سولەیمان ئاککۆیون
گەلەک کەس و سازی ھەر تم ل سەر “یەکیتیا کوردان” نیقاشان دکن. ئەڤ کەس ب گشتی ئەو کەسن کو نکارن ل دژی خیانەتا پەکەکێ دەرکەڤن و ب ئاوایەکی نەراستەراست ھەول ددن پەکەکێ پاک بکن. ھندەک کەس ژی ژ بەر نیەتا خوە یا باش تەڤلی ڤی کاروانی دبن، لێ ئەو وێ پرسێ ناکن کا یەکیتی چیە و ل سەر چ بنگەھێ پێک دھێت.
گەر ھوون ژدل و دورست بن، ژ بۆ یەکتیا کوردان مەرجێن ناچاری ل سەر ھەر کەسی فەرز بکن؛
1- یەکتیا کوردان یەکیتیەکە نەتەوییە و د ناڤبەرا کوردێن خوەدی داخوازەکا نەتەوی دا پێک تێ. بەریا کو لگەل رێخستنێن وەک پەکەکێ دا یەکیتیێ بپەژرینن، پەکەکێ بکێشن سەر خەتا نەتەوەیی کو مافێن نەتەوەیی داخواز بکن.
بلا دەست ژ پرۆژەیێن خیانەتێن وەکە کانتۆن/رێڤەبەریا خوەسەر بەردن، ئەڤ داخوازی یەکتیا کوردستانێ ژ ھەڤ دقەتینە. بلا پەکەکە بێژە “مافێ کوردانە کو ببن دەولەت و ئەم ژ بۆ ڤی مافی تێدکۆشن” ب کێمانی دەسپێکێ بلا سازیێن کو تایبەتمەندییێن نەتەوەیی ھەیی وەکی فەدەراسیۆنێ بپارێزە…
2- یەکتیا کوردان ب ئارمانجەک ھەڤپار و سەمبۆلێن ھەڤپار موومکنە. رێخستنێن بێ ئالایێ ھەڤبەش، نکارن ببن ھێزەکا نەتەوی و نکارن یەکیتیەکا نەتەوی ئاڤا بکن. رێخستنەکا کو ل چ وەلاتەکی جیھانێ ئالایێ خوە ناس نەکە، ھەتا ئیرۆ وەکە ھێزەکا نەتەوی نەھاتیە پێناسەکرن. د ناڤ رێخستن و پارتیێن کوردان دا تەنێ پەکەکەیە کو ئالایێ رنگین ناس ناکە و ھەر وھا ب ئەشکەرە دژمناتیا ئالا دکە. ھەگەر ھوون مجد بن، دەستپێکی پەکەکە بلا ئالایێ رەنگین وەکە ئالایێ نەتەوەیی قەبوول بکە و دەستپێکێ بلا ئەو ببە کورد. پەکەکە بێی ئاڤێتنا ڤان گاڤێن ھێسان چ جاران نکارە شەرت و مەرجێن کوردبوونێ بسەپینە. پاراستنا یەکتیا نەتەوەیی و ب رێخستنەکا کو مەرجێ ھەری بنگەھین و نەجاری یێ کوردبوونا خوە ژی قەبوول نەکە، ب ئاوایەکی ئەشکەرە زرارێ ددە کوردستانێ و کوردان دکشینە سەر خەتێن دنێن کو ب کوردایەتیێ ڤە چ پەیوەندی نەیی. ئەڤ ئیسرارا یەکیتیێ بێ واتەیە. ب رێیا پەکەکێ ھەموو کوردان مەحکوومی کۆمێن چەپێن دەولەتێن سەردەست دکە؛ میناک رەوشا ھەدەپێ.
3- ژ بۆ کو تێگھشتنێن جودا بگھێژە ئارمانجەکا ھەڤپار و ل دۆرا ڤێ ئارمانجێ یەکیتیێ پێک بینن پێویستی ب تێگھشتنەکا پرئالی و دەمۆکراتیک ھەیە. مە د بێھەژمار تەجروبەیێن خوە دا دیت کو لگەل پەکەکێ دا کو ژ بلی خوە مافێ ژیانێ نادە چ رێخستنەکا کوردستانی و نێزیکاتیا خوەیا پارتیپەرەست ل سەر ھەر کەسی فەرز دکە رێکەفتنەکا نەتەوەیی چێنابە. پەکەکە دەما کو دکەڤە ئاستەنگییا و پێویستیا وێب کوردان چێدبە، بەحسا یەکیتیێ دکە. پشتی کو دگھێژە ئارمانجا خوە، ھەر کەسی وەکی “خایین” ئیلان دکرادگەهینە و فەهما پارتیپەرەستی و فاشیستیێ پێک تینە. پەکەکە یا کو ل باکورێ کوردستانێ بێھەژمار میناکێن ڤێ یەکێ نیشان دایە، نھا ژی ھەمان فەهما سەرۆکپرەست و فاشیست ل سەر باشوورێ رۆژئاڤایێ کوردستانێ (رۆژئاڤا) فەرز دکە.
4- ژ بۆ کو ئەم بەحسا یەکتیا ناڤ مالا کوردان بکن، پێویستە کو مەدیا ژ خەتا بێ ئەخلاقیێ بهێتە پاقژکرن. بێ ئەخلاقی ئێریشی نرخێن کورد و کوردستانی دکە. د رێزا پێشییا ڤان نرخان دە؛ ئالایێ کوردستانێ، مافێ دەولەتبوونا گەلێ کورد و ھێزا پاراستنا نەتەوەیی پێشمەرگە ھەنە. چاپەمەنیا پەکەکێ بێ ناڤبەر وەکە فاشیستان ئێریشی ڤان ھەر سێ نرخێن گەل و نەتەوەیی دکە. ئەوێن کو نکارن ل ھەمبەر ڤان دەرەو و بێەخلاقییا پەکەکێ دەنگێ خوە دەرخن، ل ھەمبەر کارڤەدانێن مافدارێن مەیێن کو نرخێن کوردستانێ دپارێزن، ئێرش دکن.
تێگھشتنا کو ئێریشی مافێ “دەولەتبوونێ” دکە و وێ وەک کەڤنەپەرەستی دبینە، تێگەھا کۆلۆنیالیستانە. ئەگەر یێن ڤێ تێگەھێ تینن زمان “کورد” بن، ناڤێ وان خوەفرۆش و جەحشن…
یێ کو ل کوردستانێ ھێزەکا لەشکەری ب رێڤە ببە و ل دژی دەولەتبوونا کوردان دەرکەڤە، ئەو ھێز ھێزەکا چەتەیە.
یێن کو ئێرشی ئالایێ رەنگین دکن و یێن کو ئالا قەبوول ناکن، دژمنێن کورد/کوردستانێ نە.
ژ بەر کو پەکەکێ ئەڤ ھەموو نەرینی کرنە، ئەم تەنێ سفاتێن وان راست پێناسە دکن، بکار تینن. ئەڤ راستی گۆتن نە سڤکاتی و رەخنەیێن نە رەوانە. ھەر چقاس ھەر کەس ڤێ راستیێ دزانە ژی د بن ناڤێ “چێکەرییێ” دا ترسۆنەکتیا خوە ڤەدشێرە و ب ئەشکەرە شەلاقییێ بۆ پەکەکێ دکە…
یێن کو ئێریشی نرخێن نەتەوی دکن، نکارن ببن ھێزەکا نەتەوی؛ لگەل ھێزەکا نە نەتەوی دا یەکیتییا نەتەوەیی چێنابە…
ھەموو سفاتێن نەباش ل دژی کەسێن کو ئێریشی نرخێن نەتەوەیی دکن نایێ واتەیا سڤکاتیێ. ژ بەر کو دژایەتیا مافێ دەولەتبوونا کوردان بێعاقلی و خوە فرۆژتنا ھەری مەزنە.
رەخنەکرنا ل وان چ جاران وەک سڤکاتی نایێ دیتن، ژ بەر کو یێن بێ ئەخلاق و یێن کو ھاتنە فرۆتن چ نامووس نینە و نابە ژی…
تێبینی: گۆتار دەربرینێ ژ نێرینێن نڤیسکاری دکە.
