ئەنجامێن وێ چالاکیا کو د 1 ئیلۆنێ دە ل ئەنقەرەیێ پێکھاتی ژ بۆ کوردان گرنگن و دڤێت ب بەرفرەھی بهێن نیقاشکرن. لێ پەکەکە، ھەم د مەدیایێ دە و ھەم ژی د تۆرێن جڤاکی دە، ھەر کەسێ کو چالاکیێ شرۆڤە و رەخنە دکە، یەک ب یەک دکە ئارمانج و ب گۆتنێن وەکی “وە چ کریە، ھوون ل مالا خوە روونشتنە، ئەڤە فەداینە ژ بۆ مرنێ” ئێرشی وان دکە.
رەخنەکرنا چالاکیێ وەکە سڤکاتی ل چالاکڤانان کرن و لاینگرییا دەولەتا ترک تێ دیتن. لێ بەرەڤاژی ڤێ، رەخنەکرنا چالاکیێ ژ بۆ رزگارکرنا ژیانا ڤان کەسێن د چالاکیان دە ژییانا خوە ژ دەست ددن پر ئەخلاقی یە. چەک بکارانینا پەکەکێ ئێدی پڕ بێ واتە بوویە و قەد نە حەوجەیە کو خوین ژ تلییا یەک جوانێ کورد بهێت. دڤێت کورد ئێدی رێگریێ ل ڤی شەرێ بێ واتە یێ پەکەکێ بکن. دڤێت چالاکیا ئەنقەرەیێ ببە خالا ڤەگوھەرینێ.
دڤێت چەکا پەکەکێ یا “مرنا پیرۆز- شەھید” ژ دەست بهێتە دەرکرن
دڤێت بەریا ھەر تشتی کورد چەکا “شەھید- مرنا پیرۆز” ژ دەستێ پەکەکێ بینن دەر. پەکەکە ب سالایە ل سەر خوینا جوانێن کورد خوە سەروەر کرییە و رێگرییێ ژ رەخنەیێن گەل دکە. ئەو ب ڤێ یەکێ جەماوەرێ خوە گەرم دکە. پەکەکە نھا تشتا کو ژ مە دخوازە ئەوە کو ئەم رابن سەر پیان و وێنەیێن ھەر دو جوانێن کو چالاکیا ئەنقەرەیێ ل دار خستنە بلند بکن و درووشما بقیرن. ھەر وھا دخوازە ب نیشانا سەرکەفتنێ ئەم ل سەر کۆچە و کۆلانا بێژین “شەھید نامرن” لێ بەلێ 2 جوانان د ڤێ چالاکییێ دە ژییانا خوە ژ دەست دا. ب راستی ئەو بەر ب رێیەکە وسا یا مرنێ ڤە ھاتنە کاشکرن کو نھا چالاکییا وان ژی جھێ گومانێ یە. نە دیارە کو وان ب خوە خوە تەقاندنە یان ژ دورڤە ھاتنە تەقاندن، وان چالاکی کر یان ژی چالاکیەک ل دژی وان ب وان ھاتە کرن؟
د چالاکیا ئەنقەرەیێ دە پەکەکە چ بێژە بلا بێژە لێ چ لەشکەر-پۆلیسێن ترک نەمرنە. تەنێ دو پۆلیس بریندار بوون. واتە ڤان ھەر دو جوانان تەنێ ژ بۆ کو دو پۆلیسان بریندار بکن ژییانا خوە ژ دەست دا؟ واتە ڤان ھەر دو چالاکڤانا دختۆرەکێ فیترنەریێ کوشت و دو پۆلیس ژی بریندار کرن؟ ژ قەیسەریێ ھاتن ئەنقەرەیێ، ما کەسی فەرق نە کر؟ بەختێ وە کم ژ مە ھێڤی نەکن کو ئەم ژ ڤێ دەرەوا وە باوەر بکن.
ئەڤ جوان بوونە قوربانیێن لیستکەکێ. ئەو ھات خاپاندن. ئەو د ناڤ سیستەمەکێ بێ ئەخلاق یێ ب ناڤێ “تابوورا نەمران” وەکە رۆبۆتا تەنێ ژ بۆ مرنێ ھاتنە ئامادە کرن، نە ژ بۆ ژییانێ. ژ دەسپێکا دەرکەتنا پەکەکێ ھەیا ئیرۆ ئەڤە 5 نڤشێن جوانان بوونە قووربانییێن ڤێ لەیسیتکا پەکەکێ، ئەڤ دو جوان ژی کەتن رێزا وان.
پەکەکە دخوازە قەدەرا چەپێن ترکان ل سەر کوردان بسەپینە
پەکەکێ ھەری داوی د 28 جۆتمەھا سالا بۆری دا ب 2 ئەندامێن تابوورا نەمران ل مێرسینێ چالاکیەک ل دار خستبوو. دیسا د چالاکیێ دە چ کەس نەمریبوون. ل سەر وێ چالاکیێ ژی پڕ گومان ھەبوون. و ل سەر سیاسەتا ترکیەیێ چ باندۆرەک ئەرێنی چێنەکربوو. ژبەر ڤێ یەکێ وسا خویایە کو 25 ملیۆن خەلکێ باکورێ کوردستانێ دێ سالەکێ روونن و ل بەندا ئێریشا فەدایی یا پەکەکێ بن. دویرا ژی دێ درووشما قیرن، ھەلبەستان، سترانان، و ڤیدیۆیان چێکن و ژ ھەر کەسی رە ببێژە بێدەنگ بن، ئەو ژ بۆ مە دمرن. ئەڤ شەرێ مەزنە کو پەکەکە ژێ رە دبێژە “ستراتەژیا پاراستنا رەوا”؟ ئەڤە؟ گەلۆ چالاکی دێ کیژان پرسگرێکا کوردان چارەسەر بکە؟ مە دەست ژ سەرخوەبوونێ بەردا، لێ دێ چ پرسگرێک چارەسەر ببە، وەکە چاندا کوردی، سیاسەت، مافێ خوە رێڤەبەریێ دێ چارەسەر بکە؟. نکارە چ پرسگرێکان چارەسەر بکە. ب مرنا جوانان چ پرسگرێک چارەسەر نابن تەنێ پرسگرێکا کوور دبن.
ئەڤ شێوازە شێوازێ چەپێن ترکە. چەپێن ترک تەڤی ھەموو ڤەدەریا خوە 50 سالن جوانێن کو بمرن پەیدا دکن. کوردێن دێرسم، مەلەتی یان ژی جوانێن ژ چینا کارکەرێن بن دەستێن ترکیەیێ ل ڤر و ور د دەما گرەڤێن برچیبوونێ دە تێن کوشتن. ما ئەڤ یەک جڤاکا ترکیەیێ رزگار دکە؟ نە خێر. بەرەڤاژی ڤێ، چەپێن ترک د دەستێن دەولەتێ دە بوویە گۆپال، کەنگێ بخوازە ددە بەرخوە و ل سەرێ کوردان دخە.
کی ژ وان چەکێن د دەستێ پەکەکێ دە سوودمەند دبە؟
د شەر دە پرەنسیبەک ھەیە، تێ گۆتن: “ئەگەر تو چەکا د دەستێ خوە دە باش ب کار نەینی و نکاربی دژمن بن بێخی، ئەو چەک ئێدی فەلاکەتە، چەکا د دەستێ تە دە ئێدی ژ ئالیێ دژمنێ تە ڤە تێ برێڤەبرن.” چەکا د دەستێ پەکەکێ دە ئێدی خزمەتا کوردان ناکە، ل دژی کوردان تێ بکار ئانین. پەکەکە نھا ڤەگوھەریە تەڤگەرەکێ کو تەنێ دەما دەولەتا ترک پێویستی پێ بە و بپەژرینە یەک-دو چالاکیان دکە. پەکەکە نھا ھێزەک پارامیلیتەرە.
گەلێ باکورێ کوردستانێ چ دیندار، چ راست و چ چەپ، د سالێن 90 دە پشتگری دا شەرێ پەکەکێ. خوین دا، ژیانا خوە ژ دەست دا، بوو چەکدار، کەت زیندانێ، بێ سەر شوون بوو، گوندێن وی ھاتن شەوتاندن، کۆچبەر بوو. گەلێ باکورێ کوردستانێ ژ بۆ پەکەکێ چ ژ دەستێ وان ھات کرن. شەرێ پەکەکێ یێ سالێن 1990 نە کارێ ئۆجالان و ژیری یا سەرۆکێن پەکەکێ بوو، ب باوەری و پێویستییا کوردێن باکور ژ سەرخوەبوون و ئازادیێ پێش کەت. لێ پشتی سالا 2000 پەکەکێ ئەڤ دەستکەفتێن گەل ھێژ بێتر بێ پیڤان فرۆتن.
دەولەتێ گۆتە ئۆجالان “گەریلا ژ باکور ڤەکشە” و گەریلا ڤەکشیا. دەولەتێ د سالا 2004 دە گۆتە پەکەکێ “شەری بدن دەستپێکرن” و شەری دەست پێ کر. د پرانیا چالاکیێن کو ژ سالا 2000 ھەتا ئیرۆ ژ ئالیێ پەکەکێ ڤە ھاتنە کرن دە گومان ھەیە و ھەموو ژی د خزمەتا دەولەتا ترک دە نە. بوویەرا فارقینێ یا 14 تیرمەھا 2011 و بوویەرا جەیلان پنارێ یا 22 تیرمەھا 2015 تەنێ چەند ژ ڤان کریارێن پەکەکێ یێن ب شک و گومانن.
ئێدی چەکا پەکەکێ ژ بۆ دەولەتا ترک بوویە ئاڤا ژییانێ. ژ بۆ کوردان ژی بوویە ئاموورەکی تەسلیم گرتن و ئیتاعەت کرنێ. پەکەکە ب قاسی کو حکوومەتا ھەرێما کوردستانێ تەھدید دکە گەفان ل دەولەتا ترک ناکە. پەکەکە ب قاسی کو رێکێ ل بەر پێشکەتنا ئابۆری، سیاسی و دیپلۆماتیکا حکوومەتا ھەرێما کوردستانێ دگرە، رێکێ ل پێشیا ھاتنا دەولەتا ترک یان ژی پێکھاتەیێن دن یێن کۆلۆنیالیست ناگرە. د دەمەکێ دە مووراد قارایلان گەف ل پێشمەرگەیان خواربوو و گۆتبوو، “ئەز ناخوازم تەعلیماتێ بدم فیداییان کو بچن پێشمەرگا بکوژن.”
پەکەکە نکارە تێکچوونا شەرێ گەریلا ب چالاکییێن خوەکوژی بڤەشێرە
نھا راستیەک ھەیە کو دڤێت بهێت قەبوولکرن. دەما ئۆجالان چوویە ترکیەیێ تەئۆریا شەرێ گەریلا یا پەکەکێ تێکچوو. ب ناڤێ ستراتەژیا خوەپاراستنێ ژی پشتی شەرێ خەندەکان ل باکورێ کوردستانێ تێک چوو. تشتا کو پەککێ د ڤان سالێن داوی دە کری، ڤەشارتنا تێکچوونا خوە یە. دخوازن ب سووچدارکرنا پەدەکێ، رایا گشتی و ھەر کەسی بخاپینن و ڤێ تێکچوونێ ژی ل سەر خوە باڤێژن. تشتا کو د ڤان سالێن داوی دە پەکەکە دکە ئەوە کو تەنێ ب لیستکێن زارۆکان گەلێ کورد دخاپینە. وەکە پەکەکە دبێژە چ بەرخوەدان و شەر نینە و کەسێ ژی رێگری ل پەکەکێ نەکرییە کو شەرێ ترکان بکە. پەکەکە ھەول ددە ڤێ شکەستنێ بڤەشێرە.
ئەندامێن پەکەکێ ژی د نیقاشێن خوە یێن د ناڤبەرا خوە دە قەبوول دکن کو شەرێ گەریلا ئیفلاس کرییە. تەنێ شەرڤانێن نە بالغ یێن ل سەر مەدیایا جڤاکی ب ڤرێن پەکەکێ باوەر دکن. مشەخۆرێن پەکەکێ ژی ناخوازن ئەڤ بازارا پەکەکێ ژ دەست وان دەرکەڤە لۆماژی جوانان ئیستیسمار دکن بەرێ وان ددن رێیا مرنێ. یەکانە دەستکەفتا چالاکیا ب گومان یا ل ئەنقەرەیێ ئەوە کو پەکەکە ژ لایەنگرێن خوە رە بێژە، “بنێرن، ئەم ھەنە، ئەم دکارن ھێژ چالاکیان بکن.”
رەوشەنبیرێن کورد دڤێت مێرخاس بن، دەست ژ پەسندایینا مرنێ بەردن، ب زەلالی ڤی شێوازێ چالاکییێن پەکەکێ رەخنە بکن. دڤێت ب زەلالی بهێت گۆتن کو شەرێ پەکەکێ سبەرۆژەکا ئازاد ژ بۆ کوردان ئاڤا ناکە، بەرەڤاژی رۆژا کوردان تاری دکە. دڤێت کورد ئێدی ل ھەمبەری توندییا پەکەکێ یا کو بوویە ئاموورەک د دەستێ نۆکەران دە ب دلداری راوەستن و خوە ژ ڤێ زڤرۆکا مرنێ رزگار بکن.
