ل سەر ناڤێ نوویێ ھەدەپێ یەسەپێ 5 پارلامەنتەران وەکە کو کارەکی مەزن کربت، دوھی لگەل چەند کەسەکان چوون بەر دەریێ سلۆپیایێ ھەول دان کوردان ل دژی کوردان دەرخن.
چالاکی چالاکیەکا بێ باندۆر بوو، چالاکیەک بوو کو نیشان دا پەکەکە ئێدی نکارە ل بۆتانێ ژی جەماوەرێ خوە کۆم بکە. پێویستە ژ ڤی قوونجکی ڤە لێ بهێت نێرین. لێ مەسەلە نە ئەڤە، ئەم دکارین د ڤێ چالاکیێ دە شانەیا پەنجەشێرێ یا نەخوەشیا کو پەکەکێ د ناڤا کوردان دە بەلاڤ کریە ژی تەسپیت بکن. ئەو ژی د ناڤ کوردان دە پەنجەشێرا دژبەریێ یە.
پەکەکە وەکە ئەرکا خوەیا سەرەکی ئیستیفزازا کوردان ل دژی حکوومەتا ھەرێما کوردستانێ ب چاکی ب جھ تینە. پەکەکە د بن ناڤێ دژبەرییا پەدەکێ دە ھەول ددە کوردان ل دژی دەستکەفتیێن کوردان یێن ل ناڤەندا ھەولێرێ هان بدە.
پارلامەنتەرێن لێبۆک ب ئیشارەتەکێ بەزین سلۆپییا
ژ بۆ ڤێ یەکێ ژی پەکەکێ دەستپێکێ د مەدیایا خوە دە نووچەیێن دەرەو دەردخە، پشترە ژی ڤان نووچەیان دگھینە کادرۆیێن سیاسی و پشترە ژی جەماوەری ل قادان سەفەربەر دکە. ل ھەر بەشا کو ڤێ چالاکیێ رێک دئێخیت، سەرکردایەتیا پەکەکێ یا نەپەنی ھەیە. ل ئەورۆپایێ ب ناڤێن کەجەدە، ل رۆژئاڤا تەڤدەم و ھتد.
کادرۆیێن پەکەکێ ل باکورێ کوردستانێ و ترکیەیێ ڤان چالاکیان ئۆرگانیزە دکن. رێڤەبەرێن ھەدەپێ-یەسەپێ، وەکیل و رێڤەبەرێن سازیان ب تلیلی دبەزن قادان. چالاکیا سلۆپیا ژی ب ڤی رەنگی بوو. ب فیتکا پەکەکێ “نوونەرێن گەل” حەرکین قادان. ڤێ جارێ ژی 5 نوونەرێن ب ناڤێن بەردان ئۆزتورک، کەسکین بایندر، سالیحا ئایدەنیز، نەورۆز ئویسال، سەباحەت ئەردۆگان ساریتاش شاندن قادان. نە وەکی نوونەر، وەکی پێلەیستۆکێن پەکەکێ داکەتن قادان.
ژ بەر کو بەریا ھلبژارتنێ سۆز دابوون پەکەکێ، “ئەو نوونەرێن پەکەکێ یێن د ناڤا یەسەپێ دە نە. دێ ل گۆری ئیشارەتا پەکەکێ تەڤبگەرن. ژ خوە وان چ ئیرادە نینە، ئەو ئەرکدارێن ئەنجامدانا گۆتنێن پەکەکێ نە. سالیحا ئایدەنیز کەسەکە کو گەر ھوون رێکێ نیشانی وێ نەدن رێیا مالا خوە نزانیت، شرۆڤەیێن وێ یێن سییاسی سفرن و تەنێ ب پشتگرییا پەکەکێ د ناڤا سیاسەتێ دەیە. پارلامەنتەرا سێرتێ سەباحەت ئەردۆگان ژی د رەوشەکە وھا دەیە.
کەسکین بایندر کادرۆیەکا پەکەکێ یە کو بەریا نھا ژ گرتیگەھێ دەرکەتبوو.
د ناڤ ڤان پێلەییستوکان دە یێ ھەری لەوچە بەردان ئۆزتورکە.
بەردان ئۆزتورک دڤێت دەستپێکی گازی بەرپرسێن خوە بکە
ژ سالا 2015 ڤە پەرلەمانتەرە. ئەو نە تەنێ پەرلەمانتەرە، د قادا سیاسی دە ژی نوونەرێ پەکەکێ یە. ژ بەر ڤێ یەکێ د ناڤا پارلەمەنتەرێن ل سلۆپیایێ داکەتین قادان یێ ھەری مەترسیدارە. مرۆڤەکی خوەندایە، دزانە چ دکە، دزانە کو چ ئێریش ل سەر گەریلا نینە. ئەو دزانە کو ئەڤ ھەمی دەرەوە. لێ دیسا ژی سەرکێشیا ڤێ پیلانێ دکە. ئەڤ نە جارا یەکەمە ژی. بەرێ ژی د چالاکیێن ب ڤی رەنگی دە رێڤەبەری کربوو.
بەردان ئۆزتورککێ ھاتیە ئەرکدارکرن، نھا بێی شەرم شیرەتان ل سیاسەتمەدارێن باشوور ژی دکە. دبێژە، “مەسروور بارزانی ژ بۆ بایدن نامەیەک نڤیسی، بلا روویێ خوە بۆ لایێ خەلکی بزڤرینە.” ھەی بێشەرمێ فەلیتە، ھەکە تو وەلاتپارێز و ژیری، شیرەتان ل رێخستنا کو تو پێڤە گرێدایی بکە. ببێژە جەمیل بایک تو ل سلێمانیێ د کووشا ئیرانێ دە دمینی، تە زارۆکێن کوردان کرن چەکدارێن شیعەیان، شەرمە، روویێ خوە ڤەگەرینە خەلکێ. ئەرێ، گەر بەردان مرۆڤەکی ووسا بە، دڤێت دەرکەڤە و ڤێ بێژە. لێ نە ووسایە. ژ بەر ڤێ یەکێ نکارە بێژە.
سیاسەتا لەگال “سیاسەتا ل دویڤ دستووری یاسایی بیت” یا ترکیەیێ د دەستێ کێ دەیە؟
دەولەتا ترک ھەر رۆژ ل ڤر و ور کوردان دکوژە. ژ بەر کو ب کوردی دئاخڤن مرۆڤ تێن کوشتن، ژ سیاسەتا لەگال یا کوردان کو پەکەکە دمەشینە دەنگ دەرناکەڤە. نە دەتەکە، نە ھەدەپە و نە ژی یەسەپە، کەس سەرێ خوە ژ جھێن خوە یێن ل ئامەد و ستەنبۆلێ دەرناخە. بانگ ل کوردان ناکن کو ل دژی دەولەتا ترک بمەشن. لێ ل دژی ھەرێما کوردستانێ بانگا مەشێ دکن.
ئەڤە بێشەرمن. د ناڤا سیاسەتا لەگال یا پەکەکێ دە پارچەیەکا ب ڤی رەنگی یا رانتخوەر ھەیە. ئەو ھەمی ل سەر چینا ناڤین دژین و ب بالەفرێ دچن جڤینان. ل جیێن لوکس دخوەن و ڤەدخوەن. پشترا ژی دایکێن فەقیر و کەسێن ژ بەر پرۆپاگاندایا وان ب باندۆر بوونە دادکەڤن کۆلانان.
ئەڤ گرووپا رانتخوەر ل سەر خوینا جوانێن د خەندەکان دە مرنە و زارۆکێن کو ل چییا ژیانا خوە ژ دەست ددن دژین. ل سەر فەرمانێن پەکەکێ ئێرشی ناڤمالا کوردی دکن. کوردێن ھەری مەترسیدار ژی ئەڤن. ئەڤە نێچیرڤانێن بەرژەوەندییێن خوە نە.
سیاسەتا پەکەکێ یا کو کوردان ل دژی کوردان هان ددە
جڤاکا کورد جڤاکەکە کو د ناڤا خوە دە ناکۆکە. لێ کیژان عەشیر، پارتی و کۆم ب ھەڤ رە د ناڤ ناکۆکیان دە بووبن ژی، گەلێ کورد ئەڤ یەک قەد قەبوول نەکرییە. پەکەکە د دیرۆکا خوەیا نێزیکی 50 سالی دە د ڤێ مژارێ دە سەرکەفتییە: ئێدی نە تەنێ چینا ژۆر، گەل ژی کرییە دژمنێ ھەڤ.
تشتا کو پەکەکێ ئانیە سەرێ جڤاکا کورد ئەو بوو کو کورد دلسۆزێ ھەڤ نەبن. پەکەکە گرسەیا خوە ئانیە رەوشەک ووسا کو گەر ئیرۆ ئارتێشا ئیرانێ بکەڤە ھەولێرێ و کۆمکوژیەکێ بکە، دێ جەماوەرێ وێ ل چەپکا دەت و بێژیت “بارزانی دمرن”. پەکەکێ جەماوەرێ خوە ئانیە رەوشەکا ووسا کو ئەگەر کەسەک ئالایێ کوردستانێ بشەوتینە دێ ل بەر وێ دیلانێ کن. د دیرۆکێ دە چ جاران کورد ئەوقاس ب مرن و ئێشا ھەڤ شاد نەبوونە. پەکەکە د ناڤا کوردان دە چاندا دژمناتیی بەلاڤ کر.
تشتا کو دژمن نەکاری بکە پەکەکێ کر. تێکلیێن ھەستیارێن کورد-کورد قوت کرن. یێن کو بووینە پالپشتێن ڤێ سییاسەتا پەکەکێ یا کورد کرینە دژمنێن کوردان چ سیاسەتمەدار، فلان و بێڤان، نڤیسکار و رەوشەنبیرێن کو شریکێن ڤێ سیاسەتێ نە، دیرۆکا کوردان دێ لەعنەتێ ل وان ببارینە.
