سمکۆ عەبدولعەزیز
ئهڤ سەرنڤیس گۆتنا قارایلانه كو د 21 نیسانێ دە گۆتیه، د ڤێ گۆتنێ دە وسا خویا دكه کو؛ «ئهگهرێ سهرهكە یێ ئۆپەراسیۆنا داوی یا ترکیێ ل سەر هەرێمێن مەتینا، زاپ و ئاڤاشین – باسیانێ تێخە ستوویێ پارتیێن سیاسی یێن كورد ل باشوورێ کوردستانێ و ب تایبەت پارتیا دەموكراتا كوردستانێ سووچدار دكه.»
ئەڤ سەرنڤیس گۆتنهك پر جوانه لێ شرۆڤەكرنهك پر نهجوانه و چ راستى ژێ رە تونەیە .
تێ دیتن کو هەیا رادهیهكی هەر چ قاس کێم بە ژی لێ هزرا نهتهوی ل جهم قارایلان ههیه، گەر بێ و ئەو ب هەڤرێیێن خوە یێن د ناڤا کۆنسەیا پەکەکێ دە بێ بەراوردکرن. لێ وسا دبینم کو قارایلان ژ ئالیێ کۆنسەیا پەکەکێ گهلهكی هاتیه دوورپێچ كرن ب ئاوایەکی کو ب تەنێ لاشەیێ قارایلان ب خوەیە، لێ هشێ قارایلان نههشێ وییه و ل گۆر هشێ خوە داخویانیا نادە، بهلكو ل گۆر هش و خواستەکا کۆنسەیا پەکەکێ و ب تایبەت ل گۆر هشێ جهمیل بایک داخویانیا دده .
ئهڤ یەک ب ئەشکەرە ل سەر روویێ وی خوەیا دکە، ئەو پر باش فێم دکە شیرۆڤەیا وی ل سەر بوویەران دوورە ژ راستیێ، لێ دیسا ژی ب کەلەجانەک پڕ بالکێش ئاخافتنێن کو ئەو ب خوە باهوەر ناکە دبێژە .
راسته ههر تشتی سینۆرێن خوە ههنه، پێویستە ژ ئیرۆ پێ دە تەڤ پارتیێن كوردستانى ب ههموو نەرینێن جودا ژ پەکەکێ رە ببێژن ههر تشتی سینۆرێن خوە ههنه، سەبرا مە، تەحەموولا مە و هەر تشتی سینۆرێن خوە هەنە ب تەنێ ئەڤ ئیخانەتا وە ژ کورد و کوردستانێ رە یە کو ت سینۆرێن خوە تونەنە و دڤێ سینۆرەک ژ بۆ وەرە دانین، بەسە و ئێدی دەست ژ ڤێ ئیخانەتا خوە بەردن و سینۆرێن تەحەموولا مە نەجەربینن.
یا کو نها پەکەکە ل تەڤ پەرچەیێن کوردستانێ دكه نه كوردایهتیه، بهلكو جاشاتیەک مودەرنه، پەکەکە نها ب تێگەهـ و تاکتیکەک نوو جاشتیێ دكه .
پێش نها جاشتى ب ئەشكرە دهات كرن و سهرۆك جاش ب ئاوایەکی ئەشكەرە ب دهولهتێن داگیركهر رە ل دژى هێزێن شۆرهشگێرێن كوردى تەڤ دگەران، پێش نها جەحشا ب ئەشكەرە مووچه و چهكێ خوە ژ دهولهتا داگیركهر وهردگرتن، پێش نها هێزێن چهكدارێن جاشێن کورد مل ب ملێ هێزێن لەشکەرێ دهولهتێ هێرش دبرن سهر هێزێن شۆرهشگێرێن كوردى، لێ نها جیهان هاتییه گوهەرتن، ئاوایێ جاشتیێ ژی هاتیە گوهەرین، پەکەکێ ژی ل گۆر ڤان گوهەرینا گوهەرین د ئاوایێ جاشتییا خوە دە کریە و ژ جاشتیا کلاسیک بەر ب جاشتیا مۆدەرن گاڤ ئاڤێتیە.
ل گۆر تەڤ پیڤەران، یا کو پەکەکە نها د هەموو پەرچەیێن کوردستانێ و ب تایبەت ل باشوورێ کوردستانێ دکە، جاشتیە، کەسێ کو مەژیکێ وی هەبە وێ بکارە باش ڤێ یەکێ فێم بکە.
هەر کەس باش دزانە، دەما كارێ مرۆڤ بكهڤه دخزمهتا دهولهتا داگیركهر دە و دژى دهستكهفتێن نهتهوی یێن مللهتێ خوە تەڤ بگەرە، ل گۆر تەڤ پیڤەران وێ دەمێ مرۆڤ دبه جاش، پارتی و رێخستنا مرۆڤ تێ دە دبە جاش، رێبەر و سەرۆکێ پارتی یان رێخستنێ ژی دبە جاش.
گەر ئەم ل ڤڕ بپرسن گەلۆ یا کو نها کۆنسەیا پەکەکێ ل باشوورێ كوردستانێ دكه، دبه سەرۆکتیا جاشتیێ؟؟ بهلێ، دبه سهرۆك جاشتى.
چهوا دبە سهرۆك جاشتى؟؟ گهر ب كورتاسی ل بیرا خوە بینن، ل دهستپێكا سالێن 90ی دە و دهما پارلامانتۆ و حكوومهتا كوردستانێ هاتی دامەزراندن، دهولهتا توركیێ پڕ ئاجز بوو و تەڤ ههولدان کرن كو پارلامانتۆ و حكوومهتا كوردستانێ ب رێیا لەشکری ژ ناڤ ببە، لێ نەکاری وى كارى ئهنجام بده و گۆتنا سهرۆك مەسعوود بارزانى یا ب ناڤ و دهنگ لبیرا ههر ولاتپارێزەکی یە دهما گۆتى «ترك ل وێ دهمێ دكارە وەرە باشوور، دەما تانکێن وێ لسهر لاشێ من دە دەرباسی باشوور ببن.»
ل ڤڕ پرس ئەڤە: چما نها لەشکرێ ترکیێ دكارە وەرە ناڤا خاكا باشوور؟ بەرسڤ ژی وێ ئەڤ بە پەکەکە بوویه هێنجەتەک یاسایی و سیاسیى كو دهولهتا ترکیێ دەرباسی ناڤا خاكا باشوور ببە و داگیر بکە، بێی کو حکوومەتا باشوورێ کوردستانێ یان پارتیەک باشوور بکارە گاڤەکی ل دژی ترکیێ باڤێژە، ژ بەر کو پەکەکە بوویە پرا دەرباسبوونا ترکیێ و رێ ل بەر وێ خوەش دکە .
ئانکو كارێن پەکەکێ ژ ترکیێ رە دبن سەدەمێن یاسایی و سیاسی كو لەشکرێ ترکیێ وەرە ناڤا باشوورێ کوردستانێ دە، یانی ههبوونا گهریلایان ل باشوور بوویه ئهگهر كو لەشکرێ ترکیێ وەرە ناڤا خاكا باشوور و بارەگەهێن لهشكهرى لێ ساز بکە، ئانکو ئهم دكارن ببێژن: کۆنسەیا پەکەکێ بوویە سهرۆك جاشێن مۆدەرن و گهریلا بوونە مازۆتا سیاسهتا وان سهروك جاشان .
ژبهر ڤێ یەکێ ژ قارایلان رە دبێژم: راسته، ههر تشتی سینۆرێن خوە ههنه، هەیا ڤر و ئێدی بهسه جاشتى، ژ بەر کو كهساتیا ته و رابردوویێ ته دووره ژ سەرۆک جەحشان.