-درۆنێن ئیرانێ و رۆکەتێن کۆرنێتێ ل مەتینا

بەری چەند رۆژان سالڤەگەرا شەھیدبوونا وان پێشمەرگەیان بوو کو ب رۆکەتا کۆرنەتا پەکەکێ ل چیایێ مەتینا ھاتبوون شەھید کرن. ئەڤ بوویەرە چ جاران د ھشێ گەلێ کورد دا نایێ ژێبرن. ژ بەر کو نە تەنێ پەکەکە، کەس نکارە ڤێ خوینرژاندنێ ئینکار بکە. فەرماندارێ پایەبلندێ ھەپەگێ ئۆزگور ژیاندا ب بەلگەڤە ھەر تشت نیشانی گەلێ کوردستانێ دا. عەجێب بوو کو تەنێ سێ رۆژان پشتی بیرئانینا بوویەرێ، رەژیما ئیرانێ ب درۆنان ئێریشی ھەولێرێ کر. تەڤی کو ئەڤە نە جارا یەکێیە کو ئیران ب رێیا حیزبولاهێ و ملیشیایێن حەشدا شەعبی ئێریشی ھەرێما کوردستانێ دکە. لێ دەما کو ئێریش پێک ھات، سازیا نووچەیا (مھر) یا ئیستیخباراتا ئیرانێ و دەزگەھا (رۆژنیوس) یا پەکەکێ، ھەر دویان ژی نووچەیەک پارڤە کرن کو ل ڤێ جھێ مۆسادا ئیسرایلی ھەبوویە. لێ ژ بلی خەلکێ سڤیل، ترۆمبێل و خوارنگەھان هیچ کەسەکێ زرار نەدیت. نە مۆساد و نە ژی کەسەکێ دن ل ور بوو. دەما کو بوویەرەک دقەومە، چاپەمەنیا پەکەکێ ژ داگیرکەران بێھتر ئێریشی ھەرێما کوردستانێ دکە. ژ بەر کو بنگەھا ئاژانسێن نووچەیێن ئیرانێ و چاپەمەنیا پەکەکێ یەک جھە، ئەو ژ قەرەقۆلێن (ھەمزە) و (رەمازان)ێ ئیتلاعاتا ئیرانێیە.

-گەلۆ وێ کۆبانێ ببە عەفرینەک دن؟

د سالا 2018ێ دا، پەکەکێ ژ بۆ کو ھێجەتێ بدە دەولەتا ترک، خەلکێ بەلەنگازێ رۆژئاڤا ب وێنە و سەمبۆلێن ئۆجالان و پەکەکێ ئانی سەر سنۆرێ ترکیەیێ و ئارتەشا ترکان کشاند ناڤا ئاخا رۆژئاڤایێ کوردستانێ. پەکەکە ل کو دەرێ بخوازە دژمنان بینە ناڤا ئاخا کوردستانێ، وێ تشتێ ب پلانەکا خورت دکە و سڤیلان دکە مەرتالا خوە. چەند رۆژ بەرێ پەکەکێ مرۆڤێن کۆبانێ بەر ب سینۆرێ ترکیایێ ڤە کۆم کر، ل پشت وێ پلانا پەکەکێ تەنێ ئارمانجەک ھەیە، ئەڤ ژی ئەوە کو رایەدارێن پەکەکێ ژ بۆ دەولەتا ترک ئیسپات بکن کو ئەو ب راستی ژی دلسۆزێن کەمالیزمێ نە و رێ ل بەر ئەردۆگان ڤەدکن کو کۆبانێ داگیر بکە. دەما موراد کارایلان د تەلەڤیزیۆنا پەکەکێ دا گۆتی، “ئەز ل دژی بلندکرنا ئالا و سەمبۆلێن پەکەکێ یێة ل رۆژئاڤایێ کوردستانێ مە و سەبر ئۆک ژ ڤێ تشتێ بەرپرسیارە”، ئەڤ لیستکەکا پێکەنۆکە. ژ بەر کو دخوازە ب ڤێ رێکێ خوە پاقژ نیشان بدە، دلێ کوردان و دلێ دەولەتا ترک ژی نەێشینە. ئەڤ تێ واتەیا کوشتنا دو چووچکان ب کەڤرەکێ. ئەگەر سبە ترکیا مینا عەفرینێ کۆبانێ ژی داگیر بکە، دێ موراد کارایلان ب دەستێ خوەیێ راستێ ل سەر بێتێلێ بقیرە: دل ل کۆبانێ لێددە، د دەستێ وی یێ چەپێ دا ژی دەمژمێرەکا 13 ھەزار دۆلاری یا رۆلێکس ھەیە. پێدڤییە خەلک ژی نانێ ھشک بخون و ببن قوربانێ فیرعەونێن قەندیلێ. ژ بەر ڤێ یەکێ، ئەگەر سبە ترکیا کۆبانێ داگیر بکە، دڤێت گەلێ کوردستانێ حەسابا عەفرین و کۆبانێ ب ھەڤ را ژ پەکەکێ بستینە.

-A تیڤی یا ترکان و ستێرک تیڤیا پەکەکێ

د چەند رۆژێن دەرباسبوویی دا کانالا ئەی تیڤی یا ترکان ب رێیا رێزە فلمەکێ سڤکاتی ب سەرۆک بارزانی و حکوومەتا ھەرێمێ کر. ھەر چقاس ئەڤ سڤکاتی نە نوویە و ترک ژ بارزانی و کوردان نەفرەتەکا دیرۆکی دکن. ژ بەر کو ئەڤ 60 سالن بارزانی ب ھشمەندیا نەتەوپەرەستیا کوردی خەونا چەپێن ترکان و کەمالیزمێ پووچ دکە. لێ د ڤێ ناڤبەرێ دا کەس ب قاسی مەدیا و ئالیگرێن پەکەکێ کێفخوەش و ب ھەیەجان نەبوو. ژ بەر کو پەکەکە و ترک ھەڤدو تەمام دکن و یەک ئارمانج و پلانەکە وانێ ھەڤپار ھەیە، ئەو ژی رووخاندنا دەستھلاتداریا ل باشوورێ کوردستانێ یە. ئەو سڤکاتیا کانالا ئەی تیڤی ل ھەمبەری کوردان دکە، ستێرک تیڤی ژی ھەمان تشتی دکە. ئەو ب ترکییە ویا دن ژی ب کوردییە. ھەر کو رۆژ ھەلتێ، مانشەتێن رۆژنامەیێن «ئارنا و مھر»ێ ئیستخباراتا ئیرانێ و »یەنی ئۆزگور پۆلتکا« یا پەکەکێ وەک ھەڤن. ھەتا گەلەک جاران مەدیایان پەکەکێ زێدەگاڤیێ ژی دکن، ژ بەر کو خوە وەکە نوونەرا میتا ترکی و ئیستیخباراتا ئیرانێ دبینن، ژ بەر ڤێ یەکێ کێماسیێن وان ژی د دژبەریا کوردستانێ دا تژی دکن. وەکی کو کورد دبێژن: خولام و سەپانێ ئاغایێ خوە نە.

-گوھەرتنا نەخشەیا ھەرێمێ و تەسفیە کرنا تەرۆریستان

پشتی شەرێ ئوکراینا و رووسیایێ جیھان ب گشتی و ب تایبەت ژ رۆژھلاتا ناڤین د بن گوھارتنا نەخشەیان دا دەرباس دبە. ژ بەر کو ئامەریکا و ناتۆ ئێدی ب ھێسانی نکارن مەیدانێ ژ بۆ بلۆکا رووسیا-چین-ئیرانێ ڤالا بکن و دەستوورێ بدن کو فاشیزم دەست ل ھەرێمێ وەردە.

ئیرۆ باشوورێ کوردستانێ د وارێ گاز و پەترۆلێ دا ھەول ددە ببە ئالتەرناتیفا گازا خوەزایی یا رووسیا و ئیرانێ ژ بۆ جیھانا دەرڤە. سەرەدانێن سەرۆکێ حکوومەتا ھەرێما کوردستانێ نیشانەیا ڤێ راستیێیە. ب تایبەتی ژی سەرەدانا وی یا ژ بۆ بریتانیایێ. لگەل ڤان ھەموو تشتان ژی، پەکەکە مینا لەشکەرێ حەمیدیە و چاڤساخێ ئارتێشا داگیرکەران، دژمناتیێ باشوورێ کوردستانێ دکە و بوویە بەردەڤکێ ئەنیا دژمنان. پەکەکە ڤێ یەکێ ب زانابوون دکە، ژ بەر کو بنگەھا ئاڤابوونا پەکەکێ ل سەر دژمناتیا کورد و کوردستانێیە. پەکەکە چ جاران ناخوازە شەرێ دەولەتێن داگیرکەر بکە، ژ بەر کو پەکەکە ژ ئالیێ وان ڤە ھاتیە ئاڤاکرن و رێخستنەکا تەرۆریستی یا کوژەرێ زارۆک و سڤیلانە. پەکەکە نھا د تەنگاسیەکا مەزن دایە و رۆژانە جھێن خوە بەرددە و پێشکێشی دەولەتێن ترکیا و ئیراقێ دکە. د مەسەلەیا گوھەراندنا نەخشەیا ھەرێمێ و پرسا گازا سرووشتی دا، ئارمانجا ناتۆیێ ئەوە کو چەتەیێن پەکەکێ بێن تەسفیە کرن و ئێدی نەبن گەف ل سەر تەقاندنا بۆرییا پەترۆلا کوردستانێ و دەڤەرێ.

–داویا چیرۆکێن خەیالی

ب دیتنا من، ئەگەر پەکەکە شیرکەتەکا بەرهەمانینا فیلم و شانۆیێ بوویا، دا گەلەکا سەرکەفتی بە. ژ بەر کو ئەو چیرۆکێن خەیالی و دەرەوین د رۆژنامە، مەدیا و مالپەرێن خوە دا ئەوقاسی ب بالداری دئافرینن، کو چ سەناریۆنڤیسێن دنیایێ نکارن لگەل وان دا بکەڤنە د هەڤرکیێ دا. د ڤێ ناڤبەرێ دا ئەو کەسێن کو نھا ژ باوەریا وان ب وێ یەکێ ھەیە کو پەکەکە پارچەیەک ژ مەیە و ئەو ژی گرێدایی مە نە، زرارا ھەری مەزن دانە دۆزا کوردستانێ. ئەڤ چیرۆکێن خورافی و ئێکسپایەر ئێدی ژ ئالیێ چ کەسەکێ ڤە نایێن گوھداری کرن. ئەڤ 45 سالن ئەرمەنی، ئازەری، ترک و عەرەب ل سەر سەرێ کوردان کرنە پێشەنگ و رێڤەبەر و بوونە دژمنێ دیرۆکا کورد و کوردستانێ. ب ھەزاران کورد تەسفیە کرن و سپارتن ئاخێ، چیا و نەوالێن کوردستانێ کرن ناڤەندێن چەپێن ترک و رێخستنێن دژ کورد. بەلێ، ئەڤ چیرۆکێن خەیالی ب داوی بوون. ئیجار ئەو کەسێن کو دخوازن ڤان چیرۆکێن داویبوونێ نوو بکن و تێخن مەژییا خەلکێ دا، وێنەیێ رەوشەن بالیچ یێ سێ سالی، چەتین گونگور، کانی یلماز و ئەنوەر ئاتا و ب ھەزاران کوردێن دنێن ژ ئالیێ پەکەکێ ڤە ھاتنە قەتلکرن نیشانی وان بدن، دا کو خوهبدن و ژ خوە شەرم بکن!

-ئەرگەنەکۆن ل زاپێ، ئیتلاعات ل قەندیلێ

شەرێ ئیرۆ ل چیایێن باشوورێ کوردستانێ تێ کرن، چ پەیوەندی ب گەلێ کورد ڤە نینە. ل شوونا ڤێ، سەناریۆیەکا تێکچوویی یا پەکەکێ یە کو مرۆڤێن بەلەنگاز پێ تێن خاپاندن. پێشەنگێن پەکەکێ ئەڤ 45 سالن ل ھەمبەر گەلێ کورد بێ دودلی کۆمکوژی پێک ئانینە. ئەڤە 45 سالن چیا ب چیا، باژار ب باژار، گوند ب گوند، سڤیل و مرۆڤێن بێگونەھ ژ بۆ نیەتا خوەیا کرێت بکار تینن و ددن کوشتن. دەما دوران کالکانێ تەرۆریست ل سەر ئەکرانا تەلەڤیزیۆنا پەکەکێ دەردکەڤە و دبێژە: “ئەگەر ئەم پلانسازیەکا ھەڤپار ھیس بکن، ئەم دێ شەر بەینە کووراھیا باژارێن باشوورێ کوردستانێ”. ئەڤ گۆتنا کالکانێ ئەرمەنی رێ خوەش کرنە ژ بۆ ڤەژاندنا پرۆژەیا دەولەتا عۆسمانی (میساقا ملی) و پەکەکە ژی د ڤێ پلانێ دا لەشکەرا حەمدییە و چاڤساخێ ترکیایە. ل ئالیێ دن ژی ڤە، جەمیل بایک د تەلەڤیزیۆنا پەکەکێ دا دەردکەڤە و دبێژە: “ئەم چ جاران دەستوورێ نادن باشوورێ کوردستانێ کو گاز و پەترۆلێ بشینە دەرڤە.” ئەڤ گۆتنێن جەمیل بایک ژ بەریکا ئیستیخباراتا ئیرانێ دەردکەڤن. ژ بەر کو بایک ژ ئیسمایل قاعانی بێھتر دلسۆزێ رەژیما سێدارەیا ئیرانێ یە.

پەکەکە نە تەنێ ب رێکا چاپەمەنیێ ڤێ خاپینۆکییێ برێڤە دبە، لێ ئارمانجا وێ یا مەزن ئەوە کو ل باشوورێ کوردستانێ کریارێن تەرۆریستی ژی پێک بینە. مەھەک بەرێ ل دھۆکێ تۆنەک تی ئێن تێ کو پەکەکێ ژ بۆ ئەنجامدانا کریارێن تەرۆریستی و خوینرژاندنا زارۆک و وەلاتیێن سڤیل ژ رۆژئاڤایێ کوردستانێ ئانیبوو، ھاتبوو دەستەسەرکرن. پرسا ل ڤر ئەڤە: گەلۆ ب راستی گەلێ کوردستانێ پێویستی ب چەند سالێن دن ھەیە دا کو بزانبن پەکەکە رێخستنەکا تەرۆریستی یا مەترسیدارە؟ ئەوێ کەزەبا وی/وێ نەشەوتیبە، ژ ڤێ ئێشێ فێم ناکە.

دلۆڤان عەلی