ئەندامێن کۆمیتەیا ناڤەندی و پێشمەرگەیێن “ئاگرێ سۆر” یا رۆژھلاتێ کوردستانێ کو وەکە رێھەڤال خیتابی پەکەکێ دکرن، ب بریارا کۆنسەیا سەرۆکاتی و فەرمانا رێڤەبەرێ پەکەکێ جەمیل بایک رادەستی دەولەتا ئیرانێ ھاتن کرن. چەکدارێن پەکەکێ چاڤ و دەستێن 15 کەسێن کو 2 ژ وان ژن بوون گرێدان و رادەستی قەرەقۆلا ئیرانێ یا خنێرە کرن. دیرۆکا ڤێ کارەساتا سییاسی کێم تێ زانین مالپەرا دارکا مازی ئەڤ بوویەرە لێکۆلین کر.

بوویەرا ئاگرێ سۆر جەوھەرێ دیرۆکا پەکەکێ یە

پەکەکێ ل چار پارچەیێن کوردستانێ ل دژی تەڤگەرێن کوردان شەر کرییە. ل گۆری تێگەھا پەکەکێ ژ بلی خوە ھەموو تەڤگەرێن کوردان خاین، سیخوور، خەراب، نەزان، پاشڤەروو و نەتەوەپەرەست پێناسە دکە. لێ یا کو ل پشت دژمناتیا پەکەکێ یا ل ھەمبەر تەڤگەرێن دن یێن کورد ھەیی، نە موخالەفەت و نە ژی  ھەڤرکییە. پەکەکێ ب شەرێ ل دژی رێخستنێن کوردان ئارمانج دکە ژ کۆلۆنیالیست و داگیرکەران قەرەبوویان بستینە. ئەڤە کورتییا دیرۆکا پەکەکێ یا پێنجی سالییە. پەکەکە بەرێ ل ئیراقێ دگەل سەددام دا، ئیرۆ دگەل شیعەیان دا، ل شامێ دگەل ئەسەد دا، ل ترکیێ دگەل باسکێن دەولەتا کوور دا و ل ئیرانێ ژی دگەل رەژیما ئایەتوللاھان دا ھەڤالبەندیێ دکە. لێ پەکەکێ هیچ رێکەگتنەک دگەل تەڤگەرێن کوردان دا نینە. بوویەرا ئاگرێ سۆر کورتییا ھەڤکێشەیا پەکەکێ یا” ل دژی کوردان شەری بکن، د ناڤا کۆلۆنیالیستان دە جھ بگرن”ە.

تەڤگەرا ئاگرێ سۆر و سەرۆکێ وێ محەمەد پێنجوینی

تەڤگەرا ئاگرێ سۆر تەڤگەرەکا چەکداری، خوەدی رامانەکا چەپ-سۆسیالیست بوو و ژ بۆ ئازادیا رۆژھلاتێ کوردستانێ تێدکۆشیا. د داویا سالێن 1980 دە دەست ب خەباتا خوە کر. نە خوەدی جەماوەر بوو، لێ بنیاتەکێ وێ ھەبوو. لێ د وارێ رەوشەنبیری دە لێکۆلینێن گرینگ دکرن و دیرۆکا کۆلۆنیالیزما ئیرانێ و پراکتیکا رۆژانە یا رەژیمێ دەشیفرە دکرن. ل گەلەک باژارێن رۆژھلاتێ کوردستانێ وەک مەریوان، پیرانشار و مەھابادێ دلسۆز و چەکدارێن وان ھەبوون.

رێڤەبەریا ناڤەندی یا تەڤگەرا ئاگرێ سۆر ل سەر چییا جھ ببوو. ل ھەرێمێن بنگەھین یێن کو دکەڤنە سەر خەتێن سینۆرێ رۆژھلات و باشوور دە جھگیر ببوون. رێڤەبەری ب ھەڤ رە دما و کارێ خوە دمەشاند. گەلەک جاران راستی ئێریشا تۆپبارانا دەولەتا ئیرانێ دھاتن و شەھید دان.

ژ ھاڤینا 1999 ڤە ل چییا و زۆزانێن کەلاشینێ یا د ناڤبەرا رۆژھلات و باشوورێ کوردستانێ دە ب جھ ببوون. ھێزێن پەکەکێ ژی ل ور خالێن گوومرێکێ دانی بوون. خەلکێ دەڤەرا بەردەسۆرێ ھەر تم دگەل ھێزێن پەکەکێ دە ھەڤدیتن دکرن. مەقەرێن وان ل کێلەکا ھەڤ بوون، پیرۆزباھی ب ھەڤرە دکرن. رێوورەسم ب ھەڤ رە دکرن. ژ ھەڤ رە دگۆتن ھەڤال. رێ دا پەکەکێ خەباتکار و چەکدارێن وان رۆژھلاتێ کوردستانێ ژ بۆی خوە بکار بینە. وان پەکەکە نە وەکە ھەڤرک، بەلکو وەکە رێخستنەکا پارچەیەکا دن یا کوردستانێ کو دڤێت پشتگیریا وێ بهێتە کرن، ددیت. لێ مخابن پەکەکێ ب ڤی چاڤی ل وان نەدنێری.

پەکەکێ ژ بۆ ناڤبەرا خوە و ئیرانێ وەکە بەرێ باش بکە رێخستنا کورد یا ئاگرێ سۆر کرە قوربانی

پشتی کو ئۆجالان د سالا 1999 دە ڤەگەریای ترکیێ، ئارمانجا “ترکبوونێ”ێ وەکە بەرنامە ھلبژارت، دەولەتا ئیرانێ ب ڤێ گوھەرتنا پەکەکێ نیگەران بوو. ژ بەر ڤێ یەکێ ژی رێکەفتنا خوە یا دگەل پەکەکێ کو د سالا 1996 دە چێکربوو ب داوی کر. دەولەتا ئیرانێ ئەو جھێن د بن سیبەرا بارەگاھێن وان یێن وەکە حەسەندەرە، کەلا رەش، دامباد، کۆتۆل، خرپاپە، زاگرۆس، شەھیدان و ھتد…. کامپ و نۆقتەیێن گوومرکێن پەکەکێ لێ هەیی تۆپبارانکرن. ھەر وھا ب تۆپان جھێن وەکە خنێرە، خاخورکێ، دۆلا کۆکێ، شەھید ھاروون (گەلیێ رزگە) کو بارەگەھێن پەکەکێ لێ بوون، کرن ئارمانج. د سالا 2000 دە د شەرێ یرنرکێ و پەکەکێ دە ئیرانێ ب تۆپان ئێریشی قەندیلێ دکر.

ئیرانێ رێیێن گومرکێ یێن پەکەکێ دگرتن، جوانێن کو ژ پەکەکێ ڤەدقەتییان ل گەل خوە کۆم دکرن و ل کامپان دخستن. ب سەر دە ژی، رێڤەبەریا پەکەکێ خوەست کو پەیوەندیێن دگەل شامێ دە خەراب بوونە سەرەراست بکە و خوەست بالافرگەھا تەھرانێ بکار بینە. ھەر وھا ھندەک فەرماندارێن لەشکەری یێن پەکەکێ د دەست ئیئتیلاعاتێ دە بوون…

د ڤێ یەکێ دە پێویستی ب ڤەکرنا رووپەلەکە نوو دگەل ئیرانێ ھەبوو. پەکەکێ رێیا ھەری کورت یا باشکرنا پێوەندییێن دگەل ئیرانێ هلبژارت، ئەو ژی ئەڤە بوو کو ب بێبەختی ئەندامێن ئاگرێ سۆر رادەستی دەولەتا کۆلۆنیالستا ئیرانێ بکە.

فەرماندارێن ئیرانێ ب دو ھەلیکۆپتەران ھاتن جەم جەمیل بایک و خیانەتا ئاگرێ سۆر پێکھات

د گولانا 2001 دە جەمیل بایک چوو ھەرێما کەلاشینێ یا کو ب تەمامی قەرەقۆلێن ئیرانێ لێ سەردەستن، دا کو دگەل ئیرانێ دە ھەڤدیتنان پێک بینە. ل ڤر دگەل فەرماندارێن ئیتیلاعاتێ دە جڤییا. پشترە جەمیل بایک فەرمان دا ھێزێن لەشکەری یێن ھەپەگێ، یێکینەیا “کەندال گولوورت” یێن کو ل کەلەشینێ دەڤەرا بەردەسۆرێ بوون، کو ب سەر بارەگەھێ ئاگرێ سۆر دە بگرن و ھەموویان دەستەسەر بکن. گەریلایێن پەکەکێ بارەگەھێ ئاگرێ سۆر دۆرپێچکر. لێ ھێزێ ئاگرێ سۆر وەکە ھاتنا سەرەدان و چایێ ڤەخوارنەکێ ئەو پێشوازی کرن و تەکلیفا خوارنێ ل وان کر. پاشێ ئەندامێن پەکەکێ دبێژن کو ئەو دخوازن محەمەد پێنجوینی، سەرۆکێ وان ببینن.

محەممەد پێنجوینی “ھەڤالێن پەکەکێ” وەکە ھەر جار پر ب گەرمی پێشوازی کرن. فەرماندارێ پەکەکێ دبێژیتێ، “ھوون دێ دگەل مە دا هێن”. محەمەد پێنجوینی و ھەڤالێن وی پێحەسیان کو دەما دەستێن وان بێن گرێدان دێ وان رادەستی ئیرانێ کن. دەستپێکێ گۆتە چەکدارێن پەکەکێ، “ھوون ژی کوردن، تشتێن وھا نەکن، خەلەتە”. لێ دەما فێم کرن کو نکارن وان رازی بکن، ھەر دو ژنێن پێشمەرگە یێن ئاگرێ سۆر ژ چەکدارێن پەکەکێ رجا کرن و گۆتن، “مە بکوژن لێ مە رادەستی دەولەتا ئیرانێ نەکن، ھوون دێ چاوا ژنێن کورد تەسلیمی دژمنی کن” لێ خایین بێ وژدان و بێ ھەست بوون، دیسا ژی ئەڤ شۆرەشگەرێن کورد ھاتن تەسلیمکرن. ل سەر وان رە دقیرن و دگۆتن گەر ھوون خوە ب لڤینن ئەم دێ وە ھەموویان کوژین”. ب ڤی ئاوایی تەڤاھیا کۆما ژ 15 کەسان کو 2 ژێ ژنن، دەستەسەر دکن. دەستێن وان گرێ ددن و بەرێ وان ددن بریارگەھا خنێرە.

پشتی دەمژمێرەکێ رایەدارێن ئیرانێ ب دو ھەلیکۆپتەران تێن خنێرە جەم جەمیل بایک. ل ڤر د ناڤبەرا پەکەکێ و ھێزا ئیستیخباراتا ئیرانێ ئیتیلاعاتێ دە ل سەر مژارێن وەکی ژنووڤە دەستپێکرنا پێوەندیان، ژ نوو ڤە بکارئانینا بالافرگەھ و خەتێن رێ، ڤەگەر و چوونا نەخوەشان، ژ نوو ڤە ئاڤاکرنا خالێن گومرکێ دە گرێبەستەکێ ئیمزە دکن.

پشتی جڤینێ 15 وەلاتپارێزێن کورد، شۆرەشگەر، زارۆکێن گەلێ کورد کو دەست و چاڤێن وان گرێدایی نە،رادەست  قەرەقۆلا سینۆری یا کو ئیران ژێ رە دبێژە “پایگاھا بۆخازە خنێرە”، تێن کرن.

محەممەد پێنجوینی ژ کۆما رادەستکری یەکسەر برن گرتیگەھا ئورمیێ. ب توندی تێ ئیشکەنجەکرن و د دەمەک کورت دە تێ سێدارەدان. بێ دادگەھ، بێ لێپرسین بریارا سێدارەدانێ ل سەر وی ھات سەپاندن.

ژ 14 کەسێن دن کو 2 ژ وان ژنن، کو رێڤەبەر و کادرۆیێن پێشەنگێن ئاگرێ سۆرن، ھینا ژی چ ئاگاھی نایێن زانین. لێ ھن دەردۆر رادگھینن کو ل قەرەقۆلا سینۆری دەما وان تەسلیمی دکن ھەر وێرێ تێن شەهیدکرن و جەنازەیێن وان خستنە چالەکێ دە.

ئەڤ کارەساتا ئاگرێ سۆر بەشەک ژ دیرۆکا پەکەکێ یا تاری و نەناسە.

یێن ل ھەمبەری کارەساتا ئاگرێ سۆر بێدەنگ دمینن نکارن بانگا یەکیتیێ بکن

پشتی کو یەک ژ رێڤەبەرێن پەکەکێ یێ ب ناڤێ موراد قارایلان گۆتی، “دبە کو د ناڤبەرا مە و پەدەکێ دە شەر دەرکەڤە، ئەز بانگ ل رەوشەنبیران دکم”، ئەندامێن ڤەشارتی یێن پەکەکێ کەتن ناڤا تەڤگەرێ. دڤێت ب زەلالی بهێت گۆتن کو پێویستی ب دورووتیێ ناکە “کەسێ ژ بۆ محەممەد پێنجوینی تەڤنەگەرە، ژ بۆ تشتەک دن بلا تەڤنەگەرە.”

گۆتنا “ئەم شەرێ د ناڤبەرا کوردان دە ناخوازن” بێ واتەیە ژ بەر کو؛ کەسێن کو دژی خیانەتێن پەکەکێ دەرنەکەڤن و ژ بۆ حیکمەت فیدان، فەرید ئوزون، چەتین گۆنگوور، سایمە ئاشکن، لاما باکس، فاروق بۆزکورت (ناسر) و ب ھەزاران کەسێن کو پەکەکێ کوشتین ھەلوەست نیشان نەداین ب چ روی بانگاوازیێ دکن. پەکەکێ ژ رۆژا هاتیە دامەزراندن ھەیا نها ل دژی ھەموو کوردان شەر کرییە. شەر نە د ناڤبەرا پەکەکێ و پەدەکێ دە یە. کێشە و پەڤچوون “د ناڤبەرا کوردێن کو ل دژی کۆلۆنیالیزمێ تێدکۆشن و پاراستنا مافێن خوە دکن و پەکەکە یا کو ل گۆری ئەجیندایا کۆلۆنیالیستان دخەبتە” دە یە.