ھندەک بوویەرێن کو باندۆرێ ل سەر چارەنووسا ملەتەکی دکن، ھەر دەمی ل گۆرا زمانێ مەدیایێ و داخویانیێن ل ھمبەر چاپەمەنیێ تێنە دایین نایێن شرۆڤەکرن. ژ بەر کو یاریا مەزن د پش پەردێ دایە و ل ھەڤھاتنێن نەھینی رۆلا خوەیا چارەنووسزاز دگێرن.
ترکیا ھەر دەم ب ئاوایەکی ئاشکەرا دبێژە کو، ئەگەر ئێریشەک ل سەر سنۆرێ مە بهێت کرن و ئەڤ یەک ئەولەھیا مە تەھدید بکە ئەم دێ بەرسڤێ بدن. ھەر ب ڤێ ھێجەتێ ترکیا ھندەک ھەرێم ل رۆژئاڤایێ کوردستانێ و باکورێ سووریا داگیرکرنە و باندۆرا خوە ل ڤان دەڤەران پەژراندیە. ڤێجا مرۆڤ چ ناڤی ل ڤێ کریارا ترکیا بکە گەلەک نە گرینگە. ترکیا پەکەکێ دکە ھێجەت و ئێریشان دبە رۆژئاڤایێ کوردستانێ، زەرەرەک مەزن ددە سڤیلان و دەڤەرێن کو دکەڤیتێ و داگیر دکە. لێ جاردن “خوەسەریا ” ل رۆژئاڤایێ کوردستانێ و ھندەک دەڤەرێن ل سووریا ھەیی ڤێ یەکێ ئنکار دکن. ناڤێ وان چبە، ئەو پەکەکە ب خوەیە. بریارێن پەیەدێ، یەپەگێ و ھەموو رێخستنێن وان ڤە گرێدایی ژ قەندل تێنە ستاندن. د ئەنجام دا ترکیا گەلەک جارا ئۆپەراسیۆن ل دژێ بەرپرسێن پەکەکێ ل دەڤەرێ کرنە و ئەو کەس بەرپرسن و تەڤگەرا پەکەکێ ل رۆژئاڤا رێڤە دبن.
ئامەریکا چ جارا ڤەکری و ئاشکەرا ل دژێ ئێریشێن ترکیا ل رۆژئاڤایێ کوردستانێ نەسەکنیە. گەلۆ ئۆپەراسیۆنا ترکیا یا ل سەرێ کانیێ و گرێ سپی نە ب ھەماھەنگیا ئامەریکایێ چێبوو؟ لێ ل وان دەڤەران کەسەکی نەکاری ل ھمبەر ئارتەشا ترکیا و میلیشیایێن چەکدارێن سووریا کو ترکیا پشگریا وان دکە پارەستنا خاکا خوە بکە. ب سلۆگانا سیاسەت نایێ کرن. ترکیا ل عەفرنێ، سەرێ کانیێ، گرێ سپی و ھەموو دەڤەرێن کو داگیر کری بجھ بوویە، خانیا ئاڤا دکە، و رێڤەبەریا خوە ل ڤان جھا چێدکە و ل وان دەڤەرا دمینە.
ئامەریکا دبێژە: “ترکیا ب تایبەت ژ باشوورێ خوە ژ بەر گەفێن رەوا یێن تەرۆرێ ب گلییە. ژ مافێ وانە کو خوە و وەلاتیێن خوە بپارێزن.” لێ ژ ئالیەک دن دبێژن ئەم ژ بۆ ئێریشێن ترکیا ل سەر باکورێ سووریە نیگارانین. گەلەک بالکێشە، دەما دەورەیەکا پەروەردەیا یەکنیێن دژ تەرۆرا پەکەکێ ل دەڤەرا «ھەسیچا» داوی بوو، ئەفسەرەکی ئامەریکی دەرکەت ب کوردی ئاخڤی و پیرۆزباهیا وان کر و خەلات کرن. لێ پشتی دو رۆژا ترکیا ب بالافران ھەمان دەڤەر بۆمبەباران کر. دەردێ ئامەریکایێ ئەوە کو ناخوازە ئەنیا ل دژێ داعشێ ئالۆز ببە. لێ وەک دن ل رۆژئاڤا دەردێ وان نە کوردن و نە کوردستان. ئیرۆ ب سەرۆکاتیا ئامەریکایێ دا یێ شەرێ داعشێ دکە ھێزا ھەسەدێ یە.
ھەلوەستا رووسیا ڤەکریە و ئەگەر ھندەک ھەلوەستێن ترکیا نە ب دلێ وانبت ژی ئەو ژ بەر رەژیما سووریایە نە ژ بەر پەکەکێ یە. بەردەڤکێ کرملین پەترۆڤ دبێژە: “ئەم فکارێن ترکیا یێن ل سەر ئەولەھیا خوە فێم دکن و رێزێ لێ دگرن. ئەم بانگ ل ھەموو ئالیان دکن کو خوە ژ گاڤێن کو دکارن رەوشێ ب ئاوایەکی جدی بێ ئیستقرار بکن، دوور بخن. ئەڤ یەک دکارە رەوشا ئەولەھیێ ئالۆزتر بکە.” سیاسەتا ڤان ھەردو وەلاتێن کو ل سووریا و رۆژئاڤایێ کوردستانێ ب باندۆرن کفشە و تەنێ ل بەرژەوەندیێن خوە دفکرن.
بەرژەوەندیا ئامەریکا و ھەسەدێ نە ل سەر پرسا کورد دگەهە ھەڤ، ل سەر پرسا داعشێ یە. رووسیا دخوازە ھەسەدێ و ھەموو پەکەکێ ل سووریا بەر ب رەژیمێ ڤە ببە و گەلەک جارا ئەڤ یەک کریە و ھەسەدێ گەلەک دەڤەر رادەستی رەژیمێ کرینە. ئیحتمالا کو سبەھی ھەسەدە ببیتە بەشەک ژ ھێزا رەژیمێ نە دوورە و ئەڤ داخوازا ئەساسی یا رووسیایە.
پشتی تەقینا ستانبولێ یا تاقسیمێ، ترکیا ئاشکەرا دا خویاکرن کو دێ بەرسڤەکی بدە، ئەڤ لەیزتکەکا ترکیا بیت یان ژی ژ بۆ ئێریشێ بنگەھەکی ئاڤادکە، ھەموو ممکنن. لێ سیاسەتا پەکەکێ ل رۆژئاڤایی کوردستانێ سەدەما بنگەھین یا ئێریشێن ترکیا نە، و گەرەک ڤان ھێجەتا نەدن دەستێ ترکیا. پشتی ئۆپەراسیۆنا ترکیا، ئارمانجا ئێریشا گلگامێش یا دیلۆکێ و ھندەک دەڤەرێن سنۆری و کلیسێ چبوو؟ گەلۆ ئەڤە بەرسڤەکا ئێریشێن ترکیا بوو؟ یان ژ بۆ ترکیا ئارمانجێن خوە بێھتر ب جھ بکە زەمینەک بوو؟ بەرسڤا ڤێ پرسێ ڤەکری بێ دایین، دێ ئارمانجا پەکەکێ ل رۆژئاڤایێ کوردستانێ ژی ڤەکری دەرکەڤە ھۆلێ.
رەوشا باشوورێ کوردستانێ ژی ھەتا رادەیەکی ژ بۆ سیاسەتا پەکەکێ د ناڤا مەترسیەکی دایە. گەرەک ئەڤ باش بێ دتن. بەرێ خوە بدنێ، نھا ژی ئیران ئێریشێ بارەگەھێن پارتیێن کوردستانا رۆژھلات ل باشوورێ کوردستانێ دکە. د ڤێ دەربارێ دا چ تەدبیر تێنە ستاندن؟
ئیرۆ دەستکەفتیا ھەری مەزن و یەکانە باشوورێ کوردستانێ یە. دڤێت ئەڤ یەک بێ زانین و ئەڤ دەستکەفتی نەبە قوربانا ھندەک داخوازیێن رێخستنی و د ڤێ پرسێ دا گەرەک ب کووراھی بێ تێگھاندن و ئەڤ دەڤەر وەرە پاراستن. پێوستیا بنگەھین ئەوە کو، سیاسەت ل باشوورێ کوردستانێ ل سەر ئەساسێ پاراستنا ڤێ خاکێ بهێت دیزاین کرن.
رۆژەڤاکورد
