ماھیر ئونال ژ ئەرکێ سەرۆکێ فراکسیۆنا ئاک پارتیێ ئیستیفا کر

سەرۆکێ فراکسیۆنا ئاک پارتیێ ماھیر ئونال راگھاند کو وی دەست ژ ئەرکێ خوە بەردایە.

ماھیر ئونال ل سەر حەسابا خوەیێ تویتەرێ راگھاند: “ژ ئیرۆ ڤە من داخوازا دەستژکاربەردانا ئەرکێ خوەیێ سەرۆکێ فراکسیۆنێ کر. ئەز ژ بۆ باوەری و بەرپرسیاریێن کو ھەتا نھا سەرۆککۆمار و سەرۆکێ مەیێ گشتی برێز رەجەب تەییب ئەردۆگان دانە من سپاسیا وی دکم. ئەز ڤێ یەکێ ب رێزداری بۆ رایا گشتی رادگەھینم.”

چەند رۆژ بەرێ سەرۆکێ فراکسیۆنا ئاک پارتیێ ماھیر ئونال رەخنە ل سیستەما کۆماری یا ترکیێ گرتبوون و گۆتبوو: “کۆمارێ زمان، ئەلفبا و ھەموو بەربەستێن مەیێن فکری ژ ھۆلێ راکرنە.”

ئەڤ گۆتنا ئونال د ناڤ خەلکێ ترکیێ و ئالیێن سیاسی دا بووبوو سەدەما نەرازیبوونان و سەرۆکێ مەھەپێ دەولەت باخچەلی د جڤینا پارتیا خوە دا گۆتبوو: “ئەو کەسێن کو دبێژن کۆمارێ زرار گھاندیە چاند زمان و بەربەستێن مەیێن فکری، د خەلەتیەکا بێ میناک و بێ بنگەھ دا نە.”