ئالۆزیێن د ناڤبەرا ئارتێشا ئیراقێ و ھێزێن پەکەکێ یێن ل شەنگالێ دا، د ڤان ھەفتەیێن داوی دا ھەر کو دچەیت زێدەتر دبیت. د ئالۆزیا کو ژ 10ێ نیسانێ ڤە بەردەوامە دا، پشتی کو «یەبەشێ» خواستی گەنجەکێ ل گوندێ «دوگوورە» برەڤینیت ئارتێشا ئیراقێ و نشتەجییێن گوندی رێگری ل «یەبەشێ» کر. پشترا گەلێ شەنگالێ بانگ ل ھێزێن ئیراقی یێن ل ھەرێمێ کرن و ھێزێن ئیراقی خواستن «یەبەشێ» ژ ھەرێمێن سڤیل دەربێخیت. پشتی رەدکرنا ڤێ بریارێ ژ ئالیێ پەکەکێ ڤە، شەر و پەڤچوون دەرکەتن. چاڤکانیێن ھەرێمی ژی ئیدیعا کرن کو ھندەک زییانێن یەبەشێ هەنە.
فەرمانا ژ بۆ شەرڤانێن پەکەکێ ھاتی: راستەراست تەقێ ل سەربازێن ئیراقی نەکەن و وان نەکوژن
پەڤچوون رۆژا پێنجشەم و ئینایا بۆری دیسا گەرم بوون. بەشەک ژ شەرڤانێن یەبەشێ ژ ئالیێ ھێزێن ئیراقێ ڤە ھاتن گرتن. ھاتە زانین کو رێڤەبەریا سیاسییا پەکەکێ یا شەنگالێ گۆتیە ھێزێن خوە، “د شەری دا راستەراست لەشکەرێن ئیراقێ ئارمانج نەکەن، ونداھییێن وان بلا نەبن، دێ مە ژ ھەرێمێ دەرێخن، ئەم نکارین بازارێن سیاسی بکەین” ژ بەر ڤێ یەکێ ھێزێن یەبەشێ ھەتا نھا ل ھەرێمێ تەنێ پاشڤە ڤەکشیانە. و پیرەژنان ل نوقتەیێن ئاساییشێ ب جھ دکەت. ژ شەڤا بۆری ڤە 15 شەرڤانێن یەبەشێ ژ ئالیێ ھێزێن ئیراقێ ڤە ھاتن بنچاڤکرن. ھین ژی نەھاتنە بەردان. لێ نە مەدیایا پەکەکێ و نە ژی ھێزێن ئیراقی ب تەڤاھی بوویەران راڤە ناکەن.
کۆمیتەیا تێکلیێن دەرڤەیا «کەجەکێ» سەبارەت وان بوویەران داخویانیەک دا و گۆت، “ئەم وەکە تەڤگەرا ئازادی دیار دکەین کو ژ بۆ چارەسەریا پرسگرێکێ ئەم دێ پشتگریێ دەینە ھەر پێڤاژۆیەکا دەمۆکراتیکا چێکەر.” ئەڤ گۆتنە پێنگاڤەکا کەجەکێ بوو کو لگەل ئراقێ دا ھەڤدیتنەکا نوو دەستپێ بکەت. لێ د داخویانیا «کەجەکێ» دا ژی ب ئاوایەکێ نەپەنی ھاتیە گۆتن کو ئەو دکارن د کیژان مژاران دا بەدەلان بدەنە دەولەتا ئیراقێ و دێ کارن چ خزمەتێ بکەن. «کەجەکێ» دیسا «پەدەکە» وەکە مەترسی نیشان دا. د داخویانیا کەجەکێ دا ھات گۆتن، “یا ژ بۆ ئیراقێ مەترسیدار پەدەکەیە، نە ئەمین”.
پەکەکێ، پەدەکە ژ بۆ ئیراقێ مەترسیدار نیشان دا
د داخویانیا کەجەکێ دا خالێن ئەولەھیێ یێن د ناڤبەرا وان و دەولەتا ئیراقێ دا ل شەنگالێ و ھتد هاتن باسکرن. پەدەکێ ھەر چەند چ پەیوەندی ب وان پرسگرێکان نەبوو ژی لێ ھاتە تەوانبارکرن. کەجەکێ دەستنیشان کر کو ئەو ئامادە نە ژ بۆ دەولەتا ئیراقێ تشتەکێ بکەن و ئەڤ دەربرین کرن. “ب ستراتەژیا دەولەتا ترکا فاشیست، پلانا خوەیا پارچەکرنا ئیراقێ و داگیرکرنا ھەرێمێ ھەتا مووسل و کەرکووکێ بەردەوام دکەت. پشتگرێ ھەری مەزن یێ ڤێ پلانێ پەدەکەیە. د بەرخوەدانا گەریلایێن ئازادیا کوردستانێ یا ل دژی ئارتێشا ترک دا یێ کو ھەری زێدە ھاریکاری ددەتە داگیرکەران پەدەکە یە.”
کەجەکێ خواست پەیمانێن بەرێ یێن لگەل ئیراقێ دا کری ب بیر بینیت؟
بنگەھا پەیمانا کو د سالا 2014ێ دا د ناڤبەرا کەجەکێ-پەکەکێ و ئیراقێ دا ھاتیە ئیمزاکرن ل سەر سینۆردارکرنا ھەرێما کوردستانێ بوو. رێڤەبەرێن کەجەکێ «سەبری ئۆک و رزا ئالتون» چوونە بەغدایێ و لگەل سەرۆکوەزیرێ وێ دەمێ «نووری مالیکی» و پشترا لگەل «حەیدەر عەبادی» دا ل ھەڤ کرن. ل گۆری رێکەفتنا کو د بن گارانتۆریا ئیرانێ دا ھاتیە ئیمزاکرن، ھێزێن پەکەکێ ھەرێما کوردستانێ دێ دۆرپێچ کەن، رێ ل بەر بەلاڤبوونا ھێزێن پێشمەرگە ل دەڤەرێن ماددە 140 بگرن و ھەرێما کوردستانێ ل گۆری بەرژەوەندیێن ئیراقێ دێ سینۆردار بکەن. ژ بۆ ڤێ ژی لھەڤکرن ئەو بوو کو پەکەکە ل سەر خەتا شنگال، مەخموور، کەرکووک، دووزخورماتوو، گەرمیان و خانەقینێ ب جھ ببیت. ئەڤ خەتە ژی دبیتە خەتا سینۆرێ ئیراق و کوردستانێ. ھەروھا ئەڤ خەتە د چارچۆڤەیا پرۆژەیا «ھەیڤا شیعە» یا ئیرانێ دایە. د بەردێلا ڤێ خزمەتێ دا دێ پەکەکە ژی خوەدی ھندەک ئیمتییازان بیت. ئەڤ ئیمتیازە ئەڤە بوون: “پەکەکە دێ د بن ناڤێ “ھێزێن خوەپاراستنێ” دا رێخستنێ کەت، دێ ئەڤ رێخستنە ژ ئالیێ ئیراقێ ڤە ب فەرمی هێتە ناسکرن، بالافرگەھا بەغدایێ ژ بۆ ھاتنووچوونا خەباتکارێن پەکەکێ هێتە باکارئانین، د وارێ پەترۆلێ و مژارێن دن دا ژی دێ لگەل رۆژئاڤا دا بازرگانی هێتە کرن.” گەلەک بەدەلێن لەشکەری و مالی یێن کو پەکەکێ ستاندبوون پێک ھات. لێ نەکاری ل دەرڤەیی شنگالێ ھێزەکا لەشکەری ئاڤا بکەت. ھێزێن شنگالێ ژی د بن ناڤێ حەشدا شەعبی دا ھاتن قەبوولکرن.
ئامانجکرنا پەدەکێ ژ ئالیێ پەکەکێ ڤە وەکە بیرئانینا ڤێ رێکەفتنێ دهێتە ھزرکرن و ژ بۆ سینۆردارکرنا ھەرێما کوردستانێ د بێژیتە ئیراقێ ھێژ ژی ئەز دکارم د خزمەتا وە دا بم.
پەکەکێ ئێرشی پێشمەرگە کر بوو
تێ فکرین کو کەجەکێ ژ بۆ لھەڤکرنا لگەل ئیراقێ دا ھەموو بەدەلان دێ دەت و تەنێ بخوازیت ھێزێن وێ ل ناڤەندا شنگالێ دا بمینن. چاڤدێرێن سیاسی ووسا دفکرن کو کەجەکە ئامادەیە ھەر تشتەکێ بدەتە دەولەتا ئیراقێ.
ئانگۆ پەکەکێ وێ ھەلوەستا خوەیا ئێریشکار ل ھەمبەر حکوومەتا ھەرێما کوردستانێ نیشان ددەت ل ھەمبەری ئیراقێ نیشا نادەت، دێ بەدەلان دەتە ئیراقێ. لێ بەلێ پەکەکێ د سالا بۆری دا 12 پێشمەرگە شەھید کربوون. شوورێ پەکەکێ تەنێ ژ بۆ کوردان یێ تیژە.
