ئەندامێ کۆمیتەیا رێڤەبەرا پەکەکێ موراد قارایلان بەشداری “بەرنامەیا تایبەت” یا ستێرک تیڤی بوو و ل سەر پێشهاتێن هەری داوی نرخاندن کرن، د ئاخفتنا خوە یا ژ بۆی ستێرک تیڤی، قارایلان ب ئاوایەکی نەراستەراست دانپیدانێ ب شکەستنا پەکەکێ ل همبەر لەشکرێ ترکیێ و رادەستکرنا ئاخا باشوورێ کوردستانێ ب ڤێ دەولەتا داگیرکەر دکە.
قارایلان: “رەوش باش نەھاتیە فێمکرن. مرۆڤ کو ببێژە دژمن رەڤیا، ژ زاپێ چوو و دەرکەت نە راستە.”
قارایلان د بەرسڤا یەکەمین پرسیارا نووچەگهانێ ستێرک تیڤی دا کو تێدە پرسیار ل وی کر “ل زاپێ شەرەکی گران ھەیە. ل گەلەک دەڤەران دژمن چەکێن کیمیەوی ھین ژی ب کار تینە. ل ھنەک جھان پاشڤە ڤەکشیان. رەوشا نھا یا ل زاپێ چیە؟” دە بەرسڤەک پر بالکێش دا، قارایلان ب ڤێ بەرسڤا خوە ب ئاوایەکی نەراستەراست ئەشکەرە کر کو بەرەڤاژی وێ یەکێ یا کو د مەدیایا پەکەکێ دە تێ باسکرن، لەشکرێ ترکیێ پاشڤە ڤەنەکشیایە و ل همبەر گەریلا راستی شکەستنێ نەهاتیە، بەلکو پاشڤەڤەکشینا وان تاکتیکە. کارایلان ب ڤی ئاوا بەرسڤ دا، “ئەم دنێرن کو رەوش باش نەھاتیە فێمکرن. مرۆڤ کو ببێژە دژمن رەڤیا، ژ زاپێ چوو و دەرکەت ژی نە راستە. لێ مرۆڤ ببێژە وسا ھەر دەر گرتیە و حاکم بوویە ئەو ژی نە راستە.”
قارایلان گۆت، “وەکە تێ زانین دەستپێکێ ل حەفتەنینێ، شەری 3 سالان بەرێ دەستپێ کر، سالەکێ بەردەوام بوو. یانی سالا 2020یێ. و سالا 2021 و 2022 ژی دەولەتا ترکیەیێ دخوازە ھەرێمەکا بەرفرەھ یا ئاڤاشین، زاپ، ھەردو ئالیێن زاپێ و بەشەکێ مەتینا داگیر بکە. ئەم ژی ل ھەمبەری ڤێ ل بەر خوە ددن. ب ڤێ بەرخوەدانێ ئەم ئاخا باشوورێ کوردستانێ دپارێزن.” گەلۆ ب راستی ژی قارایلان باسی کیژان بەرخوەدانێ دکە؟ چەوا ئاخا باشوورێ کوردستانێ دپارێزە؟ قەی بەرخوەدان و پاراستن ب ڤی ئاوایی تێ کرن؟ گەر قارایلانێ دەرەوکەر راست دبێژە و ل بەر خوە دایە و ئاخا باشوور پاراستیە، چما نھا لەشکەرێ ترک ل سەرێ چییایێ کورەژارییە؟ چما ئارتێشا ترک ل چییایێ رەشە؟ چما ئارتێشا ترک ل چییا زەرکییە؟ چما ئارتێشا ترک ژ چەلێ ھەیا ناڤا گوندێن نێروەیی و رێکانی و نهێلیان رێکێن قیرکری چێکرینە؟ چما ئارتێشا ترک پرا بالۆکان چێدکە؟ ئەگەر قەرەیلان ل همبەر ئارتێشا ترک ل بەر خوە دایە، چما نکارە بچە خنێرە، خاکورکێ، ئاڤاشین، حەفتەنین، زاپێ و دەڤەرێن “پاراستنا مەدیا”؟
سیفاتەکی کەسێن دەرەوکەر هەیە کو دەما دەرەوەکی دکن، هنەکی ژ خوە شەرم دکن، نکارن راستەراست ل چاڤێن مرۆڤ بنێرن و بئاخڤن، ئەو پر خاڤ دبن، لێ ژ بەختێ رەشێ کوردان، هەر چ قاس قارایلان و رایەدارێن دن یێن پەکەکێ دەرەوان دکن و گەلێ کورد پێتر دخاپینن، پێتر خوە توند دکن، سەرێ خوە پێتر بلند دکن و ل چاڤێن هەر کەسی دنێرن و دیسان دەرەوەکە دن ئا پڕ مەزنتر دکن.
قەی ب دەرەو و ڤڕان بەرخوەدان دبە؟
قارایلان دیسا دبێژە، “سالا 2022یێ دژمن خوەست ئالیێ زاپێ ب تەمامی داگیر بکە. ژ بۆ ڤێ ھات. لێ بەلێ ل رۆژئاڤایێ زاپێ دژمن یەک سەنگەرەکی گەریلا ژی نەگرت. نەکاری جهەکی ب تەنێ ژی بگرە. نەکاری تونەلەکا ب تەنێ ژی بگرە.” ئەی هاوار، ئەڤ چ دەرەون کاک قارایلان؟ گەلۆ چیا زەرکی، چیا رەشکی، سەرێ پراسیا، گرێ ئێف ئێم، سێری کو هوون ژێ رە دبێژن “تەپێ جوودی” دکەڤن کوو دەرا زاپێ؟ ئەڤ جی نها د دەستێ کێ دە نە؟ چما تو قالا وان ناکی؟ گەلۆ دەولەتا ترک چەوا دکارە ژ سەرێ زێری ل دەشتانێ رێکێ ببە سەرێ مەتینی “پەراسیان”، هەلوە، دێرکێ، ئاڤسارکێ و ژێهەل بەر ب سەرێ مەتینا؟ ما ئەڤ نە رۆژئاڤا زاپێ یە، گەر هوون ل ورن و وەکە هوون قال دکن شەرەک گران ل ور هەیە، چەوا دەولەتا ترک ب یەک حەفارە و بلدۆزەر دکارە ووسا ب هێسانی رێیان ژ لەشکەرێ خوە رە چێکە؟
ئەی گەنەرالێ سەختە، پشتی کۆنگرەیا پێنجەمین ئا پارتیا تە، گوندێ سێری یێ دەڤەرا نهێلیان بریارگەها ناڤەندییا تەیا ئەول بوو ل سالا 1995ان، گوندێ سێری و گوندێ زلیێ ئەوێ لبەر ئاڤا زێ، تەڤ د دەستێن وە دە بوون، گەلۆ نها د دەستێ کێ دەنە و ئەڤ جی دکەڤن کیژان بەشا زاپێ؟ بلا قارایلان وەرە و بەرسڤ بدە، قەی ب دەرەو و ڤڕان بەرخوەدان دبە؟
کا ئەو کۆچکا وە یا ژێ رە دگۆت “کۆچکا شین” نها د دەستێ کێ دەیە؟
گەلۆ تونەلا وەرخەل، تونەلا سیدا، تونەلا خالکان، تونەلا دۆلا کارکەران تونەلا بانیا مازی، دکەڤن کی دەرێ کو تو دبێژی، “ل رۆژئاڤایێ زاپێ دژمن یەک سەنگەرەکی گەریلا ژی نەگرت. نەکاری جهەکی ب تەنێ ژی بگرە. نەکاری تونەلەکا ب تەنێ ژی بگرە.”؟ تە چقاس جوانێن کورد د ڤان تونەلێن مرنێ دە ب کوشتن دان؟ کا ئەو کۆچکا وە یا ژێ رە دگۆت “کۆچکا شین” نها د دەستێ کێ دەیە؟
قارایلان هەر وەها دبێژە، “290 رۆژن عەگیدێن مە ل کەلەھا چەمچۆ ل بەر خوە ددن. ناھێلن لەشکرێن ترکیێ ل گر ب جھ ببن. ھەری زێدە 400 مەترۆ نێزی گر بوونە، وەکی دن نێزیک نەبوونە.” ب راستی ژی حەق ئەڤە مرۆڤ ڤێ پرسێ ژی ژ قارایلان بکە، گەلۆ ما چەمچۆ چقاس ژ باکورێ کوردستانێ دوورە کو وە ئاخا باشوور پاراستبە و نها ترکیە ب تەنێ 400 مەتران دووری وێ بە؟ ما ئەڤ نە شکەستنەکە کو تو ب تاما سەرکەفتنێ ب کورێن هەژار دفرۆشی؟
قارایلانێ درەوکەر تو دبێژی، ” مە بەرێ سۆز دا کو ئەمێ ھەر دەرێ کوردستانێ بپارێزن.” لێ تو ژ ئامەد، دێرسم، گارزان، زاگرۆس و بۆتانێ ڤەکشیایی. ل باکور یەک دەنگ ژ تە نایێ. ل باشوور وە زاپ، ئاڤاشین، چیایێ رەش، چییایێ کۆلن، کورەژار، چییا زەرک، گرێ مەرینا “جەھەنەم” ھەیانی سۆرا سگێرێ دا دەولەتا ترک. لێ دیسا تو باسی بەرخوەدان، پاراستن و عەگیدیێ دکی؟ ما پاراستنا ولات ب ڤی ئاوایە؟
قارایلان بەرێ گۆتبوو، “لەشکەرێن ل گوندێ سگێرێ یان دێ بچن، یان ژی دێ ھەموو ل ور بمرن”. لێ نها دبێژە، “راستە، مە ئەو ھەڤۆک ژ بۆ لەشکەرێن ل گرێ ئامەدیێ ئانگۆ ژۆری گوندێ سێگرێ ھاتبوون بجھکرن گۆتبوو. ئەم ت گۆتنەکە کو نکاربن بکن نابێژن. ئەو ھەقیقەتەک بوو. ھەڤالان ھنەک دەرب لێ خستن، وان ژی دیت کو دبە ونداھیێن زێدە بدن، ترسیان و باوەرم د 11ێ مژدارێ دە ب بالافرێن شەر ل وان دەردۆران خستن. ل ژۆری گوندێ سەرگەلێ و وان دەڤەران ھەموویان ئێریشێن ھەوایی کرن. د بن وێ ئێریشێ دە رەڤیان چوون. مە ب خوە زانیبوون، مە تەخمین کر کو وێ بچن. ژ بۆ وێ ژی ئەم خوە رەخنە دکن، ئەم رەخنەیا وێ ددن. دڤیابوو کو مە ئەڤ دژمن بەرنەدا. ب ساخ بەرنەدا، یا بگرتا یان ژی بکوشتا. ل گۆری مە دەرفەتێن وێ ھەبوون. ژ بۆ وێ نھا د ناڤا مە دە مژارەکە رەخنەکرن و رەخنەداینێ یە.” ل داویێ ئەم ژ قارایلان دپرسن، گەلۆ چما وە ئەڤ سۆزا خوە بجی نەئانی، کێ رێ لە وە گرت، چما وە ئەو لەشکەر ب ساخی بەردان ئەگەر دەرفەتێن وە هەبوون وان بکوژن؟ ما مژارا رەخنەکرن و رەخنەدایینێ یا د ناڤا وە ب خوە دە دێ ببە چارەسەر؟ دێ ببە بەردێلا وێ خوینا جوانێن کورد کو ل ور هاتی رشتن؟
بەسە، ژ کەرەما خوە دەڤ ژ کوردستانێ بەردن و زێدەتر نەدن دەستێ دەولەتا داگیرکەرا ترک، تو ل سگێرێ چ دکی، چ کارێ تە ل چەمچۆ ھەیە؟ وە دەولەتا ترک ب دووڤێ خوە ڤە گرێدایە، کی دەرێ دەولەتا ترک دخوازە تو بەرێ وان ددی ور. ئەو ئارتێشا ترک ژ بۆلویێ تێن شێلادزێ و کانی ماسێ یەک فیشەکێ ناهاڤێژیێ، ڤێجا ھوونێ چەوا دەولەتا ترک تێک ببن؟ پیچەک شەرم بکن کەس ب ڤان مەتەلۆکێن وە ناخاپە.
