نوری چەلیک
دەم و دەزگەھێن خەلکێ ژ بۆ خورتکرن و پاراستنا بەرژەوەندییێن مللەت و وەلاتێ خوە دخەبتن.
ژ بۆ لھەڤراگرتن و تفاقا مللەتێ خوە دخەبتن و ھەول ددن چارەسەرییان ژ بۆ ناکۆکی و پرسگرێکێن د ناڤا گرسەیێن خوە دا ببینن.
ل دەرڤەیی وەلاتی و ل دیاسپۆرایێ ژ دەرڤەیی کوردان ھەما بێژن هەموو مللەت خزمەتا یەکیتییا خوە دکن و ژ بەرژەوەندییێن وەلاتێ خوە کار دکن.
گاڤا مژار دبە بەرژەوەندییێن مللەتی، ئالا و وەلات، ھەم ناکۆکی و پرسگرێکێن ناڤخوەیی ددانن ئالییەکێ و دبن یەک دەست، دبن یەک دەنگ و یەک ھێز.
بێگومان ئەڤ یەک ژ خورتبوونا ھەستێن وان یێن نەتەوی، ژ خوەناسکرن و ھزرا وانا وەلاتپەروەری دهێت.
بەرەڤاژی خەلک و مللەتێن دن، ئەم کورد چ ل وەلات بن و چ ل دەرڤە و دیاسپۆرایێ بن، ئەم چ جاران نەبوونە خوەدییێ وان ھەست و گیانێ نەتەوی کو کاربن بەرژەوەندییێن خوەیێن شەخسی، مالباتی و پارتیتی دەینن ئالییەکی و ل دۆرا بەرژەوەندییێن نەتەوی کۆم ببن.
ئەڤە ژی ھەلبەت ژ لاوازبوون، سستبوون، ژاربوون و ژ تونەبوونا ھەست و ھزرێن نەتەوی دهێت.
ھەست و ھزرێن مللەتێن دن ژ دل و مەژییێ وانە، یێ مە کوردان ژی تەنێ ب زمان و ژ زمانێ مەیە.
نە ژ دل و مەژییە، نە ب دل و مەژییە. نەتەوپەروەرییا مە نەتەوپەروەرییەک خاڤە، بێ واتە و بێ ئارمانجە.
گۆتن ھەیە لێ د کرنێ دا هیچ کەسەک ئەرک و نرخێن نەتەوپەروەرییێ نایینە جیھ.
ب زمان ھەرکەس کوردپەروەر و نەتەوپەروەرە، لێ د کار و کریاران دا بێھنا نەتەوپەروەرییێ ژ وان نایێ.
بەرژەوەندییێن مە د سەر ھەر تشتی دایە و گاڤا بەرژەوەندییێن مە بکەڤن مەترسیێ دا، نەتەوپەروەرییا مە ژی وندا دبە.
ھەلبەت بێدەولەتبوون و تونەبوونا پەروەردەیەک نەتەوی و نەتەوپارێزی د کەسایەت و نەتەوپەروەرییا مە دا رۆلەک مەزن دلیزە.
لێ گاڤا ئەم ل خەلک و مللەتێن دن دنێرن، یێن خوەدی دەولەت و بێ دەولەت ژی نەتەوپەرەست نرخ و ھێژایییێن وەلاتێن خوە نە و ھەست و ھزرێن وان یێن نەتەوی ژ یێن مە کوردان قات ب قات زێدەتر و خورتترن.
