سه‌لاحه‌ددین دەمیرتاش سیاسەتمەدارەکێ کوردێ ناسکری یە و د بنكه‌فتنا کوردان د هه‌لبژارتنێن 14 و 28ێ گولانێ دا خودان بەرپرسیاری یە.
ل سالا 2007 بوو پارلەمانتەر و ب شێواز و کاریزمایا خوه، بال کشاند سەر خوە.
کوردێن كو ژ قەندیلێ و هەلوەستا دۆگماتیک و سار یا په‌كه‌كێ یا کو 40 سالن هەمان تشتی دبێژیت بێزار بووین، ل دۆرا وی کۆم بوون. یەکەم جار ل باکورێ کوردستانێ سیاسەتمەدارەک ژ ئۆجالان پتر دهێته حەز کرن. ژ بۆ ڤێ یەکێ ژی دەم ب دەمی نه‌رازیبوونێن ئۆجالان و په‌كه‌كێ وی كێشانه سەر خوە. لێ هەم دەولەتێ هەم ژی په‌كه‌كێ دۆرا دەمیرتاش گرتن و خوەستن ڤێ کاریزمایێ ژ بۆ بەرژەوەندیێن خوە بکار بینن.
د شیا کوردان ل دۆرا خوە كۆم بكه‌ت و ببیته هێڤیەکا نوو
د شیا کوردان ل دۆرا خوە كۆم بكه‌ت و ببیته هێڤیەکا نوو. لێ ل شوونا کو ڤێ بکەت، وی خوە هاڤێت ناڤ زڤرۆکا ترکبوونێ دا د سیاسەتا قوربانیكرنا کوردان دا ژ بۆ دەمۆکراتیکبوونا ترکیەیێ، بوو ناڤێ هەره ناسیار. روویێ خوە ژ کوردان زێدەتر بەر ب ترکان و چەپێن ترکان ڤە زڤراند.
ل سالا 2015ێ ترکیە بەر ب گوهەرتنا سیستەمێ ڤە دچوو، ل 17ێ ئادارا 2015 دە دەما کو هەڤسەرۆکێ هه‌ده‌پێ بوو، د جڤینا گرووپا هه‌ده‌پێ دا دەرکەت و تەنێ ئه‌ڤه گۆت: “ئەم تە ناکن سەرۆک، ئەم تە ناکن سەرۆک، ئەم تە ناکن سەرۆک”.
ناڤەندا ڤێ پۆلیتیکایا کو کورد ل گه‌ل ئەردۆگان کرینه خویندار و ئه‌و بنئێخستین، قەندیل بوو، یێ کو ئەڤ درویشم بۆ دەمیرتاش پەیداکری ژی پارلامەنتەرێ هه‌ده‌پێ سڕی سوورەیا ئۆندەرێ ترک بوو، ئێدی دەمیرتاش ببوو پەیڤدارییا ڤان هەر دو ئالییان.
ژ وی دەمی 8 سالن هەموو هەول ئەون کو د ناڤبەرا کوردان و ئەردۆگان دا کێشه‌یێ بکه‌نه کێشەیا خوینداریێ و د ناڤا کوردان دا فکرا «ئەگەر ئەردۆگان بچیت دێ پرسگرێکا کوردان چارەسەر بیت» بەلاڤ کر، کێشەیا کوردان یا سیاسی کرنه کێشەیه‌كا خوینداریێ و نه‌هێلان کو کورد ل گه‌ل ئەردۆگانی دانوستاندنێ بکه‌ن و کورد بەر ب کەمالیستان ڤە خرکاندن.
دەما کو هنده‌ك رەوشەنبیرێن کورد ئەڤ رەوش رەخنە کرین و ژ کوردان خواستین کو ل گه‌ل ئەردۆگان دانوستاندنان بکه‌ن؛ دەمیرتاش گۆته وان: «یێن کو دبێژن سەرۆکاتیێ بده‌ن و ئۆتۆنۆمیێ بستینن بلا ببۆرن، ئەم ژ بۆ دیمۆکراسیێ تێدکۆشین. تەنێ ژ بۆ کوردان دیمۆکراسی نابیت. ئەم دێ ب هەڤرا تێکۆشینێ به‌رده‌وام كه‌ین. ئەم دیمۆکراسیێ ژ بۆ تەڤاهیا ترکیێ دخوازین، دیمۆکراسی تەنێ ب یەک ناسنامەیا نه‌ژادی ناهێته ئاڤا کرن».
ڤان گۆتنێن دەمیرتاش ژ بۆ کوردان سەردەمەک نەباش دا دەستپێکرن
گۆتنێن سەرۆکێ پارتیەکێ کو ژ سەدی 99 کوردان ژ بۆ چارەسەریا پرسگرێکا کوردی دەنگێ خوە دانێ و باوەرییا خوه پێ د ئینا، د راستیێ دا دهێته ڤێ واتەیێ: «پرسگرێکا هەره گرنگ یا ترکیێ نە پرسگرێکا کوردە، بەریا پرسگرێکا کورد پرسگرێکا دەمۆکراسیێ هەیە» ب ڤی شێوازێ ئاخفتن و سیاسەتا پرسگرێکا کوردان ئێخستنه بن پێیان.
ژ وێ دەمێ هەتا نها کوردان ب هەزاران زارۆکێن خوە سپارتن ئاخێ، د شەرێ خەندەکان دا کو په‌كه‌كێ و دەولەتێ ب هەڤ را ئۆرگانیزە کر بوو 11 باژارێن قەدیمێن کوردان هاتن هەرفاندن، کوردان ل باکورێ کوردستانێ دۆزا خوە به‌رزه کر، یەک ژ بەرپرسیارێن ڤێ پێڤاژۆیێ ژی سه‌لاحه‌ددین دەمیرتاشە.
وی وه‌سا هزر دكر کو ب تەمبۆرڤانی، خواندنا هەلبەستان، حه‌نه‌ك کرنێ ڤە ئەو یێ سیاسەتێ دکەت. سه‌لاحه‌ددین ئەوقاسی ژ کوردایەتیێ قوت بوو کو مالپەرەک بۆ خوه ب 5 زمانان ڤه‌كر، لێ کوردی تێدا نەبوو.
نها دیار دبیت کو وی هەم خوە و هەم ژی کورد هاڤێتنه د ناڤا ئاگری دا، ترکێن کو ژ بۆ ده‌مۆكراتیكبوونا وان کورد هاتینه قوربانی کرن، ل شەڤا 28ێ گولانێ د خرڤه‌بوونێن پیرۆزباهیا سەرۆککۆماریا ئەردۆگان دقرین و د گۆتن «ژ سەلۆی را سێدارە». لێ ناڤێ سەلۆ ژ بوو خوە ل بەر چاڤێ ترکان شێرین بکەت هات بوو دیتن.
خه‌مگینییا سەلۆ باشقان
گاڤا کەڤرەک ب لنگێ عه‌سكه‌ره‌كێ ترک دکەت سەلۆ باشقان بەریا سەرۆک ئەرکانێ دەولەتێ خەمگینی و سەرساخی ژ وان رە دخوەست. سەلۆ ب چیرۆکێن دەمۆکراسیێ مەزن بوو له‌وما هێ ژی «بەختێ رووما رەش» ناسناکەت.
میناکا دەمرتاش میناکەکه کو دڤێت هەموو سیاسەتمەدارێن کورد ده‌رسێ ژێ وه‌رگرن، هەر کوردێ کو قیبلا وی نە کورد و کوردستان بیت، دێ بن كه‌ڤیت.
