دەست ب ئێریشێ کرن
ھەری داوی ژی گەف ل کەسێن کو ل سەر مەدیایا جڤاکی شرۆڤە کرین ھاتنە کرن. یەکەمین کەسێ کو بانگا گەفکرنێ کری، خەباتکارێ پەکەکێ یێن ژ چاپەمەنیا ل ئەورۆپایێ دژیت «فەردا چەتین» بوو. فەردا چەتین د 27ێ ئادارێ دا گەف ل پارێزەر، سیاسەتمەدار و پارێزڤانێ مافێن مرۆڤان «سدقی زیلان» کرن ژ بەر رەخنەیێن وی یێن ل سەر تویتتەرێ. «سدقی زیلان» ل سەر تویتەرا خوە رەخنە ل چالاکیێن پەکەکێ یێن ل باشوورێ کوردستانێ گرتن و گۆت، “بەرپرسیارێ رۆژئاڤا حکوومەتا رۆژئاڤایە، ژ باشوورێ کوردستانێ ژی حکوومەتا باشوور بەرپرسیارە”.
پشتی ڤێ بوویەرێ ترۆلێن پەکەکێ یێن ل سەر مەدیایا جڤاکی دەست ب تەھدیدکرنا یەک ب یەک یا کەسێن کو پەکەکێ رەخنە دکەن کرن. ترۆلان ل سەر مەدیایا جڤاکی نڤیساند کو “ئەو دێ قانوونێن شۆرەشێ ل دژی کەسێن کو وان رەخنە دکەن جێبەجێ کەن و پەکەکە چ تشتان بێ بەرسڤ نەھێلیت”. ترۆلێن پەکەکێ د داخویانیێن خوە دا ناڤێ گەلەک رەوشەنبیر و سیاسەتمەدارێن کورد ژی ئاشکەرا کرن. د ناڤا کەسێن کو گەف ل وان ھاتیە کرن دا نڤیسکار، سیاسەتمەدار، لێکۆلینەر، رۆژنامەڤان و پارێزەر «سەربەست فەرھات سندی» ژی ھەنە.
سیاسەتا پەکەکێ یا گوھارتنا رۆژەڤێ و “کوردان ب دەستێ کوردان شکاندنێ”
د ڤان دەمێن داویێ دا ھەموو خەباتکار، سازی و سیاسەتمەدارێن پەکەکێ بەرێ لوولییا تفەنگا خوە دایە کوردان. ھەما ئەم دکارین بێژین کو چاپەمەنیا پەکەکێ رەخنەکرنا داگیرکەران ژبیرکرییە. تەنێ ئێرشان ل سەر نرخ و دەستکەفتێن کوردان دکەت و دخوازیت کوردان ڤێکرا بەردەت و ژ ھەڤ دوور بێخیت. راگەھاندنا پەکەکێ تەنێ ژ بۆ فەسادییا ناڤمالا کوردی کار دکەت. ئاشکەرا دهێتە زانین کو؛ کەنگی کو پەکەکە کوردان دکەتە ئارمانچ، بزانن کو ل پشترا پلانەکا دن جێبەجێ دکەت. خویایە سەدەما ڤێ یەکێ یا کو پەکەکێ ڤێ جارێ کری ئەڤە بوو کو د پەیوەندیێن خوە یێن لگەل دەولەتێن داگیرکەر دا، رۆلا دژمناتییا کو ژ بۆ کوردان گێرایە ڤەشێریت. ئەڤە تەکتیکەکا پەکەکێ یا ئاشکەرایە.
دیرۆکا پەکەکێ دیرۆکا شکەستنا کوردانە
ئارمانجکرنا کوردێن کو سەێ خوە بۆ پەکەکێ نەتەواندی گرێدایی دیرۆک و جەوھەرێ راستییا پەکەکێ یە.
دەما کو دیرۆکا پەکەکێ دهێتە لێکۆلینکرن، دهێتە دیتن کو پەکەکێ گولـلەیا یەکەم ل کوردان خستییە، نە ل داگیرکەران. بەری دەستپێکرنا شەری د سالا 1984ێ دا، پەکەکێ د ناڤبەرا سالێن 1974-1984ێ دا ژ لەشکەر و کارمەندێن دەولەتا ترک زێدەتر کوردێن ئازادیخواز کوشتن. پەکەکێ ژ بلی پارتیا خوە ھەموو پارتیێن دن وەکە خایین راگەهاندن، ب سەدان ئەندام و چەکدارێن پارتیێن دن کوشتن. سەرۆکێ رێخستنا دەنگێ کاوا «فەرید ئوزون» یەک ژ وانە.
پشتی سالا 1980یێ پەکەکێ ئێرش کرە سەر جڤین و کۆنسەرێن رێخستنێن دن یێن ل ئەورۆپایێ و گەف ل خەباتکارێن وان کرن.
ھەر وھا پەکەکێ ھەموو کەسێن کو ل ھەمبەری وان موخالەفەتێ دکەن و ھەر کەسێ کو وان رەخنە دکەن ئارمانج کرن و کوشتن.
ھەمان دەم پەکەکێ لاینگرێن خوە یێن کو د ھندەک بابەتان دا رەخنەکاربوون ژی کرن ئارمانج و بێدەنگ کرن. «ئاپێ مووسا عەنتەر» یەک ژ وان کەسان بوو. ھەر چقاس «مووسا عەنتەرێ» ناڤدار ب ھەموو رەنگان ھاریکاریا وان کر بوو ژی لێ دیسا ژی «ئاپێ مووسا» ھاتبوو تەھدیتکرن.
پەکەکێ جوانێن کورد ژ بۆ خوە وەکە تەتیککێش بکار ئانین
پەکەکێ چەند جوانێن کورد کو ئێریشی ھەر جورە دژبەرەکێ بکەن و د کارێن خوە یێن تاری دا بکار بینیت ب تایبەت پەروەردە کرن. رێڤەبەریا پەکەکێ ئەڤ جوانێن سەرهشک ل چیایان ژ بۆ بێدەنگکرنا ئۆپۆزسیۆنا د ناڤا رێخستنێ دا ژی ب کار ئانی و ل ئەورۆپا ژی کۆمەکا ب ھەمان رەنگی ئاڤا کر. دکان و خوارنگەھێن کو باج نەددان پەکەکێ شەوتاندن و خوەدیێن وان دھاتن لێدان. دەما کو «شڤان پەروەر» رەخنە ل پەکەکێ دگرتن ژی ھەولدان کو «شڤان پەروەر» ل سەر دیکێ بقووتن و کۆنسەرتا وی بەتال بکەن. کەسێن کو بەشداری چالاکیێن پەکەکێ نەدبوون د ھاتن تەھدیتکرن. پەکەکێ جوانێن کو ل ئەورۆپایێ کۆم ببوون، یان دشاندنە چیایان، یان ژی ئەو ب شێوازێن مافیاواری ددانە کارپێکرن. ھەموو جوانێن کو ژ سالێن 1990ێ و ڤر ڤە ل ئەورۆپایێ ل دۆرا پەکەکێ کۆم بوویی، ژ بەر سەرەدەریا پەکەکێ تەڤلی گروپێن چەتەیان بوونە.
ل سەر مەدیایا جڤاکی گەف ل رەخنەگران کرن
پەکەکێ نھا ژی ل سەر مەدیایا جڤاکی کارەکێ ب ڤی رەنگی دکەت. وان کۆمەکا نەزان یا سەرهشک ئاڤا کر کو ھەر رەخنەگرەکێ ب سیخوریێ تاوانبار دکەت. ب رەنگەکێ کو وان دەست ب تەھدیدکرنا چەند رەخنەگرێن کو لاینگرێن پەکەکێ نە ژی کر. د نەورۆزێ دا ژ بەر کو خەباتکارێ وان یێ ب ناڤێ ا. پ. رەخنە ل پەکەکێ گرتن کو د نەورۆزا سویسرا دا گۆت بوو “بۆچی تەنێ وێنەیا ئاپۆ ل قادا نەورۆزێ یە” ھاتە تەھدیتکرن.
ترۆلێن پەکەکێ گەفان ل کەسێن نەتەوپەروەر دکەن و دبێژن “ئەم ناڤنیشانا وە دزانین” ئەم دێ وە کوژین.
کورد نە کوردێن بەرێ نە
د ناڤبەرا سالێن 1990ێ دا کو وی دەمی پەکەکێ ب گەفان گەل بێدەنگ دکر و ئیرۆ دا جوداهیەکا مەزن ھەیە. شەرت و مەرجێن راگھاندنا پێشکەتی رێکێ ددەت کو مرۆڤ بگەهیتە زانیاریێن راست. یا کو پەکەکە ژێ نەرەحەتە ژی ئەڤەیە. پەکەکە دخوازیت تشتێن کو ئەو دبێژیت وەکە ئایەتێن قوورئانێ پیرۆز بن، نەهێنە گوھەراندن، نیقاش ل سەر نەهێتە کرن و کەسێ شک تێدا نەبیت. گەر ئەڤ یەک پێکنەھات ئێدی دەست ب گەف و تووندرەویێ دکەن. گەلێ کورد راستیێن ڤەشارتی یێن دیرۆکا پەکەکێ و تێکلیا وان یا لگەل داگیرکەران دا ھەیی دیتن، دێ هێژ پێتر ژی هێتە دیتن. د ڤێ مژار و ئەرکی دا رۆلا ھەری مەزن دکەڤیتە سەر ملێ رەوشەنبیر و نڤیسکارێن کورد.
