قەتلکرنا 5 ئەندامێن 2 مالباتێن دوھۆکێ یێن ل سەر رێیا نسێبین-مێردینێ کو ژ ھەرێما کوردستانێ ژ دەریێ سینۆرێ ئیبراھیم خەلیل درباسی باکورێ کوردستانێ بووی ژ بۆ کو بچن ئامەدێ، ژ ئالیێ گەلەک سازی و کەسان ڤە ھات شەرمەزارکرن.
ڤێ بوویەرا دلتەزین کارڤەدانێن هەری توند یێن کوردان ل تەڤ کوردستانێ ل پەی خوە ئانین، تەڤ کەسایەت، رێخستن و پارتیێن کوردان د رۆژا یەکەم دە داخویانی پارڤە کرن و نەرازیبوونا خوە ل همبەر ڤی کارێ هۆڤانە نیشان دان، لێ پەکەکە و تەڤ رێخستن و سازیێن ب سەر وێ ڤە، هەر وەک ت تشتەکی روو نەدای بێدەنگ مان، پشتی 4 رۆژان ژ نوو پەکەکە هاتیە و دخوازە وەکە هەرجار بازارەکی سیاسی ب خوینا ڤان کەسێن بوویە قوربانی بکە.
ئیرۆ ناڤەندا راگھاندن و چاپەمەنیێ یا ھەپەگێ دەربارێ قەتلیعاما ل مێردینێ داخویانیەک دا و خوەست ب ڤێ داخویانیێ ڤێ بوویەرا مەزن و دلتەزین ژ پرسەکە مەزن ئا مللەتەکی بکە پرسا ئەشیرەکی و ب ڤێ یەکێ د ئاڤا شێلوو دە ماسیان بگرە.
هەر کەس دزانە ئەڤ تاوان ل همبەر ئەشیر، هۆز یان پارتییەکێ نە بوو، ئەڤ تاوان ل ھەمبەر دو مالباتێن کوردیێن بێ گونەھ و ژار ھاتیە کرن، لێ د داخویانیا هەپەگێ دە ب زەلالی تێ دیتن کو پەکەکە دخوازە ڤێ پرسێ ژ پرسا نەتەوەیەکی ڤەگوهرە پرسا ئەشیرەکی، و ب ڤێ یەکێ ل سەر ئاتیفەیا جوانێن ژ ئەشیرا رێکانی کار بکە و وان ب خوە ڤە گرێ بدە.
ھەپەگێ راگھاند، 5 کەسێن ل مێردینێ ھاتنە کوشتن وەلاتپارێزێن ژ رێکانیێ نە و دەولەتا ترک ئەڤ ئەشیر کربوو ھەدەفا خوە. ھەپەگێ د داخویانیا خوە دە گۆت؛ “دبە کو ئەڤ کۆمکوژی ئێرشەکە کۆنترایی بە.” کوردێن ولاتپارێز چ گومان ل سەر هۆڤیتیا دەولەتا ترک تونەنە، هەر کەس دزانە دەولەتا ترک دکارە هەر تشتەکی ل دژی گەلێ کورد پێک بینە، لێ بەلێ گەر بوویەرا ل میردینێ ب زانەبوونا دەولەتا ترک ژی هاتبە پێکئانین کو هەیا نها ت تشەک خوەیا نەبوویە، ئەڤ بێئەخلاقیەکە پر مەزنە کو ڤێ ئێریشێ وەکە ئێریشا ل سەر ئەشیرەک کوردستانێ ئیزاح بکین، نابە رێ ب پەکەکێ بێ دایین ڤێ بوویەرێ بچووک نیشان بدە.
ھەپەگە د داخویانیا خوە دە دبێژە، “ئەڤ مالباتا کو ھاتیە کوشتن، وەلاتپارێزێن ئەشیرا رێکانی نە و گەلەک جاران گوند و ھەرێمێن وان بوونە ھەدەفا ئێریشێن دەولەتا ترک و د ڤان ئێریشان دە گەلەک ژ وان شەھید کەتنە. ژ بەر کو ئەڤ مرۆڤێن مە د ھەدەفا دەولەتا ترک دە نە، تێ دیتن کو بوویەرا داوی یا ل مێردینێ بوویەرەکە تارییە.” ل ڤڕ ئەڤ پرس سەرهلددن، گەلۆ گەر ووسا بە ژی قەی کێ گەلێ رێکان کریە هەدەفا ئێریشێن دەولەتا ترک؟ کییە ئەڤ 31 سالە ناهێلە گەلێ رێکان ڤەگەرە سەر گوندێن خوە؟ کییە گەلێ رێکان نەچار کری کو ل دووری گوند و وارێن خوە بژین؟ ما نە هەر پەکەکە ب خوە یە؟
31 سالن پەکەکێ ئەردێ ئەشیرا رێکان داگیر کریە، د ناڤا گوندێن ڤێ ئەشیرێ دە خوە ب رێخستن دکە، دەڤەر کریە دەڤەرەکە ئەسکەری، پەروەردەیا لەشکەری ددە چەکدارێن خوە و وان دشینە ناڤا سینۆرێن دەولەتا ترکیێ، دو گولـلەیان ل قەرەقۆلێن ترکیێ دبارینن و ڤەدگەرن باشوورێ کوردستانێ، دەولەتا ترک ژی تێ و ب ڤێ بەهانەیێ نە ب تەنێ ئەردێ ڤێ ئەشیرێ بەلکو هەموو باشوورێ کوردستانێ دکە ئارمانج، د ڤێ یەکێ دە سووچا ترکیێ چبە، یا پەکەکە ژی ئەوە.
دەما پەکەکە دچە و د ناڤا سینۆرێ ترکیێ دە چالاکیەکی دکە، نابە ل بەندێ بە دەولەتا هۆڤ یا ترک ب گول بەیبوونا بەرسڤا وان بدە، بەلێ، دەما تو گولـلەیێن چەک ل ئەسکەرێ ترک درەشینی ئەو ژی دێ ب چەکێن د دەستێ خوە دە بەرسڤ بدن، وێ ب تانک تۆپ و هەر چەکەک دن بەرسڤ بدە، ئەڤەیە سەدەم کو چەندین کەس ژ ئەشیرا رێکان بووینە قوربانیێن ڤی شەرێ سەختە یێ د نێڤبەرا پەکەکێ و دەولەتا ترک دە.
