مەمەت مێردینی
هێدی هێدی مژ و مۆرانا ل سەر داخویانی و تویتێن سەلاحەدین دەمیرتاشێ هەڤسەرۆکێ بەرێ یێ هەدەپێ کو نها د زندانا دەولەتا ترکیێ دە یە نامینە و هەر تشت دەشیفرە دبە، داخویانا هەری داوی یا دەمیرتاش هنەک ژ حەز و خواستەکا پەکەکێ و پلانا وێ یا ژ بۆ باکورێ کوردستانێ ئەشکەرە دکە.
هەری داوی سەلاحەددین دەمیرتاش، ل گرتیخانەیا ئەدرنەیێ ب رێیا پارێزەرێن خوە بەرسڤ دا کەنالا T24 و ل سەر تێکلیێن د نێڤبەرا هەدەپێ و پەکەکێ دە راگهاند، ت پێیوەندیا پارتیا دەمۆکراتیکا گەلان هه‌ده‌پێ ب په‌كه‌كێ ڤه تونەیە، ژ بۆی کو ڤێ ئاخافتنا خوە ب ترکان بدە قەبوول کرن ژی راگهاند، «ئەم ژ پەکەکێ داخواز دکن چەکێن خوە ل دژی دەولەتێ بێ دەنگ بکە».
ب راستی ژی په‌كه‌كه و ده‌وله‌ت دژمنن؟!
ئا راست د بنگەھێ سیاسەتا پەکەکێ دا دژبەریا دەولەتا ترک تونەیە و بەرەڤاژی ڤێ یەکێ سیاسەتا پەکەکێ ھێڤێنێ خوە ژ کەمالیزمێ دستینه و پاراستنا دەولەتێ ژ بۆ خوە کریە ئارمانجا سەرەکە. ئەڤە 40 سالن جڤاکا کورد تەخریب دکە، ھەولددە کوردان ب دەولەتا ترک ڤە گرێ بدە، داخویانیا دەمیرتاش ژی ب زەلالی ڤێ یەکێ تەکەز دکە و راستیەک دن ژی ئەشکەرە دکە، ئەو ژی ئەڤە کو هەیا نها دنێڤبەرا پەکەکێ و میتا ترکیێ دە تێکلی هەنە و بەردەوام هەڤدیتن د نێڤبەرا وان دە تێن کرن.
پێش نها ھەڤسەرۆکێ بەرێ یێ ھەدەپێ، سەلاحەدین دەمیرتاش د پاراستنا خوەیا دۆزا کۆبانێ دا بەحسا پێوەندیێن دەولەتا ترکیێ و پەکەکێ کربوو و ب ئاوایەکێ ب ڤان پێوەندیان بەرەڤانی ژ خوە کر و د دەربارێ پێوەندیێن دەولەتێ و پەکەکێ دا گۆت: «بەرپرسێن دەولەتا ترکیێ، ب بریارا کۆنسەیا ئەولەکاریا نەتەوه‌یێ ب ئەرێکرنا سەرۆککۆمار ل گەل رێڤەبەرێ پەکەکێ عەبدوللا ئۆجالان ھەڤدیتن ئەنجام دانە. د دەما ئاک پارتیێ دا 7 ھەڤدیتنێن گرینگ چێبوون. نھا ژی دبە کو ئەڤ ھەڤدیتن بەردەوامبن».
ده‌وله‌تا كوور دخوازه نه‌فه‌سه‌كێ بده په‌كه‌كێ
هن ژ چاڤدێرێن سیاسی د وێ باوەرێ دە نە کو داخوازا دەمیرتاش یا ژ پەکەکێ کو چەکێن خوە ل دژی دەولەتێ بێدەنگ بکە ژی د ڤان هەڤدیتنان دە هاتیە نیقاشکرن، تێ گۆتن کو ژ بەر تێکچووینێن بەردەوام یێن پەکەکێ ل همبەر لەشکرێ ترکیێ ل هەر ئالیەکێ، دەولەتا کوور ئا ترکیێ بریار دایە رێ ب پەکەکێ بدن نەفەسێ بستینە و هەر ت نەبە ژ بۆی راکێشانا سۆزا کوردان د هلبژارتنێن چاڤەرێکری یێن ترکیێ دە چەک بێن بێدەنگ کرن و ل همبەر ڤێ یەکێ ژی ب جورەیەکێ ژ جوران رێبەرێ زیندانکری یێ پەکەکێ بێ ئازادکرن.
هەر کەس باش دزانە نها ل باکورێ کوردستانێ ت تشت ب ناڤێ “پرسگرێکا کوردی” نەمایە، دەولەتا کوور ئا ترکیێ ب بکارئانینا پەکەکێ ئەڤ پرسگرێکا گەلێ بندەست یێ کورد ڤەگوهەراندیە پرسگرێکا ئازادیا کەسەکی، تەڤ هێڤی و داخوازێن کوردان ل باکورێ کوردستانێ ب ئازادیا ئۆجالان ڤە گرێ دانە، پەکەکێ ب سیاسەتا خوە گەل وسا تێگهاندیە کو ئازادیا ئۆجالان یەکسانە ب ئازادیا کوردستانێ!.
چاڤدێرێن سیاسی دبێژن، ئەڤ داخویانیا دەمیرتاش بەردەوامیا داخویانیێن وی یێن بەرێنە دەما گۆتی، “ژ بۆ گوھەرینێن مەزن ئامادەبن. بلا ھەرکەس دەست بدە ھەڤ و ل تەنشتا ھەڤدوو بسەکنە. پیڤانا مەیا ھەڤبەش کۆمارا دەمۆکراتە. مالا مەیا ھەڤبەش ترکیایە. دەولەتا مەیا ھەڤبەش کۆمارا ترکیایە”.
دبە کو مەبەستا دەمیرتاش ژ گوهەرینێن مەزن ئەڤ بە کو ئۆجالان بێ ئازادکرن و ب ڤێ یەکێ پەکەکێ و پارتی و ئالیێن دن یێن سەر ب وێ ڤە ڤێ یەکێ ب کوردێن باکور بدن قەبوولکرن کو ئازادیا ئۆجالان ب واتەیا ئازادیا کوردستانێ تێ، ژ بەر کو پرانیا گەلێ باکور ژ ئالیێ پەکەکێ ڤە هاتیە گێژ کرن و نکارن راستیا ب چاڤێ خوە ببینن، ئەو وسا هاتنە پەروەردەکرن کو هەر تشتێ پەکەکە دبێژە ئەو راست و دروستە و نابێ ت نیقاش ل سەر بێ کرن، بێ گومان یا پەکەکە ژی دبێژە ئەو کۆمارا دەمۆکراتیکە یا کو ترک دخوازن.
