سەرۆکێ هەرێما کوردستانێ نێچیرڤان بارزانی، ژ بۆ دەربرینا هەڤسۆزی و هەڤخەمیا خوە ژ بەر ئەردهەژا 6ێ سباتێ، ئیرۆ گهیشت دیلۆکا باکورێ کوردستانێ و د داخویانیەکێ دە راگهاند، ژ بەر ڤێ کارەساتا ل ڤر چێ بوویە، ل هەرێما کوردستانێ د هەر مالەکێ دە شینی هەیە.
سەرۆکێ هەرێما کوردستانێ نێچیرڤان بارزانی ئیرۆ سێشەمێ 14ێ سباتا 2023 سەردانا چەند باژارێن باکورێ کوردستانێ و وان هەرێمێن ئەردهەژێ كر كو زرارەکە مەزنا جانی و ماددی گهیشتیە وان دەران.
سەرۆکێ هەرێما کوردستانێ نێچیرڤان بارزانی ل دیلۆکێ سپاسیا سەرۆکێ شارەداریا دیلۆکێ کر و گۆت، سەردانا وی ژ بۆ دیلۆکێ و هەرێمێن ئەردهەژێ ژ بۆ نیشاندانا هەڤخەمیێ و وەفاداریەک ژ بۆ خەلکێ مەخدوورە.
نێچیرڤان بارزانی ل دیلۆکێ گۆت: دخوازم ژ گەلێ ترکیێ و مەخدوورێن ڤێ بوویەرێ رە ببێژم کو ئەم ژ بۆ هەڤخەمیێ هاتنە.
نێچیرڤان بارزانی ل سەر ناڤێ سەرۆک بارزانی و خەلکێ هەرێما کوردستانێ ژ مالباتێن قوربانیێن ئەردهەژێ رە سەرساخی خوەست و هێڤی کر کو بریندارێن ئەردهەژێ د دەمەکە نێزیک دە باش ببن.
سەرۆکێ هەرێما کوردستانێ هەروها گۆت: «ژ بەر ڤێ کارەساتا ل ڤر چێ بوویە، د هەموو مالێن کوردستانێ دە تازی هەیە» و تەکەز کر، «ل گەلەک باژار و دەڤەران ژی شاهی و پیرۆزباهی هاتنە راوەستاندن».
د بەشەکە دن یا ئاخافتنا خوە دە، نێچیرڤان بارزانی راگهاند، هەرێما کوردستانێ ل گۆر شیانێن خوە ئالیکاری شاندنە و سازیێن هەرێما کوردستانێ دێ ل سەر شاندنا ئالیکاریان بۆ مەخدوورێن ئەردهەژێ بەردەوام بن.
هەر ئیرۆ سەرۆکێ هەرێما کوردستانێ سەردانا ئەنقەرەیێ دکە و ب وەزیرێ دەرڤەیێ ترکیێ مەڤلوت چاڤوشۆگلو رە دجڤە. نێچیرڤان بارزانی دێ پاشێ ڤەگەرە هەرێما کوردستانێ.
رۆژا یەکشەمێ 12ێ سباتا 2023ان سەرۆکێ هەرێما کوردستانێ نێچیرڤان بارزانی ژ بۆ نیشاندانا هەڤخەمیا خوە ژ بەر ئەردهەژا 6ێ سباتێ یا ل باکورێ کوردستانێ و ترکیێ، سەردانا کۆنسولخانەیا ترکیێ یا ل باژارێ هەولێرێ کر و د تۆمارا تایبەتا سەرساخیێ یا کۆنسولخانەیێ دە پەیامەکە هەڤخەمیێ نڤیساند.
