رێخستنا مافێ مرۆڤان یا ھەنگاو راگەھاند، کەچەکا دن یا کورد ل باژارێ تەھرانا پایتەختا ئیرانێ، ژ بەر کو خوە حیجاب نەکریە ژ ئالیێ پۆلیسێن ئەخلاقی یێن ئیرانێ ڤە ھاتیە لێدان و ئێشکەنجە کرن و ژ بەر وێ ژی د کۆمایێ دەیە، لێ کەسوکارێن وێ کەچێ بەحسا تشتەکی دن دکن.
رێخستنا مافێ مرۆڤان یا ھەنگاو راگەھاند، د چەند رۆژێن بۆری دە کەچەکە تەمەن 16 سالی یا ب ناڤێ ئارمیتا گەڕاوەند یا خەلکا کرماشانا رۆژھلاتێ کوردستانێ کو نها روونشتڤانا تەھرانێ یە، دەما کو خوەستیە ب مەترۆیێ بچە بۆ دبستانێ، د ناڤ مەترۆیا شووھەدایا تەھرانێ دە ب باھانەیا ل بەرچاڤ نەگرتنا پیڤانا سەرێ خوە گرێدانێ، ژ ئالیێ پۆلیسێن ئەخلاقی یێن باژاری ڤە ل وێ دانە و نھا ژ بەر وێ لێدانێ ل نەخواشخانەیەکی باژار د کۆمایێ دەیە.
رۆژنامەگەرا کو خوەست بچە نەخوەشخانەیێ ھات بنچاڤکرن
ھاتە گۆتن کو ژنا جوان ل نەخوەشخانەیا فەجرا تەھرانێ د بن ئەولەھیێن توند دە تێ دەرمانکرن و “ھەیا نھا دەستوور نایێ دایین مالباتا وێ ژی ھەڤدیتنێ بکە.” رۆژنامەگەر مەریەم لۆتفی ژ رۆژنامەیا شەرق پشتی بوویەرێ خوەست بچە نەخوەشخانەیێ، لێ یەکسەر ھات بنچاڤکرن. ھات دیارکرن کو ئەو پاشێ سەربەست ھاتیە بەردان.
د دەما کو ل سەر مەدیایا جڤاکی ئەڤ بوویەر بوو جھێ نیقاشێن توند، ھندەکان ئیدیعا کرن کو د ڤیدیۆیا بوویەرێ دە تێ دیتن کو ژنا جوان ژ ئالیێ پۆلیسێن ژن ڤە ب سەرێ خوە ڤە ھاتیە ئاڤێتن بۆ ناڤا مەترۆیێ.
لێ ژ ئالیێ دن ڤە چاپەمەنیا نێزیکی حکوومەتا ئیرانێ راگەھاند، ئارمیتا ژ بەر نەخوارنا تێشتێ فشارا خوینا وێ داکەتیە و ژ بەر وێ ژی ل سەر ھش چوویە و چ پێوەندیەک ب پۆلیسێن ئەخلاق ڤە نینە و گەلەک ڤیدیۆیێن د دەما سواربوونا مەترۆیێ و ئانینا وێ یا خوارێ ژ مەترۆیێ ھاتن بەلاڤ کرن.
ھەروەھا چاپەمەنیا ئیرانێ ڤیدیۆیا داییک و بابێ وێ کەچێ بەلاڤ کرن کو دبێژن کەچا وان ژ بەر فشارا خوینا وێ داکەتیە وسا لێھاتیە، لێ ل گۆر ھەنگاو و ھندەک چالاکڤانێن رۆژھلاتێ کوردستانێ بەحس دکن ئەو داییک و باب د بن فشارێ دە بوونە دەما کو ئەو ڤیدیۆ ھاتیە تۆمار کرن و ئەو ئاخافتن کرنە.
د تۆرێن جڤاکی دە پشتی ڤێ بوویەرێ گەلەک بەحس و شرۆڤە هاتن کرن و گەلەک کەس ژی دبێژن چیرۆکا وێ ژی وەکە یا ژینا ئەمینییە و ھەمان بوویەر دوبارە بوویە.
