رێخستنا چاڤدێریا مافێن مرۆڤان (هیۆمه‌ن رایتس ووچ) راگهاند، دەستهلاتدارێن ترکیێ ب سەدان پەنابەرێن سووری ب دارێ زۆرێ شاندنە وەلاتێ وان.
هیۆمه‌ن رایتس ووچ راپۆرتەک ل سەر رەوشا پەنابەرێن سووری یێن ل ترکیێ بەلاڤ کر و تێدا راگه‌هاند: «د ناڤا چەند مەهێن بۆری دا ترکیێ ب سەدان پەنارێن سووری ب دارێ زۆرێ شاندینە سووریێ».
د راپۆرتێ دا هاتیە ئەشکەرەکرن، د ناڤبەرا مەهێن سبات و تەباخێ دا، ئەنقەرێ پەنابەرێن سووری ب زۆرێ شاندنە باکورێ سووریێ.
ل گۆر زانیاریێن نەتەوەیێن یەکبوویی، هەتا نها ترکیە 15 هەزار و 149 پەنابەرێن سووری ب زۆرێ شاندنە وەلاتێ وان.
هیۆمه‌ن رایتس ووچ دیار دکەت، وەلاتیێن سووریێ یێن ب دارێ زۆرێ هاتنە ڤەگەراندن، هەردو دەستێن وان گرێداینە و بەشەک ژ وان ل هەمبەر وان توندوتیژی هاتیە کرن.
ژ بەر ناکۆکی و شەرێ ناڤخوە یێ ل سووریێ، 3.6 ملیۆن کۆچبەرێن سووری ل باژارێن جودا جودا یێن ترکیێ دژین، د مەها گولانا بۆری دە سەرۆکكۆمارێ ترکیێ رەجەپ تاییپ ئەردۆگان بریار دابوو کو ملیۆنەک پەنابەر ل باکورێ سووریێ نیشتەجیهـ بکەت، کو حکوومەتا بەشار ئەسەد ل وێ دەرێ دەستهلات نینە.
ل گۆری راپۆرتێن نەتەوەیێن یەکبوویی و هیۆمه‌ن رایتس ووچێ، هەتا نها ژی سووریه ژ بۆ ژیانێ جهەکی ئارام نینە و نابیت خەلک ب زۆرێ وەرن ڤەگەراندن.
