سهرهدانا هاکان فیدان یا هەولێرێ پهكهكە دین و هار کر، روویێ پهكهكێ یێ خویا، نهرازیبوونا پهكهكێ ل هەمبەر سهرهدانا وەزیرێ دەرڤە یێ ترکیێ هاکان فیدان بۆ بەغدا و هەولێرێ پڕ دژوار بوو، ل گۆر پهكهكێ سهرهدانا هاکان فیدان بۆ هەولێرێ «خیانەتەکا مەزن» بوو.
تەڤگەرەکا وەک پهكهكێ یا كو خوە د هاڤێژیته هەر کونەکا سوودێ ژێ وهردگریت، د رەخنەکرنا سهرهدانا هاکان فیدان یا هەولێرێ دا نەراستگۆیه، پهكهكێ کامپانیایەکا مەزن یا مەدیایێ دا دەستپێکرن تەنێ ژ بۆ کو نهرازیبوونا کوردێن باکور ل هەمبەری خوە ببهته ئاقارهكێ دی. هەلبەت هەول دا کو پهدهكێ وەک تاوانبارێ هەمی كهموكورییان دەست نشان بکەت.
چ بوو؟ د دەما خوە دا هاکان فیدان گەلەک کورد كوشتینه، د دەما هاکان فیدان دا ل رۆژئاڤا ئۆپەراسیۆن هاتنه کرن، ما پهدهكێ و کەسەکێ دی دەستێ وە گرت بوو كو هوون هاکان فیدان و دەولەتا ترک راوهستینن؟ گاڤا کو هوون نهشێن شەرێ دەولەتێ بکهن وی دەمی بۆچی هوون زارۆکێن کوردان د خەندەک و تۆنێلان دا ددهنه کوشتن؟ زارۆکێن بێ گونەهـ دهاڤێژنه بەر دەڤێ دژمنی هار.
هەرێما کوردستانێ خودان هێزەکا یاسایی و سەروەرە، پهدهكە ل رۆژهلاتا ناڤین تەڤگەرا کوردان یا هەره كاریگهره، مافێ وێ هەیە ل گه هەر کەسهكی ب پهیڤیت و دانوستاندنان بكهت، وەکی دی، ئەڤه رێككهفتنێن گشتی و زهلالن و ب زەلالی ل بەر كامیرهیان دهێنه کرن، نە وەکی یێن پهكهكێ كو د دەرازینکێن دەزگەهێن ئیستخباراتان دا دهێنه کرن.
مهدیایا پهكهكێ وێنەیێن بهرپرسێن هەرێما کوردستانێ یێن کو سلاڤی هاکان فیدان دکهن و وەک نیشانەیا خیانەتێ «رووکەنی»یێ زووم دکهن، ئەم ل بەندا وێنەیێ «نوریە کەسبیرن» ل ئۆسلۆ کانێ ئهو چاوا هاکان فیدان هەمبێز دكهت و سلاڤ دکەتێ، ل شوونا کو هوون ڤێ یەکێ بۆ مە ببێژن، بلا پهكهكە بێژیته مه كانێ ههوه ل ئۆسلۆیێ ل گهل هاکان فیدانی چ مارکەیا بهقلاوێ خواری یە، هووو پهكهكیی یێن بێشەرم، کا ببێژن ل رۆژهلاتا ناڤین کیژان رێخستنا ئیستخباراتێ مایە کو ههوه هەڤدیتن و شریکاتی ل گهل نەکری؟ ل گەل مافیا و بارۆنێن ماددهیێن هشبهر ههوه چ هەڤالبەندی کرییە هوون وێ بۆ مه بێژن.
هەی بێشەرم كهنهكه، یا درست هوون ڤەگەرن سەر خەتا نەتەوی
هێژان سەرگرێن مەزن یێن پهكهكێ د دەربارێ مژارێ دا داخویانی نەداینە، لێ بەردەڤکێن وان هێرشهكا مەزن کرن، یەک ژ وان کەسێن کو ب ڤێ نیشانەیێ هێرش کری ژی كهنهكە بوو، كهنهكێ ب ئاوایەکی بێشەرم ب داخویانیەکێ بانگ کر و گۆت «پهدهكە ڤەگەرە خەتا نەتەوی». كهنهكێ د داخویانیا خوە دا ب بەرفرەهی بەحسا داخوازێن ترکیێ کر، وان گۆت کو هاکان فیدان کورد کوشتینە.
شەرم نەکر و گۆت ترکیە ل دژی ریفراندووما سەرخوەبوونا کوردستانێ یە، لێبەلێ پهكهكە ژی ب قاسی ترکیێ ل دژی ریفراندووما سەرخوەبوونا کوردستانێ دەرکەت، جەمیل باییک شەرم نەکر و گۆت: «ئەم نهشێین د ناڤبەرا نەتەوەپەرەستێن عەرەب و نەتەوەپەرەستێن کورد دا ببینه ئالی، دیسان رێخستنێن باشوور یێن پهكهكێ «تەڤگەرا ئازادی، رژاک» و بهرمایكێن وان ل وێرێ، پێكڤه گۆتن، “دەولەتبوون پاشڤەروویی یە”.
كهنهكە ب خوە ژی ل دژی ریفراندوومێ دەرکەت، دەما کو ئارتێشا ئیراقێ کەرکووک داگیر دکری، هەڤسەرۆکا كهنهكێ یا وی دەمی «نیلووفەر کۆچ» ل برۆکسەلێ ب کێفخوەشی خوارنێن چینی دخوارن و دگۆت، «پهدهكە خوسارهت دبیت».
كهنهكە ب خوە کو ل سەر ناڤێ کوردان دەرکەتیە سەر رێ و پاشی دهست ژ رێ و رێبازا خوە بەردایە، یێ کو بزڤریتە سەر خەتا نەتەوەیی نە پهدهكەیە كهنهكە ب خوە یە. دڤێت كهنهكە ڤەگەریتە سەر خەتا نەتەوی.
فوئاد حسێن ب ئەسلێ خوە کوردە ئەو کوردەکێ رەسەنە، یێ ب ئەسلێ خوە کوردە ئۆجالانە
چاپەمەنیا پهكهكێ شەرم نەکر و وێنەیێ هاکان فیدان و فوئاد حسێن ب مانشێتا «دو دیپلۆماتێن ب ئەسلێ خوە کورد” ل سەر خوینا گەلێ خوە ل هەڤ هاتن، بەلاڤکر».
هاکان فیدان ب ئەسلێ خوە کوردە، لێ فوئاد حسێن کورد کوڕێ کوردانە، داییك و بابێن وی وهك دهێته زانین، ژ سالا 1960ێ ئانكو 60 سالن د تەکۆشینا نەتەوی دا بوون و ئهو ئەندامێ پهدهكێ یە، هەمی ژیانا خوە ژ بۆ کوردان تەرخان کرییە، ب دەنگێن کوردان هاته هلبژارتن و ب دەنگێن کوردان بوو پارلەمەنتەر و بوو وەزیر، تەڤگەرا کو فوئاد حسێن ئەندام و بهرپرسێ وێ، پارچەیهكا کوردستانێ ئانكو «هەرێما کوردستانێ» رزگار و ئازاد کر و پێشکێشی هەمی کوردان کر، ئهرێ «كهنهكە-پهكهكە» ههوه چ پێشکێشی مللهتێ کورد کر؟ بەرسڤ؛ ئێش و ئەلەم، خوین و رۆندک هێڤییێن ڤالا…
عهبدوللا ئۆجالان کو ب ئەسلێ خوە کوردە، ل 15ێ سباتا 1999ێ دەما ل كینیایێ ل بالافرێ سوار بووی و لەشکەرێن ترک دیتی، گۆتی: «دیا من ترکە».
سەدەما ڤان هێرشێن هەستیار یێن پهكهكێ تەنێ ئەڤەیه: هەرێما کوردستانێ سەروەرییا خوە بەرفرەهـ نەکەت، پەترۆلێ نەفرۆشیت، کوردان دەولەمەند نەکەت و ل هەمبەر حهشدا شهعبی لاواز ببیت.
ههگهر نه چ دژمناتییا پهكهكێ ل هەمبەر هاکان فیدان نینە، گەر هاکان فیدان دهستهیا ئۆسلۆیێ داخواز كربانه هەولێرێ، مستهفا قاراسوو دا 40 تەقلا هاڤێژیت و نوریە کەسبیر ژی دا 80 تەقلا هاڤێژیت و چنه هەولێرێ، ئهرێ ما پهكهكە بێ تەقلە هاڤێتن چوویە دهڤ کیژان ئیستیخباراتێ؟