ئامەریکا: ئەم نکارن بێژین ترکیا ئێریشی سووریێ ناکە

ئامەریکا: ئەم نکارن بێژین ترکیا ئێریشی سووریێ ناکە

 لژنەیا پێوەندیێن دەرڤە یا سەناتۆیا ئامەریکایێ د روونشتنا خوە دا بەحسا مەترسی و گەفێن ترکیێ کر، کو نیەتا ئەنقەرێ ھەیە ئێریشی رۆژئاڤایێ کوردستانێ بکە.

ھەفتەیا بۆری، سەرۆک کۆمارێ ترکیێ رەجەب تەییب ئەردۆگان چەند جاران گەفا ئۆپەراسیۆنا سەربازی ل دژی رۆژئاڤایێ کوردستانێ کر و گۆت دخوازە “ھەرێمەکا ئارام” ب درێژاھیا سینۆرێ ترکیێ لگەل سووریێ دامەزرینە. ئەو ھەرێم ژی ژ ئالیێ ھێزێن سووریا دەمۆکراتیک ڤە تێنە برێڤەبرن، کو د شەرێ دژی داعشێ دا ھەڤپەیمانێ ئامەریکایێ یە.

د روونشتنێ دا ئالیکارا وەزیرێ دەرڤە یا ئامەریکایێ بۆ کارووبارێن رۆژھلاتا نێزیک «باربارا لیف» ژ ئەندامێن لژنەیا پێوەندیێن دەرڤە یا سەناتۆیێ را راگھاند: “رایەدارێن وەزارەتا دەرڤە ژ گەفێن ترکیێ گەلەک نیگەرانن، ئەو ھەول ددن کو ڤێ ئالۆزیێ ئارام بکن. “

نوونەرا وەزارەتا دەرڤە ل سەر گەفێن ترکیا و نێرینا ئامەریکایێ ئەشکەرە کر: “”ترکیا گەلەک باش ژ نێرینا مە ئاگاھدارە. ئەم د ئاستا بلند دا لگەل وان ئاخڤینە. ھەر لڤ و تەڤگەرێن سەربازی ل سەر سینۆر بۆ سەر باکورێ سووریێ، دەستپێکێ وەلاتیان تێخیت مەترسیێ.”

ھەروھا ئەشکەرە کر: “د پلەیا دویەم دا ژی گەفەکا مەزن ل بەر ئارمانجا گرینگا ھەڤپەیمانان ساز دکە، خویایە کو ھەڤبەشێن مە ژی تێخیت مەترسیێ، لۆما ئەم ھەول ددەین ترکیێ ژ ڤێ سەرکێشیێ پاشڤە ڤەگەرینن. لێ بەلێ ئەز نکارم ببێژم کو ترکیا دێ پاشڤە ڤەکشە.”

سەناتۆرەکی دەمۆکرات ل سەر ڤێ مژارێ ژ رایەدارێن واشنگتۆنێ داخواز کر، پێدڤییە گەلەک ب زەلالی بێژن ترکیێ کو “ئێریشکرنا سەر کوردێن سووریێ، ژ ئالیێ ئامەریکایێ ڤە نایێ قەبوولکرن. وەکە ھوون دزانن نھا ترکیا گەفا وێ یەکێ دکە کو رێ نەدە ئەندابوونا فینلاندا و سوێدێ د ناتۆیێ دا، ژبەرکو ئەڤ وەلات پشتگریا کوردێن سووریێ دکن. لۆما ئەز د وێ باوەریێ دا مە کو نھا دەما وێ یەکێ ھاتیە ئەم گەلەک ب ئەشکەرە بێژین ترکیێ کو ئەڤ دەر خەتا سۆرە”.

ھەر د ڤێ روونشتنێ دا جیگرا ئالیکارێ وەزیرێ بەرەڤانی بۆ کارووبارێن رۆژھلاتا ناڤین «دانا ستروول» بەحسا وێ یەکێ کر کو ھێزێن سووریا دەمۆکراتیک (ھەسەدە) رۆلەکێ سەرەکە د پرۆسەیا تێکبرنا داعشێ دا گێرایە، کو نکارن دیسا خوە ل باکورێ رۆژھلاتێ سووریێ رێک بخن.

دانا ستروول دەستنیشان کر: “پێدڤییە ھێزێن ھەڤپەیمانان ب سەرۆکاتیا ئامەریکایێ پشتەڤانیا خوە ژ بۆ ھێزێن سووریا دەمۆکراتیک بەردەوام بکن ژ بۆ سەقامگیریا ھەرێمێ و رێلبەرگرتنا رەڤا گرتیێن داعشێ. ژ بۆ ڤێ یەکێ ژی پێدڤییە ل وان ھەرێمان ڤەژاندنا ئابۆریێ پێشڤە ببن.”

پوستێن ھەمان بەش