تەڤی کو ت جاران پەکەکە ژ ئێریشکرنە سەر پەدەکێ رانەوەستیایە، لێ بەلێ، ئەڤ دەما پێتر ژ مەهەکییە پەکەکە تەڤ دەرفەتێن د دەست خوە دە بکارتینە و ب ئاوایەکی پڕ بێ ئەخلاقانە د چاپەمەنیا خوە دە د بن ناڤێ رەخنەکرنا پەدەکێ ئێریشی سەر حکوومەتا هەرێما کوردستانێ و پێشمەرگەیێن قەهرەمانێن ئازادیا کوردستانێ دکە و دەرەوێن ب شاخ پارڤە دکە.
پەکەکێ ئیدی هەڤسارێ فەساد و بێ بەختێن د چاپەمەنیا وێ دە کار دکن بەردایە و ئەو ئێریشی هەر تشتی دکن، دەروێن مەزن و بێ ئەخلاقیێن بێ میناک دکن و ب ڤێ یەکێ دخوازن زەمینەیەکی ژ بۆی ئێریشا لەشکەری ل سەر پێشمەرگەیێن قارەمان ساز بکن، دخوازن مەژیێ تاکێ کورد ژ بۆی شەرەکی ل دژی تاکە پەرچەیا ئازادا کوردستانێ حازر بکن و ب ڤان دەرەوێن ب شاخ رەواتیێ بدن ئیریشا خوە یا چاڤەرێکری، و خەتا خیانەتێ کو ژ سەرۆکێ وان یێ زندانکری بۆ وان مایە بدۆمینن.
د نووترین دەرەوا خوە یا ب شاخ دە، چاپەمەنیا پەکەکێ نووچەیەک د بن سەر ناڤێ “دەما پەدەکێ رێ چێدکر، دەولەتا ترک چەکێن کیمیاوی بکارئانی!” پارڤە کریە و تێ دە هەر تشت بەرەڤاژی کریە، ب ڤێ نووچەیا دەرەو کو رۆژانە د چاپەمەنیا خوە دە دوبارە دکە، دخوازە ڤێ دەرەوێ وەکە راستیەکی بکە رۆژەڤ و ئالیگرێن خوە پێ بخاپینە و رەواتیێ بدە خیانەتا خوە. چما ئەڤ نووچە دەرەوە؟ ئەمێ ڤێ پرسێ ب پرسەکە دن بەرسڤ بدن؛ گەلۆ گەر پەدەکە ئالیکاریا دەولەتا ترک بکە، چما دەولەتا ترک وێ ب چەکێن کیمیەوی ئێریشی وێ جهێ بکە یا کو “پەدەکێ رێیێ ژ بۆ لەشکرێ ترک چێدکە”؟ ئەڤ چ لۆژیکە؟
ئەڤ رێین حکوومەتا هەرێما کوردستانێ چێدکە ب تەنێ ژ بۆی یەک مەبەست تێن چێکرن، ئەو ژی ئەڤە کو رێگریێ ل زێدەتر هاتنە پێش یا لەشکرێ ترکیێ ژ بۆی ناڤا ئاخا هەرێما کوردستانێ بکە، ژ بەر کو پەکەکە ل هەر دەرێ ل همبەر ئارتێشا ترک تێکچوویە، جیهێن کو ئەڤ 40 سال بوون بارەگە و بریارگەهێن پەکەکێ لێ هەیی، تەڤ تەسلیمی دەولەتا ترکیێ کرنە و نها دخوازە دەڤەرێن دن ژی تەسلیمی دەولەتێ بکە، لێ حکوومەتا هەرێما کوردستانێ ئەڤ مەبەستا ترکیێ یا ب ئالیکاریا پەکەکێ باش فێم کریە و دخوازە پێشیێ ل ڤێ کۆمپلۆیا هەڤپارا ڤان دو دۆستێن کەڤن بگرە، پەکەکە ژ بۆی بجی ئانینا فەرمانا سەرۆکێ خوە و پاراستنا میساقا مللی یا ترکیێ هەر تشتی دکە و ئەڤ نە تشتەکی ڤەشارتیە، پەکەکە دخوازە سۆزا کۆ سەرۆکێ وان ل ئیمرالیێ ب دەولەتا ترک دایی جیبجی بکە.
پەکەکە دبێژە، “ئارتێشا ترک د کانوونا 2022 دە نەچار ما کو ژ تەڤاھیا ھەرێما رۆژئاڤایێ زاپێ ڤەکشە و ب رەنگەکی دیرۆکی تێک چوو. لێ بەلێ د ئیلۆنا 2023 ب پشتگریا لۆژیستیکی و ئالیکاریا خیانەتا پەدەکێ جارەکە دن دەست ب ھەولدانا داگیرکرنا ڤێ قادێ کر. پەدەکێ ژ بۆ ئارتێشا ترک رێ چێکر، ل کێلەکا قەرەقۆلێن خوە چەپەر ژ داگرکەران رە چێکر و جھێن کو ھەلیکۆپتەرێن سکۆرسکی کاربن خوە لێ دینە ب کەپچەیان ئامادە کر.” ئەڤ دەرەو دەما 3 سالانە رۆژانە د چاپەمەنیا پەکەکێ دە دوبارە و سەدبارە و هەزاربارە دبە، دەڤ ژ باشوور بەردن ما پەدەکە ل عەفرینێ سەرێ کانیێ، جوودی، گابار، بەستا، چارچەل، ماوا، ئاندۆک … هود بوو کو وە ژ دەولەتا ترکا داگیرکەر رە هشتن و وە بازدا هاتن دەردۆرا ئامێدیێ؟ لێ بنێرن پێش نها هوون ل کودەرێ بوون و نها ل کودەرێ نە، ئەڤجا هوون باس ل کیژان بەرخوەدان و بەرخوەدێران دکن؟ گەر هوون بەرخوەدێر، ولاتپارێز و سەریهەلێدر بوونا نها هوون ل باشوور نەدبوون، دا ل باکورێ کوردستانێ بن و وێ پەرچەیا بن دەست رزگار کن، لێ ئێدی هەر کەس دزانە هوون کینە و چ دکن، ستراتەژیا وە یا سەرەکە ب تەنێ جیبجیکرنا سۆزا خاینێ مەزن ئانکو عەڤدلا ئۆجالانە کو سۆز ب دەولەتا داگیرکەرا ترکیێ دایی ببە جیبجیکارێ میساقا مللی یا ترکیێ.
د وان رێین کو حکوومەتا هەرێما کوردستانێ ژ بۆی پێشمەرگەیان و پاراستنا باشوور چێدکە رە یەک لەشکرێ ترک دەرباس نەبوویە و دەرباس نابەژی، ئەڤ رێ ب تەنێ ژ بۆی پاراستنا باشوور و هێسانکرنا هاتن و چووینا پێشمەرگەیێن کوردستانێ تێن چێکرن، هوون هەر چ قاس دەرەوان و بێ بەختیان بکن گەلێ مە باوەر ناکە، ژ بەر کو ت بەلگەیەک د دەست وە دە تونەیە.
دوهـ وە دگۆ، دەولەتا ترک نەکاریە بکەڤە یەک تونەل و یەک سەنگەرێ گەریلا ل رۆژئاڤا زاپێ، ئیرۆ ژی هاتنە و دبێژن “ئارتێشا ترک د کانوونا 2022 دە نەچار ما کو ژ تەڤاھیا ھەرێما رۆژئاڤایێ زاپێ ڤەکشە و ب رەنگەکی دیرۆکی تێک چوو،” ئەی هاوار، ئەڤ چ دەرەون هوون دکن؟ گەلۆ چیا زەرکی، چیا رەشکی، سەرێ پراسیا، گرێ ئێف ئێم، سێری کو هوون ژێ رە دبێژن “تەپێ جوودی” دکەڤن کوو دەرا زاپێ؟ ئەڤ جی نها د دەستێ کێ دە نە؟ چما هوون قالا وان ناکن؟ گەلۆ دەولەتا ترک چەوا دکارە ژ سەرێ زێری ل دەشتانێ رێکێ ببە سەرێ مەتینی “پەراسیان”، هەلوە، دێرکێ، ئاڤسارکێ و ژێهەل بەر ب سەرێ مەتینا؟ ما ئەڤ نە رۆژئاڤا زاپێ یە، گەر هوون ل ورن و وەکە هوون قال دکن شەرەک گران ل ور هەیە و وە پاراستیە، چەوا دەولەتا ترک ب یەک حەفارە و کەپچە دکارە ووسا ب هێسانی رێیان ژ لەشکەرێ خوە رە چێکە؟ یێن کو رێیێ ل بەر لەشکرێ ترکیێ خوەش دکن و وان دکشینن ناڤا کووراهیا باشوورێ کوردستانێ هوون ب خوە نە، ژ کەرەما خوە یا نەیی رە ت دەرەوێن دن ژ ڤی گەلێ ب روومەت رە نەکن و زێدەتر رویێ خوە رەش و تاری رەش نەکن، ئێدی هەر کەس دزانە هوون کینە و چ دکن، هەوجەی دەرەو و بێبەختیان ناکە.
پەکەکێ نە ب تەنێ ت ئەلاقە ب کوردیتیێ نەبوویە، د هەمان دەم دە ت تێکلیا خوە ب مرۆڤاهیێ رە ژی تونەیە، جوانێن کورد ب ناڤێ ئەشقا کوردستانێ دخاپینە، وان دبە چیا، تونەلان ب وان ددە کۆلاندن و پشترە ژ بۆی بەرژەوەندیا خوە دکە قوربان، ئەڤ هەموو ژی ب تەنێ ژ بۆی یەک مەبەست تێ کرن، ئەوژی جیبجیکرنا سۆزا خاینێ مەزن، خاینێ کو سۆز ب دەولەتا ترکیێ دایی رێگریێ ل ئاڤابوونا دەولەتا کوردستانێ بکە کو هەر کەس دزانە ئەو خاینێ مەزن ژ غەینی ئۆجالان کو تەمسیلا خەتا خیانەتێ دکە، ت کەسەک دن نینە.
