کوردستان زینە، لێ ئەم نەبووینە مەم

کوردستان زینە، لێ ئەم نەبووینە مەم

نووری چەلیک

نەتەوپەرەستی چیە، ئەم کورد چقاسی نەتەوپەرەستن و مە چ ژ نەتەوپەرەستییێ فێھم کریە. گەلەک پرسێن کو بێ بەرسڤ مانە، یان ژی بەرسڤێن کو ل گۆر ئایدۆلۆژی، رێباز و بەرژەوەندییێن تەڤگەر یان پارتییان ھاتنە دایین، ھەنە. لێ مە ژ وان بەرسڤان چ فێھم کریە، ئەم چقاسی لگەل وان بەرسڤان دا راستگۆ مانە، مە چقاسی ئەرکا خوە ب جیھ ئانییە، جیھێ شک و گومانێیە.

نەتەوپەرەستی حەزکرنا ملەت، گرێدانا ب خاکێ و ئەڤیندارییا نشتمانە. نەتەوپەرەستی نە حەزکرن و ئەڤینەک دەمکییە، گرێدان و ئەڤینەک کوور و بێ سینۆرە. چاوا کو مەم خوە ل سەر ئەڤینا زینێ کر، چاوا کو فەرھاد ژ بۆ شیرینێ چیا کون کرن، چاوا کو مەجنوون ژ بۆ لەیلایێ ب چۆلان کەت، و چاوا کو سیابەند ژ بۆ خەجێ جان دا، نەتەوپەرەست ژی دڤێ وەک وان ئەڤینداران ب ئەڤینەک خاس و بێ سینۆر ب ملەت، وەلات، زمان و چاندا خوە ڤە گرێدایی بن.

ملەت و نەتەو ژ یەکینەیا زمان، ئۆل، کۆک، نشتمان، دیرۆک و بەرژەوەندییێن جڤاکێ پێک تێن. کەسێن نەتەوپەرەست ئایدییەت، ھشمەندی و ھەستێن خوە ژ جڤاکا خوە دگرن. ژ بەر ڤێ، دڤێت نەتەوپەرەست وەک گۆشت و نەنووکێ ب جڤاکا خوە ڤە بێ گرێدان و نرخێن جڤاکا خوە بپارێزن، ژێ حەز بکن و خوەدی لێ دەرکەڤن. یانی، دڤێت ئەڤیندارێ جڤاک و نرخێن جڤاکا خوە بن و ژ بۆی ببن مەم، ببن فەرھاد، ببن مەجنوون و سیابەند. ھەگەر ئەڤینا ملەت و نەتەوێ د ھەست و ھەلوەستا وان دا ئاڤا نەبە و شاخ و پەرێن خوە بەرنەدە، نەتەوپەرەستی د ھش و بەدەنا وان دا ئاڤا و کامل نابە. نەتەوپەرەستییا نەکەملی و نەمەیایی مرۆڤی ژ نرخێن جڤاکا خوە دوور دخە، ھشمەندی و ھەستێن دووری جڤاکا کورد لگەل مرۆڤی فا دئافرینە و مرۆڤ داڤێژە ھەمبێزا ھشمەندی، ھەست و ئایدۆلۆژییێن بیانی.

گاڤا ئەم تێین و بالا خوە ددن نەتەوە یان کێمنەتەوەیێن دن، دبینن کو ژ چەپ و راستێن وان بگرن ھەتا ب ئۆلدار و نەۆلدارێن وان نەتەوپەرەستن. بەلکی د گۆتنێن گرۆڤەر دا خوە وەک مرۆڤ دۆست و پارێزەرێن مافێ مرۆڤان ببینن. لێ گاڤا بەرژەوەندییێن ملەت و وەلاتێ وان تێ ھۆلێ یان دکەڤن مەترسیێ، کراسێ مرۆڤ دۆستیێ ژ خوە دکن و روویێ خوەیێ راست ئاشکەرادکن. و گەلەک جاران ئەڤ نەتەوپەرەستییا وان سینۆرێ نەتەوپارێزی یان نەتەوپەرەستییێ دبەزینیت و خوە دگەهینتە ئاستا نیژادپەرەستییێ ژی. ھەر چقاسی نیژادپەرەستی ئاستا ھەری بلندا نەتەوپەرەستییێ بە ژی، ئەڤ یەک ل گۆر شەرت و شرووتێن ملەتێن سەردەست و بندەست تێ گوھەرتن. نەتەوپەرەستییا ملەتێن سەردەست وەک نیژادپەرەستی و نەتەوپەرەستییێ ملەتێن سەردەست ژی ژ بۆ ئازادییا ملەت و رزگارییا وەلات مافەکی رەوا و دووری نیژادپەرەستییێ تێ قەبوولکرن. ب کێمانی د ھزرا چەپیتییێ دا ولۆیە.

گۆر بھەشت مووسا عەنتەر ئەڤ یەک ب زمانەکی زەلال ئانیبوو سەر زمان و دگۆت :”ئەز نەتەوپەرەستەکی کوردم. نەتەوپەرەستییا من وەک نەتەوپەرەستییا نازییان، فاشیستان و توورانجییان نیژادێن دن پچووک نابینە و سەردەستییێ ل وان ناکە. ئارمانجا نەتەوپەرەستییا من ئازادییا ملەتێ منێ پەریشان و بندەستە.”

ب سەر کو ئارمانجا نەتەوپەرەستییا ملەتێن سەردەست ئازادییا وان و وەلاتێ وانە و ئەڤ یەک ژ ئالی پرانییا کوردان و پارتییێن وان ڤە کێم زێدە تێ زانین ژی، دیسا ژی ئەم خوە دووری نەتەوپەرەستییێ دگرن و ب ھزرا داگیرکەرێن خوە نێزیکی نەتەوپەرەستییێ دبن. داگیرکەرێن مە دبێژن “ئەم تەڤ مسلمانین و برایێن ھەڤن، نەتەوپەرەستی حەرامە” و ب گەلەک بەهانەیێن دن کورد ژ ھزرا نەتەوی و نەتەوپەرەستییێ دوور خستنە و دخن. ژ بەر ڤێ، چ سیاسی چ نە سیاسی، پرانییا مە کوردێن باکور د بن باندۆرا ئۆپەراسیۆنێن ھزری یێن دەولەتێ دا مانە و چاوا کو جن ژ ئاسنی دترسە، ئەم ژی ژ نەتەوپەرەستییا خوە دترسین و خوە ژێ دوور دگرن. ئەڤ یەک بوویە سەبەبێ کو ئەم کورد خوە ناس نەکن، ژ نرخێن خوە دوور بکەڤن و ب کراسێ ئەنتەرناسیۆنالیزم و ئوممەتپەرەستییێ ئینکارا خوە و دۆزا خوە بکن.

ب کورت و کورمانجی؛ نەتەوپەرەستییا مە ژ بۆ ئازادییا ملەتێ مەیێ بندەستە. نەتەوپەرەستی ژ بۆ ملەتێن سەردەست و دەولەتێن داگیرکەر چقاسی حەلال بە، ژ بۆ مە ژی ئەوقاسی حەلالە. چاوا کو ئەڤینا مەم و زینێ کوور و ژ دلێ سافی بوو، دڤێت نەتەوپەرەستییا مەیا کورد و کوردستانی ژی ئەوقاسی کوور و سافی بە.

پوستێن ھەمان بەش