سەرۆکێ جەهەپێ کەمال کلچدارۆغلو د کۆنگرەیا پارتیا خوە دە، سەرۆکا IYI-پارتیێ مەرال ئاکشەنەر ب خیانەتێ تۆھمەتبار کر.
کۆنگرەیا 38 یا ئاسایی یا جەهەپێ ئیرۆ ل ئەنقەرەیێ ب درووشما “د سەدسالا دویەم دە، کۆنگرەیا دەمۆکراسی و یەکیتیێ” دەست پێ کر. کەمال کلچدارۆغلویێ کو دیسا نامزەدێ سەرۆکاتیا جەهەپێ یە، داخویانی دا.
کلچدارۆغلو ژ بەر زندانیکرنا سیاسەتمەدار و رۆژنامەگەران، رەخنە ل حکوومەتا ترکیەیێ گرت و سلاڤ ل زندانیان یەک ب یەک کر و ئەو وەکی قەھرەمانێن دەمۆکراسیێ ب ناڤ کرن.
کلچدارۆغلو ھەروھا بەحسا پێڤاژۆیا ھلبژارتنێ ژی کر و بێی کو ناڤێ وێ بدە، رەخنەیێن گران ژ سەرۆکا IYI-پارتیێ مەرال ئاکشەنەرێ گرتن و گۆت، د پێڤاژۆیا ھلبژارتنێ دە، خەنجەر ل پشتا وی کەتیە.
کلچدارۆغلو گۆت: “د پێڤاژۆیا ھلبژارتنێ دە، مە وەکی مێزا شەش ئالی گۆتووبێژ و خەباتێن بەرفرەھ ل سەر چاوانیا برێڤابرنا ترکیەیێ کر و دەما مژار ھاتە ل سەر نامزەدیا سەرۆککۆماریێ، پرسا بجیهشتنا ماسێ و ڤەگەرا سەر ماسێ پەیدا بوو. ناخوازم بکەڤم ناڤ ھوورگلیێن پرسێ، لێ ئەز ڤێ دبێژم، ئەز نەچار مام کو ب خەنجەرا کو ل پشتا من کەتیە، بەشداری ھلبژارتنێ ببم. مە ئاگر و خیانەت دیت.”
IYI-پارتی کو د ناڤا مێزا شەش ئالی دە بوو، سەرۆکا پارتیا IYI مەرال ئاکشەنەر بەری ھلبژارتنێن 14 گولانێ راگھاندبوو، ژ بۆ کاندیدیا سەرۆککۆماریێ، لگەل 5 پارتیێن ھەڤپەیمانیا مللەت ل ھەڤ نەکرنە و ڤەکشیابوو.
ھەروھا کلچدارۆغلو دیار کر کو ئەو جارا داوییە دێ ببە نامزەدێ سەرۆکاتیا جەهەپێ و ئەو دێ د کۆنگرەیا بهێت یا پارتیێ دە، خوە نەکە کاندید.
