شارەدارێ دیاربەکرێ عەدنان سەلچوک مزراکلی کو ژ کار ھاتبوو دوورخستن، ب 9 سال و 4 مەھان ھاتە سزادان.
ل سەر داخوازا دادگەھا بلند یا ترکیەیێ، ل دادگەھا دیاربەکرێ جارەکە دن دۆزا مزراکلی ھاتە ڤەکرن و مزراکلی ب تۆمەتا ئەندامەتیا رێخستنا تەرۆرێ، ب 9 سال و 4 مەھ و 15 رۆژان ھاتە سزدان.
عەدنان سەلچوک مزراکل ئیرۆ ب ریا سیستەما سەگبیس ژ گرتیخانا ئەدیرنەیێ بەشداری روونشتنا کو ل نەهەمین دادگەھا سزایێن گرانا دیاربەکرێ بوو و پارێزەرێن وی ژی ل دادگەھێ ئامادە بوون.
مزراکل تۆمەتێن ل سەر خوە رەد کرن. پارێزەرێن وی ژی ئیدیعا کرن کو مووەکیلێ وان بێگونەھە و داخوازا بەردانا وی کرن.
مزراکل 23 جۆتمەھا 2019 زیندانکرییە، دادگەھێ ھەروھا بریارا بەردەوامیا رەوشا زیندانکرییا مزراکلی دا.
عەدنان سەلچووک مزراکلی د ھلبژارتنێن 31 ئادارا 2019 دە وەک شارەدارێ دیاربەکرێ ھاتبوو ھلبژارتن و ب بریارا وەزارەتا ناڤخوەیا ترکیێ، د مەھا تەباخا ھەمان سالێ ھاتبوو دوورخستن و شوونا وی قەیووم ھاتبوو دانین.
عەدنان سەلچوک مزراکل د مەھا ئادارا 2020 دە، ب سزایێ 9 سال و 4 مەھ و 15 رۆژان گرتیگەھێ ھاتبوو سزادان و ئەو سزا ژ ئالیێ دادگەھا ھەرێمی ڤە ژی ھاتبوو پەژراندن. لێ پارێزەرێن مزراکل دۆز بربوون دادگەھا دارازێ یا بلندا ترکیەیێ و دادگەھێ بریارا کو ھاتیە دایین وەک یاسایی نەدیتبوو و خوەستبوو کو دۆز ژ نوو ڤە بێ دەستپێکرن.
