” باژارێ سنە یێ رۆژهلاتێ کوردستانێ دلێ شۆرەش و سەرهلدانا جەماوەری یا ل دژی رەژیما تەهرانێ یە”
ل سەر داخوازا بانگا ژ بۆ گرەڤ و سەرهلدانا گرسەیی د بن ناڤێ “پشتگریا ژ بۆ خەلکێ سنەیێ، عەسەلوویێ و گەلێ زاهدانێ” ئیرۆ چارشەمبی 12 جۆتمەھا 2022یێ خەلکێ پرانیا باژارێن رۆژھلاتێ کوردستانێ ب قەپاتکرنا دکان و بازاری دەست ب گرەڤێ کرن، پشتی نیڤرۆ ژی ب داکەتنە کۆلانان داخوازا هلوەشاندنا رەژێما ئیسلامی یا ئیرانێ کرن.
ژ ئالیێ دن ڤە ل تەھران، ئیسفەھان، مەشھەد، کەرەج، شیراز، ساری، گیلان، گۆرگان و چەند باژارێن دنێن ئیرانێ خەلک داکەتن قادان و داخوازا ژناڤبرنا رەژیما تەھرانێ کرن و ل دژی عەلی خامنەیی سلۆگان ئاڤێتن.
ل گۆری ڤیدیۆیێن کو ل سەر تۆرێن جڤاکی ھاتنە بەلاڤکرن، گرەڤ ل باژارێن سەقز، سنە، کرماشان، بۆکان، مەریوان، بانە، دەولان و سەرپێلی زەھاو یێن رۆژھلاتێ کوردستانێ ژ سەدی سەد هاتیە ئەنجامدایین و ل باژارێن دن یێن رۆژهلات ژی پرانیا دکانان هاتنە داخستن و گەل ب نیشانەیا دیارکرنا نەرازیبوونا خوە ل دژی رەژیما تەھرانێ گرەڤ ئەنجام دایە.
چالاکیا رۆژا چارشەمبێ ب پشتەڤانیا “ناڤەندا ھەڤکاریا پارتیێن رۆژھلاتێ کوردستانێ” و ل سەر بانگەوازیا گشتی یا “جوانێن کۆلانێن تەھرانێ” و چەند گرووپێن دنە کو تێ دا داخواز ژ ھەموو گەلێن ئیرانێ کربوو ژ بۆی پشتەڤانیا “گەلێ سنە، کارکەرێن عەسەلوویێ و گەلێ زاهدانێ” ژ دەمژمێر 12:00 داکەڤن کۆلانان و خوەپێشاندانێن خوە بەردەوام بکن.
د تۆرێن جڤاکی دا باژارێ سنەیێ رۆژھلاتێ کوردستانێ وەکە “دلێ شۆرەش و سەرهلدانا گەلێن ئیرانێ ل دژی رەژیما ئیسلامی” ھاتیە بناڤکرن.
کۆمەک ژ ژنێن باژارێ مەھابادێ یێ رۆژھلاتێ کوردستانێ د داخویانیەکێ دا ژ بۆ پشتگریا سەرھلدانا گەلێ سنە، بانگ ل ھەموو ژنێن باژێر کرن کو بەشداری خوەپێشاندانا ئاشتیانە ببن کو دێ رۆژا پێنجشەمبێ 13/10/2022 ل مەیدانا چارچرا دەست پێ بکە.
د داخویانیێ دا ھات گۆتن کو خوەپێشاندان ژ بۆ پێدانا ھێز و ئیرادەیەکا تایبەتە ب گەلێ سنە و تەڤاھیا کوردستانێ و د ڤی واری دا مە ئەرکا خوە ب جھ ئانیبە.
د داخویانیێ دا بانگ ل ژنان ھات کرن کو درووشمێن “ژن، ژیان، ئازادی” و “سنە نە ب تەنێیە، مەھاباد پشتەڤانە” بلند بکن. خوەپێشاندان دێ ژ مەیدانا چارچرایێ دەست پێ بکە، ژ ور دێ ھەتا والیتیێ، ژ ور ھەتا پرا “حێکمەت” و ژ ور ژی ھەتا پرا “شەبەکەیا تەندورستیێ” دەست پێ بکە و پاشێ ژی ھەتا چارچرایێ دەوام بکە.
ژ ئالیێ دن ڤە، ڤیدیۆیێن کو ژ ئیرانێ ھاتنە بەلاڤکرن، نیشان ددن کو ژ بلی سنە و چەند باژارێن دنێن رۆژھلاتێ کوردستانێ، ل تەھران، ئیسفەھان، مەشھەد، کەرەج، شیراز، ساری، گیلان، گۆرگان و چەند باژارێن دنێن ئیرانێ، گەل ل کۆلانان داخوازا هلوەشاندنا رەژێما تەھرانێ دکن و ل دژی عەلی خامنەیی سلۆگانان بلند دکن.
ل چەند باژارێن دنێن رۆژھلاتێ کوردستانێ وەکە پیرانشار و بۆکانێ، خوەندەکار ب درووشمەیێن نەتەوەپەرەستی، ژن، ژیان، ئازادی و درووشمێن ل دژی کۆمارا ئیسلامی داکەتن قادان.
ژ ئالیێ دن ڤە “کاترین رۆسێل” رێڤەبەرا گشتی یا “یوونیسێف”ێ د رێخستنا نەتەوەیێن یەکبوویی دا د داخویانیەکێ دا راگھاند کو د خوەپێشاندانێن ئیرانێ دا ب دەھان زارۆک ھاتنە کوشتن و بریندارکرن. و د دەربارێ ڤێ مژارێ دا دلگرانیا کوور ئانی زمان.
کاترین ب تەکەزکرن ل سەر ڤێ یەکێ کو هەیا نها د خوەپیشاندانێن دژی رەژێما ئیرانێ دا ب دەهان زارۆک راستی توندیێ هاتنە و هاتنە کوشتن، ھشیاری دا کو نەتەوەیێن یەکبوویی ب پاراستنا زارۆکان ژ ھەر توندووتووژیەکێ ڤە گرێدایییە و توندیا ل سەر زارۆکان پاشگوھ ناهاڤێت.
د داخویانیێ دا بانگ ل سەکرەتەرێ گشتی یێ نەتەوەیێن یەکبوویی “ئانتۆنی گوتەرەس” ژی ھات کرن کو پشتگریێ بدە کامپانیایا پاراستنا ژیانا زارۆکان ل ئیرانێ.
ژ دەستپێکا خوەنیشاندانان ھەتا نھا زێدەتری 200 کەس بە تەقەیا راستەراستا چەکدارێن رەژێما ئیرانێ هاتنە کوشتن کو ژ وان زێدەتری 25 زارۆکن.
کرماشان:
سنە:
بۆکان:
تەهران:
تەهران:
کەرەج:
