یەک ژ چیرۆکێن ھەری خوەشێن ل سەر سەرکەفتنێن سەختە و دەرەو ژ ئالیێ سلاڤۆی ژیژەک ڤە ھاتیە ڤەگۆتن.

  چیرۆک وھایە:

“ل رووسیا یا د سەدسالا 15ێ دا کو ژ ئالیێ مۆغۆلان ڤە ھاتیە داگیرکرن، جۆتکارەک و ژنا خوە ل سەر رێیەکا ئاخێ بەر ب باژارەکی ڤە دمەشن؛ شەرڤانەکی مۆغۆلی ل سەر ھەسپێ خوە ل کێلەکا وان رادوەستە و دبێژیتە جۆتکاری ئەز دخوازم ڤێ گاڤێ دەستدرێژیێ ل سەر ژنا تە بکم و دووڤ را وھا ل ئاخاڤتنا خوە زێدە دکە: “لێ ژ بەر کو ئەرد گەلەک یێ ب تۆزە، دڤێت تو (گ…نێت) من بگری داکو دەما ئەز تەجاوزێ ژنا تە دکم ئەو پیس نەبن!”

پشتی کو مۆغۆلی تەجاوز ل ژنکێ کری ژ ور دوور کەت، جۆتکاری دەست ب کەنی و تیقەتیقێ کر. ژنا وی ماتمایی ما و لێ پرسی: “گاڤا دن ل بەر چاڤێن تە دەست درێژییا سەکسی ل سەر من هاتە کرن تو چاوا دکاری بکەنی و شاد ببی؟” مێرێ وێ بەرسڤێ ددە و گۆت: “ئەز سەرکەفتم! ھێلکێن مۆغۆلی د ناڤا تۆزێ دا مابوون!”

قێرینێن سەرکەتنێ یێن پەکەکێ سەرکەتنا مێرێ ژنکێ تینە بیرا مە. د ھەفتەیا دەرباسبوویی دا گەلەک جاران نووچەیێن کو مەدیایا پەکەکێ دەرکەتن ئەڤ بوون. “ھەڤسەرۆکاتیا کۆنسەیا رێڤەبەرا کەجەکێ ژ بەر دەستکەفتنێن وان، پیرۆزباهیێ ل ناڤەندا پراستنا گەل HSM دکەت”، “فەرمانداریا HSM ژی پیرۆزباهی ل ھێزێن مەتینا کرن” و ھتد.

واتە سازیا د بن سەرۆکاتیا جەمیل بایک و بەسێ ھۆزات دا پیرۆزباهی ل ھێزێن لەشکەری یێن پەکەکێ ب پێشەنگیا مراد قارایلان کرن. چما پیرۆزباهی لێ کرن؟ “ژ بەر کو د دو رۆژان دا، د رۆژێن داوی یێن مەھا مژدارێ دا ل مەتینا و زاپێ دەربێن مەزن ل دژمن خستن.” چاپەمەنیا پەکەکێ یەک دەنگ د گۆت دژمن بنکەفت گەریلا ب سەرکەفت. دەما ئەم ل ڤان نووچەیان دنێرن، کەیفخوەشییا جۆتکارێ رووس دهێت بیرا مە کو ل بەر چاڤێن وی دەستدرێژی ل سەر ھەڤژینا وی ھاتیە کرن و کێفا وی ژ تۆزوکیبوونا (گ…نێت) مۆغۆلی دھات.

ئەو سەرکەفتنا کولمەک ئاپۆجییان و شەرفرۆشێن وان دیتی و مە نەدیتی چییە؟

پەکەکێ چ سەرکەفتن ب دەست خستنە؟

پەکەکە د شەرێ باکور دا شکەست. ل چ یەک ژ چیایێن باکورێ کوردستانێ دەھ گەریلایێن پەکەکێ تێدا نەما نە. گەر 4 لەشکەرێن دەولەتا ترک دەستێن خوە بھەژینن ژ شرنەخێ بچن جوودی، ژ ور بچن بەستایێ و ژ ور ژی بچن گابارێ، ھوون باوەر دکن کو ل ور تیمەکا گەریلا ھەبە؟ نە.

گەلۆ پەکەکە دکارە پێشی ل دەولەتا ترک بگرە کو ئەو نەکەڤن ھەرێمێن گابار، جوودی، ئاندووک و موونزوورێ؟ نە.

گەلۆ مراد قارایلان دکارە بچە چیایێن کو بەرێ ل وان چیایان لگەل سەدان گەریلایان دا جڤین چێدکر و گۆڤەند داردخست، واتە دکارە بچە بەستا، گابار و حەفتەنینێ؟ نە.

پەکەکە ژ سالا 1986ێ ڤە ل سەر سینۆرێ باشوور و باکورێ کوردستانێ کو ژ حەفتەنین ھەتا چیایێ شەکیف خاکوورکێ، ب جھ ببوو. گەلۆ پەکەکە ھێ ژی دکارە بچە وان چیا و نەوالان؟ نە.

گەلۆ پەکەکێ کاری حەفتەنین، زاگرۆس، زنارێن کێستە، مام رەشۆ، زاپ و ئاڤاشین بپارێزە؟ نە.

گەلۆ ما پەکەکێ کاری نەھێلە دژمن بکەڤە ئاخا بەرواری بالا، نێروە و رێکان، نهێل، ھەرێما مزووریا ژۆری و دەڤەرێن سندییان ؟ نە.

گەلۆ ما پەکەکێ ل باژارێن باکورێ کوردستانێ پێشیا جوانان گرتن کو تووشی مادەیێن ھووشبەر نەبن؟ نە.

ئاسیمیلاسیۆنا (بشافتنا) ل سەر کوردێن باکورێ کوردستانێ ھاتیە ئاستەنگکرن؟ نە.

ب راستی ئەم دکارن د جارەکێ دا ب سەدان پرسان بکن و ببینن کو پەکەکێ تشتەک ب دەست نەخستیە.

لێ ل گەل ڤان راستییا ژی ب سالان پەکەکە ب کادرۆ، رێخستن و مەدیایا خوە ڤە، بێ ناڤبەر دبێژە ئەم ب سەر کەتنە.

پەکەکێ ھەفتەیا بۆری ل زاپێ ژ بەر مژێ چالاکیەک ل دار خستبوو و د وێ چالاکیێ دا چەند لەشکەرەک کوشتن. ئەڤ دەھ رۆژن ل سەر وان لەشکەرێن مری پەسنێ سەرکەفتنێ ددە. بەحسا سەرکەتنا گەریلا دکن. ئەو 40 سال بوون وە ل دۆلا زاپێ گۆڤەند گرێدان، ئاکادەمی ئاڤادکرن، کۆمارا زاپێ ئیلاندکر، حکوومەتا بۆتان-بەھدینان دامەزراند، مەجلیس ئاڤا دکر و ھتد… لێ نها وە گەلییێ زاپێ و چییایێن دەردوورا وێ رادەستی دژمنی کرن و وە ئەو جوگرافی وەندا کر. گەر ھوون ھێلینا خوە ژ دەست بدن، ھوون ب دەھان لەشکەرێن دژمن بکوژن ژی دەستکەف و سەرکەفتن نایێ حەساپ.

پەکەکێ ب رۆژان ل سەر جەنازەیێ لەشکەرەکی پرۆپاگاندا دکر. ناڤێ لەشکەری ئەڤەیە، بلا مالباتا وی بهێت، جەنازە ژ مە وەربگرە، ئەم سەرکەتینە. گەر پەکەکە نە یەک لەشکەر بەلکو  سەد لەشکەران ژی بکوژە ئەو ب قاسی یێک لووتکە و پەسارێن کورە ژاری ھێژا نینە.

دەولەتا ترک ب سەدان لەشکەر و وەساییتێن لەشکەری ژ ستەنبۆل، بۆلو و قەیسەریێ ل سەر باکورێ کوردستانێ چەلێ، شەمزینان، قوولەبان را دەرباسی باشوورێ کووردستانێ دکە. ئەو دەڤەرێن پەکەکێ وەکە “ھەرێمێن پاراستنا مەدیا” ئێعلان کری ژ بۆ دژمن بوویە جھێ سەیران و تالانێ. ل باکوور ب سەدان کیلۆمەتر رێ ئانینە ناڤا ئاخا باشوورێ کوردستانێ. ئەو رێک ھەموو ژی د وان دەڤەرێن کو پەکەکە 40 سالان دەستھلاتا خوە تێ دا ئێعلان کری را دەرباس دبن. لووتکەیێن کو پەکەکێ وەکە سەمبۆلا دەستھلاتا خوە دەستنیشان دکرن ئیرۆ ئالایێ داگیرکەران لێ ھاتییە چکلاندن. جھێ بریارا پێنگاڤا 15 تەباخا 1984ێ ھاتیە گرتن ئانکو گوندێ «بێمنانش» یا دەڤەرا نێروەیی یان، بریارگەھا دووران کالکان یا 1995ێ ل گوندێ سێری (تەپە جوودی)، بریارگەھا مراد قەرایلان یا 1996ێ یا گوندێ زلیێ ناڤ نھێلییان، کۆمارا زاپێ یا ل گوندێ دێرگنی، بریارگەھا باھۆز ئەردال یا ل گەلی کورتکێ و کاڤلکا، فەرمانگەھا ھێزێن تایبەت یا ل گوندێ سینیا، جھێ لۆژیستیک، پەروەردە و سازییێن پەکەکێ ل گوندێ چەمجوو و ھتد… ھەموو ئیرۆ د دەستێ دەولەتا داگیرکەرا ترک دا نە. دژمنی رێکێن خوە د نیڤەکا بریارگەھا مراد قارایلانی را دەرباسی کوورە ژاری کرن، ھێژ ژی قارایلان بێ کو شەرم بکە بەحسا سەرکەفتنێ دکە. ھێژ پەکەکە بەحسا چ “سەرکەفتنا ” دکە. ئەو وارگەھێن کو پەکەکێ وەکە دەڤەرێن رزگارکری و تێدا مۆدەلا دەستھلاتا خوە ئاڤا دکر ئیرۆ ئارتێشا ترک تێ دا ھۆلانێ دکەت. راستە پەکەکە وەسییەتا سەرۆکێ خوە عەڤدلا ئۆجەلانی پێک تینە، وی دگۆت؛ “گەر ھوون مەجالێ خزمەتکرنێ بدەنە من ھوون دێ ببینن کو ئەز ل ھەر چار کنارێن کوردستانێ ئالایێ ترکییێ دێ دالقینم” ئیرۆ پەکەکە ژی ب ڤێ وەسییەتێ رادبە و دەڤەرێن چییایی یێن باشوورێ کوردستانێ رادەستی داگیرکەرییا ترک دکە.

دبە کو جوانێن 15-20 سالی ژ ڤان سەرکەفتنێن وە یێن دەرەو و سەختە باوەر بکن. لێ ئەڤە 40 سالێن دیرۆکا پەکەکێ ل پشت خوە ھشتی داگیرکەرییا ترک کوور کر، ئۆتۆئاسیمیلاسیۆن زێدە کر، سەمبۆل و پیرۆزییێن گەلێ کورد بێ واتە کرن، ترکبوونی وەکە پێویستییا دەمۆکراتیکبوونێ ل سەر گەل فەرز دکە و جڤاکا کوردا ل باکوور کرییە جڤاکەک نەکرۆفیل (نەخوەشیەکە کو نەساخێن وێ گەلەک حەش تەرمێن مریان دکەن) و ھتد. راستە پەکەکە ب ڤان کریارێن نەباش سەرکەفتییە. ڤێجا ھێڤییێ یە کو ئەم ژی ژ بۆ دەرەو و سەختەکارییێن وان دەستان باقوتین…

دەستەکێ پەکەکێ ل تەھرانێ، دەستێ دن ل بەغدایێ، دەستەک ل ئەنقەرێ و دەستەک ژی ل شامێ یە. لگەل ئیستیخباراتا ھەموو وەلاتێن داگیرکەر و کۆلۆنیالیست دا د ناڤ تێکلی و تفاقێ دایە. پەکەکە ھەر جھێ کەتیێ، ئاژاوەگێری، خوین، مرن، جودابوون و وێرانکاری لگەل خوە دا ئانییە. گەر پەکەکە بێژیتە ڤان کریارێن پشت خوە ھشتی “مە سەرکەفتن ب دەست خست” راستە. تەنێ سەرکەفتنەکا پەکەکێ ھەیە ئەو ژی کوردستان ژ بۆ ھەبوون و یەکپارچەبوونا دەولەتێن کۆلۆنیالیست کرییە قوربانی.

ب کورتی و کورمانجی؛ رەوشا جۆتکارێ رووس یێ کو ب گەماربوونا (گ…نێت) مۆغۆلی شاد بوویی ژ رەوشا رێڤەبەرێن پەکەکێ ب روومەتترە. قەد نەبە چ ھەڤکاریەکا ڤەشارتی لگەل تەجاوزکاری دا نەکرییە.