یەنەکێ و پەکەکێ گرتنا وەلاتیەکی ھەرێما کوردستانێیێ ب ناڤێ شێروان شێروانی ب داخویانیەکێ شەرمەزار کرن. شێروان شێروانی ژ بەر سەختەکاریا بەلگەیان ھاتییە گرتن.
شێروان شێروانی نەھات رەڤاندن، نەھات کوشتن، نەبۆمبەیەک ل گەل زارۆکێن وی د ئۆتۆمۆبیلا وی دە ھات چاندن. ل گۆری رێمنایێن قانوونی گازی دادگەھێ کرن، پارێزەرێ وی ژی ل گەل چوو، د بن رۆناھیا بەلگەیان دە ھات گرتن.
د بن ناڤێ زەرەرمەندێن دەمۆکراسیێ دە “شاراندنا ئاگرێ فتنێ”
لێ مخابن یەنەکێ و پەکەکێ ئەڤ بابەت بەر ب جھێن جودا ڤە کاشکر. ژ بەر کو ژ مێژ ڤە ل پلانەکێ دگەریان کو قادا بەھدینان بھەژینن. ل گۆری ڤێ پلانێ دخوازن کۆمەکا ب سەرۆکاتیا شێروان شێروانی وەکە “زەرەرمەند و قەهرەمانێن دیمۆکراسیێ” دەست نیشان بکن.
لێ کەسێن ھاتینە گرتن نە رۆژنامەڤان و نە ژی زەرەرمەندن. کۆما کو پەکەکە و یەنەکە ژێ رە دبێژن “گرتیێن بەھدینان” تەنێ فتنە و فەسادییێ شین دکن. دەزگەھێ مەدیایێ یێن وەک رووداوێ ژی ب ھەمان ناڤی خزمەتا ڤێ لیستکا تاری کریە.
یەنەکە و پەکەکە د مژارا شێروان شێروانی دە دو رووتیێ دکن. رۆژا کو دادگەھێ دەر بارێ شێروان شێروانی دە بریارا گرتنێ دایی، ڤان ھێزان پەیامەک وەشاند و ئەڤ یەک وەکە “دەربەیا دەمۆکراسیێ” نرخاند. کۆمەک کادرێن مەدیایێ ل دەردۆرا خوە کۆمکرن و داخویانی ب وان دا بەلاڤکرن. ھەر وھا سەری ل کۆنسۆلۆسخانەیان دان و گۆتن کو ل ھەرێما کوردستانێ ژیانا رۆژنامەگەران د مەترسیێ دەیە. ئارمانجا ھەڤبەشا پەکەکێ و یەنەکێ تەنێ روورەشکرن و سەختەکرنا روو و ناسنامەیا ھەرێما کوردستانێیە.
تاوان دەمۆکراتیکە، لێ بریارا دادگەھێ ئانتی دەمۆکراتیکە؟
داخویانیێن ل سەر گرتنا شێروان شێروانی یا ل سەر ناڤێ کۆمیتەیا تێکلیێن دەرڤەیا کەجەکێ و یەنەکێ گەلەک دراماتیک بوون. ھەکە گەلێ کورد راستیا ڤان ھەر دو پارتیان (پەکەکێ-یەنەکێ) نەزانیبا، بەلکی گۆتبا چەند دل رەحمن. لێ ھەر دو ئالی ژی د رێبازێن دیکتاتۆری، تاوان، کوشتنێن بێسەر و شوون دە گەلەک بناڤ و دەنگن و د کریارێن تاری دە پڕ سەرکەفتی نە.
کەسێن کو دبێژن ئەڤ ھەر دو پێکھاتە ژ بۆ دەمۆکراسی و مافان تێدکۆشن، دوروو و سەختەکارن. یەنەکێ بۆمبەیەک خست بن ئۆتۆمبیلا ھاوکار جاف و زارۆکێن وی دە و ئەو ژ دوورڤە تەقاند. ھەڤکار جاف خزمەتەک بێھەپا ژ بۆی یەنەکێ کر بوو و بەرپرسێ ھێزا دژە تەرۆرێ بوو. لێ یێن کو ژ بۆ شێروان شێروانی داکەتن کۆلانان ڤێ یەکێ نۆرمال دبینن. ئەڤ تێ وێ واتەیێ کو ژ بۆ ڤان سازیێن خوە دەمۆکراتک بناڤ دکن، تاوان سەربەستە، لێ گرتنا دادگەھێ قەدەغەیە.
گەر تاوانبار بێشەرم بە، تەوان ژی نۆرمالە
رەوشا پەکەکێ ژ یا یەنەکێ گەلەک خەرابترە. جھێ کو پەکەکە لێ ھەبە ل ور مافێ شەخسی و جڤاکی تونەیە. یەکانە ماف و ئەرکا گەل خزمەتا رێخستنا پەکەکێ یە. ل باکور، ل رۆژئاڤا ژ بەر رەخنەکرنا پەکەکێ ب سەدان مرۆڤ ھاتن قەتلکرن، خوینا گەلەک بێگونەھان ب دەستە پەکەکێ ڤە زوها بوویە. گەر پەکەکە دخوازە بەحسا دەمۆکراسیێ بکە، دڤێت دەستپێکی ئەو خوینا ب دەستێ خوە ڤە پاقژ بکە. د وی ئالی دە خوینا حکمەت فیدان، فەرید ئوزون، چەتین گۆنگۆر، مشعەل تەمۆ، بەھزاد دورسون و ب ھەزاران وەلاتپارێزەن دن.
شێروان شێروانی نە قەھرەمان و نە ژی قوربانییێ دەمۆکراسیێ یە. وەکی دن یەنەکە و پەکەکە ژ بەر کریارێن خوە یێن قرێژ نکارن ل کێلەکا پەیڤا دەمۆکراسییێ رە ژی دەرباز ببن. ئەگەر زەرەرمەندەکێ دەمۆکراسیێ ھەبە، ئەو ھاوکار جاف و ھەر دو کەچێن وی یێن بچووک و ھەڤژینا وی یا بریندارە کو ژ ئالیێ یەنەکێ ڤە ھاتبوون ئارمانج کرن. دێ فەرمۆ دەسپێکێ کوشتنا هاوکار جاف شەرمەزار بکن.
دبێژن “تاوانبارەک ئەگەر بێشەرم بە، دێ تاوان ژی رەوا هێت دیتن.” د دۆزا شێروان شێروانی دە یەنەکە، پەکەکە و دەردۆرا وان ھەم تاوانبارن، ھەم دوروو و ھەم ژی بێشەرمن.
