ئامێدیێ.. جهێ په‌كه‌كه‌ رازینه‌بووی بده‌ته‌ پێشمه‌رگه‌ی، بۆ عه‌سكه‌رێ ترك چۆل كر

sora-sgere-pkk-turkey-سگێرێ-گوندێ-په‌كه‌كه‌-توركیا-دهۆك

ئارتێشا ترک دو رۆژان به‌رێ ل دەڤەرا «سۆرا سگێرێ» کو 5 کیلۆمەتران دووری ئامێدیێ یه‌ ب جهـ بوو. خەلکێ دەڤەرێ بەری مەهەکێ داخواز ژ په‌كه‌كێ کربوو کو دەردۆرا ڤی گری بۆ پێشمەرگەی بهێلن، لێ وەکە هەرجار ئەڤ داخوازا خەلکێ ژ ئالیێ په‌كه‌كێ ڤە هاتبوو رەد کرن و په‌كه‌كێ گۆتبوو: «ئەمێ هاتنا پێشمەرگەی وەکە سەدەمێ شەر ببینن و ئەمێ ئێریشی وان بکن».

ئه‌ڤ گر ل سه‌ر كیژان ده‌رێ سه‌روه‌ره‌؟

ئەڤ لووتکە ل سەر دەڤەرا «ئامێدیێ، شێلادزێ و هەیا بەرێ گارێ» گره‌کێ پر ستراتەژیکە، ژ بەر کو ل سەر ناڤەندا باژارێ ئامێدی و گەلەک جهان سەروەرە.

هەولدانا ئارتێشا ترک یا داگیرکرنا ده‌ڤه‌رێن چیایی یێن هەرێما کوردستانێ، ژ سالا 2017 ڤە ددۆمە، ب ئۆپەراسیۆنا کو ل مەها نیسانێ دەستپێکری، گرێن گەلەک ستراتەژیک کەتن دەستێ ئارتێشا ترک دە، خەلکێ هەرێما کوردستانێ ب تایبەتی خەلکێ «بەهدینان، دەشتا زێ، بارزان و برادۆستێ» کو ناکۆکی لێ زێدە بوونە، نها د وێ باوەریێ دە نە کو د ناڤبەرا په‌كه‌كێ و ئارتێشا ترک دە رێككه‌فتنه‌ك هەیە و ب دەنگەکی بلند ڤێ یەکێ دبێژن، لێ خەلک ژ بۆ کو ئاخا وان نەکەڤە دەستێ هێزێن ترک، ب دانوستاندنا ل گه‌ل په‌كه‌كێ دخوازن ئەو گر ژ بۆ پێشمەرگەی بێن ڤالا كرن.

ل ئالیێ دن په‌كه‌كە ڤێ پێشنیارا ریهسپی یێن دەڤەرێ هەر تم ب زمانەکی توند رەد دکە، وێ قەبوول نەکر کو پێشمەرگە پێشییێ ل هاتنا ترکیێ بگرە.

جڤینا ریهسپیێن ئامێدیێ و نهێلیا ل گه‌ل نوونه‌رێ كارایلان

کەسێن ناڤدار یێن ئامێدیێ و دەڤەرا نهێلێ یان، ل رۆژا کو دیتن شەر گهایە دەور و بەرێن ئامێدیێ و دەشتا زێ، وان هەول ددان پێشیێ ل داگیرکەریا ترک بگرن، هەری داوی ل داویا مەها خزیرانێ، ئانكو بەرییا 4 حه‌فتیان، ناڤدارێن دەڤەرێن ئامێدیێ و نهێلییان ل گه‌ل نوونەرێ مورات کارایلان ل بەرێ گاره‌ی هەڤدیتن پێک ئانین و داخوازیێن خوە یێن ژ بۆ دەڤه‌رێ ئانین زمان و ئاراستەیی په‌كه‌كێ کرن.

خەلکێ ئامێدیێ و نهێلییا داخواز کرن به‌ریا کو شەر بکەڤە سەر گوند و قەزا ئامێدیێ، لووتکەیێن کو دێ ترک وەرنێ رادەستی پێشمەگێ کوردستانێ بکن.

ل ئالیێ دن نوونەرێ کارایلان ب توندی ئەڤ پێشنیار رەد کر و گۆت: «ئەم کەتنا پێشمەرگەیان ل ڤر وەکە سەدەمێ شەر قەبوول دکن، دەڤەر یا مەیە، ئەگەر پێشمەرگە ژی هەول بدن وەرن ئەم دێ شەرێ وان بکن».

پشتی ڤێ هەڤدیتنێ ب قاسی مەهەکێ په‌كه‌كێ هەمان گر ژ ئارتێشا ترک رە هشتن.

د 5ێ خزیرانا 2021 دە ئەندامێن په‌كه‌كێ ب مووشەکان ئێرشی هێزێن پێشمەرگە یێن کو دخوەستن ده‌ڤه‌رێ ژ دژی داگیرکەریا ترک بپارێزن کرن، ئارمانج 5 پێشمەرگە شەهید بوون و 4 پێشمەرگە ژی بریندار ببوون.

جهێن د دەستێ دەولەتا ترک دە ژ بۆ خەلکێ دەڤەرا ئامێدیێ و نهێلێ خوەدی گرنگیەکە ستراتەژیکن، ب ڤی ئاوایی هەموو ده‌ڤه‌ر هەتا «ئامێدیێ، دێرەلووک، دێر و کانێ، دۆلا سپنە و بەرێ گاره‌ی» کەت بن کۆنترۆلا دەولەتا ترک، ب راستی ژی پشتی کو ئەڤ گر هاتیە داگیر کرن، ئێدی ناهێلە دەڤەرا بەرێ گاره‌ی ببە دەڤەرەکا ئێمن، رەز و باخچەیێن خەلکی و وارێن چه‌راندنێ تەڤ کەتنە بن کۆنترۆلا داگیرکەرێن ترک دە، ژ بەر کو ده‌ڤه‌را هاتیە گرتن ل قونتارێن نزارێ چیایێ گاره‌ی سەردەستە.

وه‌لاتیێن ده‌ڤه‌رێ ژ بۆ «داركا مازی» گۆتن: په‌كه‌كێ هەموو چیا، زۆزان و گوندێن مە رادەستی ئارتێشا ترک کرن

خەلکێ دەڤەرێ ژ وێ یەکێ پڕ عاجزن کو په‌كه‌كێ گر رادەستی ئارتێشا ترک کر لێ نەهشت پێشمەرگە ل وی گری ب جهـ ببه‌، وەلاتیێن کو وەک «دارکا مازی» ئەم پێ رە ئاخڤین گۆتن: «ب سالان مە باوەر دکر کو په‌كه‌كە ب راستی شه‌رێ ئارتێشا ترک دکە، مە دەریێ مالا خوە ژ وان رە ڤەکر، مە ئەو د ناڤا رەز و باخچەیێن خوە دە حەواندن، مە پێدڤیێن وان یێن لۆژیستیکی دابین کرن، مە ب هەموو هێزا خوە هاریکاریا وان کر، لێ ئەم دبینن کو ل «ستەنبۆل، ئامەد و باکورێ کوردستانێ» گولەیەکێ ژی ناتەقینن، تێن ل ناڤ مال و گوندێن مە ئالۆزییان ژ بۆی مە دەردئێخن، په‌كه‌كێ هەموو چیا، زۆزان و گوندێن مە رادەستی ئارتێشا ترک کرن» .

هەر وها گوندیەکی دنێ کو ئەم پێ رە ئاخڤین ژ گوندێ سەرگەلێ ژی گۆت: «په‌كه‌كێ گوهـ نەدا مە، لەشکەرێن ترک ئانین سەر گرێ سەر سەرێ مە، مە ئەوقاس رجا ژ وان کر کو پێشمەرگە ل دەڤەرێ ب جهـ ببە، لێ نەهشتن، ئیرۆ ژی ئالا دەولەتا ترک ئانین سەر سەرێ مە دانین، ئەم باش تێگهیشتن کو په‌كه‌كە و ئارتێشا ترک د ناڤ هەڤپەیمانیێ دە نه‌ و ڤێ نەیارییێ هەمبەری مە دکن».

پوستێن ھەمان بەش