دارا بلەک
ھندەک بوویەر رووددن و باندۆرا وان ل سەر جڤاکی گەلەکە. لێ دەما لایەنەک ب تەنێ بوویەرا دنرخینە و ل گۆری ئایدۆلۆژیا کو دپارێزە و ھەروەھا د چارچۆڤەیا پلانەکا ئامادەکری دا تەڤدگەرە و ئاگاھداریا بەلاڤ دکە، ئەو وەک راستیەکی لێ دهێت و راستیا ھەیی ل بەر چاڤێن جڤاکی وندا دبە.
وەک تێ زانین ئەڤە دەمەکە ژ بۆ ئۆپەراسیۆنێن ترکیا ل باشوورێ کوردستانێ و ھەروەھا ژ بۆ ئالۆزیێن ل دەڤەرا شنگالێ ناڤبەرا ئارتێشا ئیراقێ و چەکدارێن پەکەکێ دا، ل باکورێ کوردستانێ ھندەک چالاکی تێنە کرن. د چالاکیێ دا ھەڤسەرۆکێ کۆنگرەیا جڤاکا دەمۆکراتیک (کەجەدە) «بەردان ئۆزتورک»، ھەڤسەرۆکێن گشتی یێن پارتیا ھەرێمێن دەمۆکراتیک (دەبەپێ) «سالحا ئایدەنیز و کەسکین بایندر»، پارلامەنتەرێن پارتیا دەمۆکراتیکا گەلان (ھەدەپە)، تەڤگەرا ژنێن ئازاد (تەژا)، ئەندامێن مەجلیسا دایکێن ئاشتیێ بەشدار دبن. ھەر سیاسەتمەدارەک، رەوشەنبیرەک، نڤیسکارەک و چالاکڤانێن کورد باش دزانن کو ئەڤ رێخستن و دەزگەھێن ناڤێ وان بۆری ھەموو نە تەنێ گرێدایێ پەکەکێ نە، بەلکو پەکەکە ب خوەیە.
چالاکی و خوەپێشاندانێن ژ ئالیێ ڤان رێخستنێن پەکەکێ ڤە تێنە کرن، پەدەکێ و بارزانیان دکن ئارمانج و وان ب تشتێن خراب تاوانبار دکن. پەدەکە و بارزانیا ب خیانەتێ تاوانبار دکن و د ھەموو خوەپێشاندانان دا دبێژن “بمرە خیانەت” واتە ڤەکری دبێژن کو بمرە “پەدەکە و بارزانی “.
د خوەپێشاندانا ل گەڤەرێ ھاتیە کرن دا، ھەڤسەرۆکا گشتی یا «دەبەپێ» «سالحا ئایدەنیز» ئاخاڤتنەک کر و د بەشەک ژ ئاخاڤتنا خوە دا گۆت: “ئەم ل ڤر بانگ ل خەلکێ باشوور دکن؛ پاراستنا دەستکەفتیێن گەلێ کورد ئەرکا ھەموو کوردان ویا کوردێن باشوور ژییە. مالباتا بارزانی و پەدەکێ ب تێکلیێن خوە یێن لگەل ترکیەیێ دا دەستکەفتیێن کوردان پێشکەش کرنە. ئەم ڤێ ھەلوەستێ شەرمەزار دکن. “
ھەروەھا ھەڤسەرۆکێ «کەجەدێ» «بەردان ئۆزتورک» ئاخڤی و د بەشەک ژ ئاخاڤتنا خوە دا گۆت: “دڤێت ئەم ل دژی ڤان و یێن بۆ بەرژەوەندیێن خوە نرخێن خوە دفرۆشن دەرکەڤن. ب سالانە تو ئەنجام ژ ئێریشێن خوە نەگرتن. دڤێت کورد ل دژی ڤان ئێریشێن تونەکرنێ ببنە یەک و ب ھەڤ را تەڤبگەرن. دڤێت گەلێ کورد کارڤەدانێ نیشانی پەدەکێ بدە کو خزمەتا ترکیەیێ دکە. قازی محەمەد 75 سال بەرێ وەسیەت کربوو. دگۆت؛ ‘ژ بۆ پارە و بەرژەوەندیێن خوە گەلێ خوە نەفرۆشن. ببن یەک ژ بەر کو بھێز بن. ھەکە ھوون ببن یەک دێ ب سەر کەڤن.’ لێ پەدەکە ئیرۆ ڤێ وەسیەتێ بنپێ دکە. لێ گەلێ کورد دێ ڤێ وەسیەتێ پێک بینە. سەکنا گەلێ مە دێ پێشەرۆژا مە دیار بکە. لەوما دڤێت ئێدی گەلێ مەیێ باشوور بێژیتە پەدەکێ ئێدی بەسە”.
ھەرکەسەک باش دزانە کو، د ڤان بوویەران دا دیتنا پەکەکێ چیە و نھا ژی ب ھەمی ھێزا خوە بەرێ خوە دایە پەدەکێ و شەرێ بارزانیا دکە. ژ ئالیەک دن ڤە گەلەک باش تێ زانین، پەکەکە د کەسایەتا پەدەکێ و بارزانیان دا شەرێ دەولەتبوونا کوردا دکە و بەرپرسێن پەکەکێ د ھەر مناسەبەتەکێ دا دژتیا خوە ژ بۆ پێڤاژۆیا دەولەتبوونا کوردا ئاشکەرا دکن و ڤەکری ژی دبێژن ئەم رێنادن ڤێ یەکێ.
بێ گومان مرۆڤ دکارە گەلەک ب درێژاھی بەحسا ڤێ سیاسەتا پەکەکێ بکە. لێ ھەر تشت گەلەک ب زەلالی ل ھۆلێیە.
ل ڤێ دەرێ پرسەک ھەیە کو گەلەک نایێ گۆتوبێژ کرن. نھا ل باکورێ کوردستانێ گەلەک پارتی، ئالیێن سیاسی و کەسایەتێن کورد دەولەتبوونا کوردا دپارێزن. ھەمی ژی ستاتۆیا باشوورێ کوردستانێ وەک دەستکەفتیەک دیرۆکی دبینن و دبێژن پیدڤییە د ھەر قادێ دا ئەڤ دەستکەفتی بهێنە پاراستن و پیدڤییە ئەم، وەک بیبۆکا چاڤێن خوە ل ڤان دەستکەفتیا خوەدی دەرکەڤن” ئەڤ ھەلوەستا ھەری راستە.
لێ مخابن ئەڤ یەک د ھەلوەست و تەڤگەرا رۆژانە دا دیار نابن و پرانیا ڤان ئالیان دەستکەفتیێن کو بەحس ژێ تێ کرن ب ئاوایێ پێویست ناپارێزن و لێ خوەدی دەرناکەڤن. ژ بەر کو پرانیا ڤان ئالیان ل ھمبەر تاوانبارکرنێن پەکەکێ د دەربارێ باشوورێ کوردستانێ دا بێ دەنگن.
گەلۆ ئەگەر کەسەک ھەولبدە تلیا خوە بکە چاڤێ مرۆڤی دا و بیبۆکا چاڤێ مرۆڤی بینیتە دەر مرۆڤ دکارە بێ دەنگ بمینە؟ ئەگەر مرۆڤ بێ دەنگ بمینە، ت واتەیا کو تشتا تێ گۆتن نامینە و گۆتن ژی ب شکە.
مخابن پرانیا ئالیێن سیاسی ل باکورێ کوردستانێ، ل ھمبەر چالاکیێن رێخستنێن گرێدایی پەکەکێ کو پەدەکێ و بارزانیا ب خیانەتێ تاوانبار دکن بێ ھەلوەستن، ل ھمبەر تەھدیدا ب ناڤێ کوردا ل سەر پێڤاژۆیا دەولەتبوونا کوردا بێ دەنگن. ئەگەر تو تشتەکی بپارێزی و کەسەک ئێریشێ بینە سەر تشتا کو تو دپارێزی، پێدڤییە تو خوەدی ھەلوەستبی و کارڤەدانێ نیشان بدەی. وەکە دن بێ دەنگییا تە ئاڤا ئاشێ ئێریشکاریێ زەدە دکە. بەلکی پێچەکێ گرانبە، لێ بێ دەنگی ب ئاوایەکێ تەئیید کرنا سیاسەتا کو پەکەکە رێڤە دبەیە.
گەلۆ ئەڤ چالاکیێن ل دژێ پەدەکێ، کۆنگرەیا جڤاکا دەمۆکراتیک (کەجەدە)، پارتیا ھەرێمێن دەمۆکراتیک (دەبەپێ)، پارلامەنتەرێن پارتیا دەمۆکراتیکا گەلان (ھەدەپێ)، تەڤگەرا ژنێن ئازاد (تەژا) و ئەندامێن مەجلیسا دایکێن ئاشتیێ دکن راستە؟ ئەگەر راستبە بلا پشگریەک ڤەکری بێ کرن. نا ئەگەر نە راستە و زەرەرەک مەزن ددە تەڤگەرا نەتەویا کوردستانی و دبە ئاستەنگ و تەھدید ل سەر دەولەتبوونا کوردا، ل دژ دەرکەڤن. پرس ئەڤقاس ئاسانە و نە پیدڤی چ نرخاندنێن کوور و دوورە.
بێ گومان گەلەک نشتمانپەروەر، سیاسەتمەدار د مەدیا جڤاکی دا ل دژێ ڤێ ھەلوەستا پەکەکێ و پرۆپاگاندایا وان یا ل دژێ پەدەکێ، ھەرێما کوردستانێ و بارزانیان دەردکەڤن و ب ئاشکەرا دیتنێن خوە دبێژن. لێ ئەم بەحسا سیاسەتا پارتیێن سیاسی، رێخستن و ئالیێن سیاسی ل باکورێ کوردستانێ دکن.
ئەگەر مرۆڤ باش بەرێ خوە بدە مالپەرێن فەرمی یێن ڤان پارتی و رێخستنا دێ پرس ھێژ زەلەتر هێتە تێگەهشتن.
