كه‌تنا ماسكه‌یێن ساخته‌

• دلۆڤان عەلی

د سالا 2014ێ دا دەما کو تەرۆریستێن داعشێ ئێریشی شنگالێ کرن، ب ھەزاران کەس رەڤاندن و قەتلکرن، دەستدرێژی کرنە سەر ھەزاران ژن و کەچێن ئێزیدی، ئەڤ بوویەر د دیرۆکا گەلێ مە دا یەک ژ بوویەرێن ھەری نە خوەش بوو.

پشترە پەکەکە ھات شەنگالێ دا کو رێ ل بەر ئیرانێ ڤەکە کو ب ھێسانی ئالیکارييان بگھینە سووریێ و وەلاتێن دن، چەتەیێن پەکەکێ ھاتن و بوون ئالتەرناتیڤا داعشێ ل شەنگالێ، ب سەدان زارۆکێن ئێزدی رەڤاندن و برن گاره‌ی، مەتینایێ، ئاڤاشین و زاپێ و کرن چەکدار، ھەروه‌ھا بوون سەدەمەکێ سەرەکە کو شەنگال ژ نووڤە نەیێ ئاڤاکرن و ئێزدی نەکارن ڤەگەرن وارێ خوە.

رۆژانە دەولەتا ترک ب بالافرێن کەشفێ شەنگالێ و ده‌ردۆرا وێ بۆمبەباران دکە و سڤیل، ژن و زارۆکان قەتل دکە، پەکەکە ئامادە یە ھنجەتان بدە ھەموو دەولەتێن داگیرکەر کو ئێریشی کوردستانێ بکن. بەریا 7 سالان د سالا 2015 دا شەنگال ب قەھرەمانیا ھێزێن پێشمەرگە ژ داعشێ ھات رزگار كرن، لێ ئیرۆ پەکەکە ل شەنگالێ ب ئاوایه‌كی خه‌رابتر ژ داعشێ ل ھەمبەری ئێزدییان تەڤدگەرە، مینا سالا 2015 و پشتی 7 سالان، ژ بۆ پاقژکرنا شەنگالێ ژ چەتەیێن پەکەکێ ئۆپەراسیۆنەکە دن پێویستە.

چەتەیێن داعشێ یێن كو سەرێ ھوجام سوورچی ژێکری کورد بوون، چەتەیێن پەکەکێ ژی سالا 2021 ل چیایێ مەتینایێ 5 پێشمەرگەیێن کوردستانێ شەھید کرن، لەوما ھەردو ژی دژمنێن ھەڤپار یێن کوردستانێ نە.

بازاڕێ سیاسی د بن ناڤێ کوردایەتیێ دا

کەسێن کو ھایا وان ژ دیرۆکێ ھەیە و ب تایبەتی ژی دیرۆکا باکورێ کوردستانێ، باش دزانن کو یێن د خورتکرنا پەکەکێ دە رۆل لیستنە، ئەو کەسن کو ل دەرڤەیی پەکەکێ د ناڤا رێخستنێن کوردستانی دا چالاکبوونە، د سالا 1978ێ دا دەما کو دەولەتێن داگیرکەر بریارا دامەزراندنا پەکەکێ دان، تێکۆشینا سیاسی یا ل باکورێ کوردستانێ خورت بوو، ژ بەر ڤێ یەکێ ژی ھەست ب خه‌ته‌ریێ کرن و پەکەکە کرن بەلایا سەرێ نەتەوه‌یا کورد.

سەردۆزگەرێ کۆمارا ترکیەیێ (باکتوگ) دبێژە: «د سالا 1972 دا دەما کو ئۆجالان رۆژنامەیا شەفەق بەلاڤ دکر، من ئۆجالان گرت، ژ ئیستیخباراتا ده‌وله‌تا ترک (میتێ) نامەیەک بۆ من ھات و گۆتن کو ئۆجالان ئەندامێ مە یە، دڤێ ل گۆری وی تەڤبگەرن، من ژی ئۆجالان سەربەست بەردا«* ئۆجالان ب خوە ژی ئینکار نەکرییە کو ئەو زه‌لامێ دەولەتا ترکە، د دانپێدانێن خوە یێن ژ حەسەن ئاتیلا ئۆگۆر را ئەشکەرە دبێژە کو ئەو ژ ھەر ترکەکی زێدەتر ترکە و خزمەتکارێ کۆمارا ترکیێ یە.

پشتی دامەزراندنا پەکەکێ، کۆمەک کەسێن کو د ناڤا رێخستنێن دن دا دخەبتین ژ بۆ بەرژەوەندیێن خوە یێن شەخسی بوونە ئەندامێن پەکەکێ، ئەڤ کەس دوور و نێزیک شریکێن وان تاوان و خوینرژاندنا پەکەکێ نە کو د ڤان 45 سالان دا ئەنجام داینە، ئیرۆ ژی ب ھەمان پۆلیتیکایا 40 سالێن بەرێ یێن کو ھەتا دوھـ ژ پەکەکێ را دگۆتن تەرۆریست، نھا دخوازن ب پەکەکێ و ھەدەپێ را تفاقێ چێبکن، ھەتا مەدیایا خوە کرنە بەردەڤکێ وان کەسان کو د بن ناڤێ رۆژنامەگەریێ دا شەڤ و رۆژ د مەدیایا پەکەکێ دا دژبەرییا بارزانی و کوردستانێ دکن.

شەرمەک مەزنە مرۆڤ ژ بۆ بەریک و بەرژەوەندیێن خوە نەتەوە و پارتیا خوە بفرۆشە، دەما کو ئەم پەکەکێ وەکە تاوانبارێ سەرەکە بحەسبینن، دڤێ ئەم ژ بیر نەکن کو ئەو پارتی و کەسێن کو ئیرۆ د بن ناڤێ کوردایەتیێ دا ب شەرمۆکی ئاپۆچێتی/پەکەکەچێتیێ دکن، شریکێن تاوان و خیانەتێن پەکەکێ نە، ژ بەر ڤێ یەکێ، ھەکە سبە رۆژێ دەرفەتەک ژ بۆ کوردان دەرکەڤە پێش و پەکەکە وەرە تەسفیەکرن، دڤێت ل سەر خوینا 40 ھەزار کوردێن بێ گونەھـ، لێپرسین و سزا ل وان کەس و پارتیان ژی وەرە کرن.

ئەنیا ل دژی بارزانی

ب سالانە ئەم ھەموو دزانین و دبینین کو ھەم داگیرکەرێن کوردستانێ و ھەم ژی ئەو کەسێن کو خزمەتکار و کۆلەیێن وانن ئێریشی سەرۆک مەسعوود بارزانی دکن، یێن کو ژ چەپەرا پەکەکێ ڤە دژمناتیا بارزانی دکن، پەروەردەیا دەستێ یالچین کوچوک، دۆغو پەرینچەک و مھر بەل نە، دەستێ وان ب خوینا ھەزاران کوردان سۆرە و دیرۆکا وان کرێت و تاری یە. ئەڤ دژمناتی خوەدی دیرۆکەکە دوور و درێژە، یێن کو ئیرۆ ل ترکیێ ب ناڤێ چەپێن ترک مەژیێ کوردان دشۆن، ھەموو کەمالیستن، مەدیایا پەکەکێ د بن کۆنترۆلا خوەندەکارێن وان دا یە، لەوما دەما ئەم ل مەدیا و رۆژنامەیێن پەکەکێ دنێرن، ژ دژمن بێتر دخوازن کوردان تونە بکن، چ ژ دەستێ وان تێ ب دلسۆزی دکن، دەولەتا کوور یا ترکیێ و ئەرگەنەکۆنێ ل سەر بنگەھا تونەکرنا کورد و کوردستانێ پەکەکە ئاڤا کرنە.

یێن کو ئیرۆ ب ھەر سەدەمێ چەپەر ل ھەمبەرسەرۆک بارزانی گرتنە و ئێرشی وی دکن، ژ دو بەشان پێک تێن:

یەکەم: ئەو کەسن کو ژ بۆ بەرژەوەندیێن خوە یێن شەخسی ل دەریێ باشوور خستنە دا کو بەریکێن خوە پڕی دۆلار بکن، لێ بەرسڤ ژ وان رە نەھاتیە دایین.

 دویەم: ژی ئەو کەسن کو بەشەکن ژ پلانا دەولەتا کوور یا ترکیێ و سازیێن ئیستیخباراتێ یێن رەژیما ئیران، سووریە و ئیراقێ، کو مل ب ملێ داگیرکەران ئێرشی سەرۆک مەسعوود بارزانی و کوردان دکن.

لێ راستیەک دیرۆکی ھەیە کو دڤێ ئەم ھەموو بزانن، سەرۆک مەسعوود بارزانی ئیرۆ نوونەراتیا ھەموو کوردان دکە ل دنیایێ، ئەو میراسگرێ شۆرەشا شێخ عوبەیدولاھێ نەھری یە ھەتا شۆرەشا مەلا مستەفایێ بارزانی، بارزانی ئیرادە و باوەرییا نەتەوه‌یا کورد ە، ژ بەرڤێ یەکێ، وەکە کو پێشییان گۆتنە: «چیا ب بایێ لەرزۆک ناھەژە».

کەتنا ماسکەیێن ساختە

رۆمان نڤیسێ ژاپۆنی ھارۆک موراکام دبێژە: «جارنا نەمرۆڤن کو دگوھەرن، ئەو ماسکە نە کودکەڤن».

ل کوردستانێ ھەر کو بوویەرەک دقەومە، روویێ راست یێ گەلەک کەسان دەردکەڤە ھۆلێ و ماسکە دکەڤن، د دەما کو کورد شەرێ ھەبوون و تونەبوونێ دکن، ب سالانە د بن ناڤێ سیاسەتمەدار، رەوشەنبیر و رۆژنامەڤانان دا کۆمەک مرۆڤ چیرۆکێن خەیالی د ئافرینن، دەما کو مرۆڤ دیرۆکا مللەتێ خوە نەخوینە، دکەڤە ناڤا چالەکە تاری یاکوور دە، ئەڤ 45 سالن پەکەکە ب ئالیکارییا ھەموو داگیرکەرێن کوردستانێ مللەتێ کورد کوژە، لێ ھن کەس دیسا ژی دخوازن خوەلیێ باڤێژن چاڤێن مرۆڤان، د ناڤ کوردان دا یەک ژ تێگینێن کو ھەری زێدە خەلک پێ تێن خاپاندن، تێگینا براکوژیێ یە، گەر مرۆڤ ل دیرۆکا جیھانێ بنێرە چ مللەت ب قاسی کوردان نەبوونە قوربانیێن چیرۆکێن خورافی و دەرەو، دەما کو پەکەکە خوە وەک ھێزەکە ترکیی ب ناڤ دکە، کوردان دکوژە، زارۆکان د رەڤینە و مللەتێ کورد تەجاوز دکە، ما براکوژی نە گۆتنەک پێکەنۆکە کو یێن سەختەکار خەلکێ پێ دخاپینن؟ دەما پەکەکە ب زانەتی بخوازە ل جیھانێ ناسنامەیا تەرۆرێ بدە کوردان، ما نە رەوا یە کو پەکەکە وەک رێخستنەکا تەرۆریست بێ پێناسەکرن؟

دڤێ گەلێ کورد بەریا ھەر تشتی ڤێ راستیێ قەبوول بکە کو یێن د بن ناڤێ سیاسەتمەدار و رەوشەنبیران دا ل نالێ دخن و ل بزمارێ ژی، ژ پەکەکێ گەلەک خەتەرترن، دیرۆکەک ب خوین یا 45 سالی ژ ئالیێ کەسێن کو بازرگانیا ل سەر خوینا زارۆکێن کوردان دکن، چ جاران نایێ پاقژکرن.  لەوما بەریا کو سەری ل پەکەکێ بدن، دڤێ ماسکەیێن سەختەکاران ژ ھۆلێ راکن، بێدەنگییا ل ھەمبەری ھەر کەسێ کو بخوازە پەکەکێ رەوا بکە، داویا وێ مرن و مالخەرابی یە.